ଓ୍ବାଶିଂଟନ,୨୫।୨: ଆମେରିକାର ଉତ୍ତର-ପୂର୍ବ ରାଜ୍ୟଗୁଡ଼ିକରେ ଆଜିକାଲି, ପ୍ରକୃତି ତାଣ୍ଡବ ରଚିଛି, ଯାହାକି ସ୍ଥାନୀ ବାସିନ୍ଦାଙ୍କୁ ସ୍ତବ୍ଧ କରିଦେଇଛି। ପାଣିପାଗ ବିଜ୍ଞାନୀମାନେ ଏହାକୁ ଗତ ଦଶନ୍ଧିର ସବୁଠାରୁ ଶକ୍ତିଶାଳୀ ‘ନୋର ଇଷ୍ଟର’ ଝଡ଼ ବୋଲି ଘୋଷଣା କରିଛନ୍ତି। ନୋର'ଇଷ୍ଟର ହେଉଛି ଏକ ବିପଦପୂର୍ଣ୍ଣ ଝଡ଼ ଯାହା ଉତ୍ତର-ପୂର୍ବରୁ ଦିଗରୁ ଆସିଥାଏ ଓ ନିଜ ରାସ୍ତାରେ ଆସୁଥିବା ସବୁ ଜିନିଷକୁ ନଷ୍ଟ କରିଦିଏ। ଏଥର, ଝଡ଼ଟି ନ୍ୟୁୟର୍କ, ବୋଷ୍ଟନ ଏବଂ ଫିଲାଡେଲଫିୟା ସମେତ ସମଗ୍ର ପୂର୍ବ ଉପକୂଳରେ ମାଡ଼ କରିଥିଲା।
ଏହି ଝଡ଼ ଏକ ଏପରି ଘଟଣା ମଧ୍ୟ ସୃଷ୍ଟି କରିଥିଲା ଯାହା ଗଣମାଧ୍ୟମ ଜଗତରେ ଦଶନ୍ଧି ଧରି ମନେ ରହିବ। ୧୮୭୨ ମସିହାରେ ପ୍ରତିଷ୍ଠିତ ବୋଷ୍ଟନ୍ ଗ୍ଲୋବ୍ ଏହାର ୧୫୩ ବର୍ଷର ଇତିହାସରେ ପ୍ରଥମ ଥର ପାଇଁ ଏହାର ପ୍ରିଣ୍ଟ ସଂସ୍କରଣ ଛାପି ନଥିଲା। ଖବରକାଗଜର ପ୍ରିଣ୍ଟିଂ ପ୍ଲାଣ୍ଟ ଟନଟନରେ ଅଛି, ଯାହା ଝଡ଼ର କେନ୍ଦ୍ରର ବହୁତ ନିକଟରେ ଥିଲା ଏବଂ ସେଠାରେ ୨ ରୁ ୩ ଫୁଟ ତୁଷାରପାତ ହୋଇଥିଲା। ଖବରକାଗଜର ପ୍ରିଣ୍ଟ ଅପରେସନ୍ ଭାଇସ୍ ପ୍ରେସିଡେଣ୍ଟ ଜୋଶ ରସେଲ କହିଛନ୍ତି, ଆମେ ଏହି ନିଷ୍ପତ୍ତିକୁ ହାଲୁକା ଭାବରେ ନେଉନାହୁଁ। କିନ୍ତୁ ଆମେ ସୁନିଶ୍ଚିତ କରିପାରିବୁ ନି ଯେ,ଯଦି କ୍ରୁ ପହଁଞ୍ଚି ବି ଯାଆନ୍ତି ତେବେ ଖବର କାଗଜଗୁଡ଼ିକୁ ଟ୍ରକ ଗୁଡ଼ିକରେ ସୁରକ୍ଷିତ ଭାବରେ ପହଞ୍ଚା ଯାଇ ହେବ।
କେବଳ ସେତିକି ନୁହେଁ, ନ୍ୟାସନାଲ ଓ୍ବେଦର ସର୍ଭିସ ଅନୁଯାୟୀ, ରୋଡ ଆଇଲ୍ୟାଣ୍ଡର ପ୍ରୋଭିଡେନ୍ସରେ ୩୭.୯ ଇଞ୍ଚ କିମ୍ବା ତିନି ଫୁଟରୁ ଅଧିକ ତୁଷାରପାତ ହୋଇଥିଲା, ଯାହା ଏହି ଅଞ୍ଚଳର ସର୍ବକାଳୀନ ରେକର୍ଡ ସୃଷ୍ଟି କରିଥିଲା। ଏହା ୧୯୭୮ ପରଠାରୁ ସର୍ବାଧିକ ତୁଷାରପାତ ଥିଲା। ମାସାଚୁସେଟ୍ସର ହ୍ୱିଟମ୍ୟାନରେ ୩୩.୭ ଇଞ୍ଚ ଏବଂ କନେକ୍ଟିକଟର ଉତ୍ତର ଷ୍ଟୋନିଂଟନରେ ୩୦.୮ ଇଞ୍ଚ ରେକର୍ଡ କରାଯାଇଥିଲା। ନାଣ୍ଟକେଟରେ ପବନ ୮୩ ମାଇଲ ପ୍ରତି ଘଣ୍ଟା ବେଗରେ ପହଞ୍ଚିଥିଲା, ଯାହା ଘୂର୍ଣ୍ଣିବାତ୍ୟା-ଶକ୍ତି ପବନ ସହିତ ସମାନ।ଏହି ତୁଷାରପାତ ସମଗ୍ର ଅଞ୍ଚଳକୁ ଥଣ୍ଡା କରିଦେଲା। FlightAware ତଥ୍ୟ ଅନୁଯାୟୀ, ୧୧୦୦ ରୁ ଅଧିକ ବିମାନ ଚଳାଚଳ ବାତିଲ କରାଯାଇଥିଲା। ଜନ୍ ଏଫ୍. କେନେଡି, ଲାଗାର୍ଡିଆ ଏବଂ ନ୍ୟୁଆର୍କ ଭଳି ପ୍ରମୁଖ ବିମାନବନ୍ଦରଗୁଡ଼ିକର ୯୦% ରୁ ଅଧିକ ବିମାନ ଚଳାଚଳ ବନ୍ଦ ରହିଥିଲା। ରୋଡ୍ ଆଇଲ୍ୟାଣ୍ଡର ଟି.ଏଫ୍. ଗ୍ରୀନ୍ ଅନ୍ତର୍ଜାତୀୟ ବିମାନବନ୍ଦର ସମ୍ପୂର୍ଣ୍ଣ ଭାବରେ କାର୍ଯ୍ୟ ବନ୍ଦ କରିଦେଇଥିଲା। ଉତ୍ତର-ପୂର୍ବ ରାଜ୍ୟଗୁଡ଼ିକର ୬୦୦,୦୦୦ ରୁ ଅଧିକ ଘର ବିଦ୍ୟୁତ୍ ବିଚ୍ଛିନ୍ନ କରିଦେଇଥିଲା। ନ୍ୟୁୟର୍କ ଏବଂ ବୋଷ୍ଟନ ମଧ୍ୟରେ ଟ୍ରେନ୍ ସେବା ବାଧାପ୍ରାପ୍ତ ହୋଇଥିଲା ଏବଂ ଥିଏଟର ଶୋ'ଗୁଡ଼ିକୁ ବାତିଲ କରାଯାଇଥିଲା।
