ନୂଆଦିଲ୍ଲୀ ୧୦/୧୧: ଅଜଣା ବ୍ୟକ୍ତିଙ୍କଠାରୁ କଲ୍ ଆସିଲେ ତାଙ୍କ ନାମ ମୋବାଇଲ ସ୍କ୍ରିନରେ ଡିଫଲ୍ଟ ଭାବେ ଦେଖିବାକୁ ସକ୍ଷମ ହେବେ ୟୁଜର । ଏହି ସୁବିଧା ଆଗକୁ ଲାଗୁ ହେବାକୁ ଯାଉଛି । ଏ ଦିଗରେ ଟେଲିକମ କମ୍ପାନିଗୁଡ଼ିକ କଲିଂ ନେମ୍ ପ୍ରେଜେନ୍ଟେସନ (ସିଏନ୍ଏପି) ସେବା ହରିୟାଣା ଏବଂ ହିମାଚଳ ପ୍ରଦେଶରେ ଆରମ୍ଭ କରିଛନ୍ତି । ବର୍ତ୍ତମାନ ସ୍ପାମ୍ ଏବଂ ସ୍ପାମ୍ କଲ୍ ଯୋଗୁ ଲୋକଙ୍କ ଚିନ୍ତା ବଢ଼ିଛି । ଏଭଳି ଫିଚରଦ୍ୱାରା ୟୁଜର କଲ୍ କରୁଥିବା ବ୍ୟକ୍ତିଙ୍କୁ ସହଜରେ ଚିହ୍ନଟ କରିବା ସହ କାଟିପାରିବେ ।
ସାରା ଦେଶରେ ସିଏନ୍ଏପି ସେବା କାର୍ଯ୍ୟକାରୀ କରିବା ପୂର୍ବରୁ ପ୍ରୁଫ୍ ଅଫ୍ କନ୍ସେପ୍ଟ ଟ୍ରାଏଲ୍ ଆରମ୍ଭ କରିବାକୁ ଟେଲିକମ୍ ବିଭାଗ (ଡିଓଟି) ଟେଲିକମ ସେବା ଯୋଗାଣକାରୀ କମ୍ପାନି ଗୁଡ଼ିକୁ ନିର୍ଦ୍ଦେଶ ଦେଇଛି । ଏହି ସିଷ୍ଟମ ଦ୍ୱାରା କେବଳ ନମ୍ବର ନୁହେଁ ଇନକମିଂ କଲ୍ କରୁଥିବା ବ୍ୟକ୍ତିଙ୍କ ପଞ୍ଜୀକୃତ ନାମ ଜଣାପଡ଼ିବ । ଫଳରେ ଜାଲ୍ ପଚିଚୟ କିମ୍ବା ଅନ୍ୟ ସଂସ୍ଥାର ପ୍ରତିନିଧି କହି ଠକେଇ ମାମଲା ହ୍ରାସ ହୋଇପାରିବ ।
ରିଲାଏନ୍ସ ଜିଓ, ଭୋଡାଫୋନ- ଆଇଡିଆ ଏବଂ ବିଏସ୍ଏନ୍ଏଲ୍ ଏହି ସେବାକୁ ପରୀକ୍ଷଣ ଭିତ୍ତିରେ ହରିୟାଣା ସର୍କଲରେ କାର୍ଯ୍ୟକାରୀ କରିଛନ୍ତି । ଅନ୍ୟପଟେ ଭାରତୀ ଏୟାରଟେଲ ହିମାଚଳ ପ୍ରଦେଶରେ ଏହାକୁ ପରୀକ୍ଷା କରୁଛି । ବର୍ତ୍ତମାନ ଏହି ସବୁ ସର୍କଲରେ ପଞ୍ଜୀକୃତ ମୋବାଇଲ ନମ୍ବର ଗୁଡ଼ିକର କଲ୍ରଙ୍କ ନାମ ମୋବାଇଲ ସ୍କ୍ରିନରେ ଦେଖାଯିବ ।
ଉଦାହରଣ ସ୍ୱରୂପ ଯଦି ହିମାଚଳ କିମ୍ବା ହରିୟାଣାର ସବ୍ସ୍କ୍ରାଇବର ଦେଶର ଅନ୍ୟ ପ୍ରାନ୍ତରେ ଥିବା କୌଣସି ବ୍ୟକ୍ତିଙ୍କୁ କଲ୍ କରନ୍ତି ତାଙ୍କ ନାମ ସେଭ୍ ହୋଇ ନ ଥିଲେ ଫୋନ ପାଉଥିବା ବ୍ୟକ୍ତିଙ୍କ ସ୍କ୍ରିନରେ ଦେଖାଯିବ । ମୋବାଇଲ ନମ୍ବର ନେବା ବେଳେ କଷ୍ଟମର ଆକ୍ୱିଜିସନ ଫର୍ମରେ ପ୍ରଦାନ କରାଯାଉଥିବା ଡାଟାକୁ ସିଏନ୍ଏପି ସିଷ୍ଟମ ବ୍ୟବହାର କରିଥାଏ । ସମ୍ପୂର୍ଣ୍ଣ ଲାଗୁ ହେଲେ ଏହା ଡିଫଲ୍ଟ ସର୍ଭିସ ହେବ । ବର୍ତ୍ତମାନ ଲ୍ୟାଣ୍ଡ୍ଲାଇନ ଏବଂ ୨ଜି ଭିତ୍ତିକ ଫିଚର ଫୋନକୁ ଏହି ସେବାରୁ ବାଦ ଦିଆଯାଇଛି ।
ଡାଟା ସମ୍ପୂର୍ଣ୍ଣ ଭାବେ ଇଣ୍ଟିଗ୍ରେଟ ହୋଇଯିବା ପରେ ଆଗକୁ ଲ୍ୟାଣ୍ଡ୍ ଲାଇନ ୟୁଜର ମଧ୍ୟ ଏହି ସେବା ପାଇବେ ବୋଲି ଟେଲିକମ ଶିଳ୍ପର ଜଣେ ବରିଷ୍ଠ ନିର୍ବାହୀ କହିଛନ୍ତି । ତ୍ୱରିତ ଭାବେ ଏହି ସେବାକୁ କାର୍ଯ୍ୟକାରୀ କରିବା ଲାଗି ଡିଓଟି ଟେଲିକମ୍ ଫାର୍ମ ଗୁଡ଼ିକୁ ପରାମର୍ଶ ଦେଇଛି । ୨୦୨୬ ମାର୍ଚ୍ଚ ଏପ୍ରିଲ ବେଳକୁ ସାରା ଦେଶରେ ଏହା ଲାଗୁ ହୋଇପାରେ । ପରୀକ୍ଷଣର ଫଳାଫଳ ଉପରେ ଏଭଳି ପଦକ୍ଷେପ ଗ୍ରହଣ କରିବେ କମ୍ପାନି।
ତେବେ ଏହି ସେବାର ବ୍ୟାପକତାକୁ ନେଇ ଏବେ ଆଶଙ୍କାରେ ରହିଛନ୍ତି ଟେଲିକମ କମ୍ପାନି । କାରଣ ୨ଜି ନେଟୱର୍କରେ ଟେକ୍ନୋଲୋଜି ଏତେଟା ଉନ୍ନତ ନୁହେଁ । ଏହି ପରୀକ୍ଷଣକୁ ନେଇ ଟେଲିକମ କମ୍ପାନିଗୁଡ଼ିକ ଅଦ୍ୟାବଧି କୌଣସି ଆନୁଷ୍ଠାନିକ ସ୍ପଷ୍ଟୀକରଣ ଜାରି କରିନାହାନ୍ତି ।
