ନୂଆଦିଲ୍ଲୀ ୧୬/୦୬: ଓଟିଟି ପରଦା ପାଇଁ ତିଆରି ହେଉଥିବା ସିନେମା ବା ସିରିଜ୍ ସାଧାରଣତଃ ଅଳ୍ପ ବଜେଟ୍ର ହୋଇଥାଏ । ବିଶେଷ କରି ବଡ଼ ପରଦା ପାଇଁ ଯେତିକି ବଜେଟ୍ ଧାର୍ଯ୍ୟ ହୋଇଥାଏ ତାହା ତୁଳନାରେ ଓଟିଟି ପାଇଁ ବଜେଟ୍ ଯଥେଷ୍ଟ କମ୍ ଥାଏ । କିନ୍ତୁ ବିଶ୍ୱର ସବୁଠୁ ବ୍ୟୟବହୁଳ ସିନେମାକୁ ବି ପଛରେ ପକାଇଛି ଗୋଟିଏ ୱେବସିରିଜ୍ । ସେହି ସିରିଜ୍ର ଗୋଟିଏ ଗୋଟିଏ ପର୍ବ ତିଆରି କରିବାରେ କୋଟି କୋଟି ଟଙ୍କା ଖର୍ଚ୍ଚ କରାଯାଇଛି । ଲୋକପ୍ରିୟ ଉପନ୍ୟାସର କାହାଣୀ ଉପରେ ଭିତ୍ତି କରି ୨୦୦୦ ମସିହା ପରେ ତିନୋଟି ହଲିଉଡ ମୁଭି ରିଲିଜ୍ ହୋଇଛି । ଏହି ‘ମୁଭି ଟ୍ରାୟୋଲୋଜି’ ମୁକ୍ତି ପରେ ଦମଦାର୍ ବ୍ୟବସାୟ କରିଛି । ପରବର୍ତ୍ତୀ ସମୟରେ ସେହି କାହାଣୀ ଦେଖିବାକୁ ମିଳେ ଓଟିଟି ପ୍ଲାଟଫର୍ମରେ । ଓଟିଟି ପରଦାରେ ମୁକ୍ତି ପାଇବା ପରେ ତାହା ସବୁଠାରୁ ବ୍ୟୟବହୁଳ ୱେବ୍ ସିରିଜ୍ ଭାବରେ ନାଁ ଲେଖାଇଛି ।
୨୦୦୩ ମସିହାରେ ବଡ଼ ପରଦାରେ ଶେଷ ଥର ପାଇଁ ମୁକ୍ତି ପାଇଥିଲା ‘ଦ ଲର୍ଡ ଅଫ୍ ଦ କିଙ୍ଗସ୍’ ଫିଲ୍ମ ଟ୍ରାୟୋଲଜିର ଶେଷ ଭାଗ । ତାହା ପରେ ୧୯ ବର୍ଷର ବିରତି । ଦର୍ଶକଙ୍କ ପ୍ରିୟ ଏହି କାହାଣୀ ପୁଣିଥରେ ନୂଆ ରୂପରେ ପ୍ରକାଶ୍ୟକୁ ଆସିବ ସେକଥା ଅନେକ ଭାବିନଥିଲେ । ୨୦୨୨ ମସିହାରେ ଓଟିଟି ପରଦାରେ ୱେବ୍ ସିରିଜ୍ ଭାବେ ମୁକ୍ତି ପାଇଥିଲା ‘ଦ ଲର୍ଡ ଅଫ୍ ଦ ରିଂସ୍: ଦ ରିଂସ୍ ଅଫ୍ ପାୱାର’ । ପ୍ରଥମ ସିଜନ୍ ମୁକ୍ତି ପାଇବାର ଦୁଇବର୍ଷ ପରେ ୨୦୨୪ ମସିହାରେ ମୁକ୍ତି ପାଇଥିଲା ‘ଦ ଲର୍ଡ ଅଫ୍ ପାୱାର’ର ଦ୍ୱିତୀୟ ସିଜନ୍ । ଖର୍ଚ୍ଚ ଦୃଷ୍ଟିରୁ ସାରା ବିଶ୍ୱର ସବୁଠାରୁ ବ୍ୟୟବହୁଳ ସିନେମାକୁ ବି ପଛରେ ପକାଇଛି ‘ଦ ଲର୍ଡ ଅଫ୍ ଦ ରିଂସ: ଦ ରିଂସ ଅଫ୍ ପାୱାର’ର ପ୍ରଥମ ସିଜନ୍ । ସବୁ ମିଶାଇ ଏହି ସିଜନ୍ ତିଆରି କରିବାକୁ ଭାରତୀୟ ମୁଦ୍ରାରେ ଖର୍ଚ୍ଚ ହୋଇଛି ୮୩୦୦ କୋଟି ଟଙ୍କା ।
ରିପୋର୍ଟରୁ ଜାଣିବାକୁ ମିଳିଛି, ‘ଦ ଲର୍ଡ ଅଫ୍ ଦ ରିଂସ: ଦ ରିଂସ୍ ଅଫ୍ ପାୱାର’ର ପ୍ରଥମ ସିଜନ୍ର ଯାବତୀୟ ସତ୍ତ୍ୱ ଏବଂ ପ୍ରଚାରମୂଳକ ଖର୍ଚ୍ଚ ଅତୀତର ସବୁ ବ୍ୟୟବହୁଳ ସିନେମା ଓ ସିରିଜ୍କୁ ଟପିଯାଇଛି । ଏହା ବି କୁହାଯାଉଛି ‘ଦ ଲର୍ଡ ଅଫ୍ ଦ ରିଂସ: ଦ ରିଂସ୍ ଅଫ୍ ପାୱାର୍’ର ପ୍ରଥମ ସିଜନ୍ଟି ପ୍ରଯୋଜନା କରିବାକୁ ୮୩୦୦ କୋଟି ଟଙ୍କା ଖର୍ଚ୍ଚ ହୋଇଛି । ‘ଦ ଲର୍ଡ ଅଫ୍ ଦ ରିଂସ୍: ଦ ରିଂସ୍ ଓଫ୍ ପାୱାର୍’ର ପ୍ରଥମ ସିଜନ୍ର ଗୋଟିଏ ଗୋଟିଏ ଅଧ୍ୟାୟ ନିର୍ମାଣ ପାଇଁ ଭାରତୀୟ ମୁଦ୍ରାରେ ମୋଟ୍ ଖର୍ଚ୍ଚ ହୋଇଥିଲା ୪୮୦ କୋଟି ଟଙ୍କା । ‘ଦ ଲର୍ଡ ଅଫ୍ ଦ ରିଂସ୍’ର ତିନୋଟି ଫିଲ୍ମ ପ୍ରଯୋଜନା କରିବାକୁ ମୋଟ୍ ଯାହା ଖର୍ଚ୍ଚ ହୋଇଛି ତାହା ସିରିଜ୍ ତୁଳନାରେ ଯଥେଷ୍ଟ କମ୍ । ତିନୋଟି ଫିଲ୍ମ ମିଶାଇ ଭାରତୀୟ ମୁଦ୍ରାରେ ୧୧୧୫ କୋଟି ଟଙ୍କା ଖର୍ଚ୍ଚ ହୋଇଛି । ସବୁଠାରୁ ବ୍ୟୟବହୁଳ ଫିଲ୍ମ ‘ଦ ଷ୍ଟାର୍ ପାୱାର୍ସ: ଦ ଫୋର୍ସ ଆୱେକେନ୍ସ’ । ୨୦୧୫ ମସିହାରେ ମୁକ୍ତି ପାଇଥିବା ଏହି ଫିଲ୍ମ ପ୍ରଯୋଜନା ସମୟରେ ଭାରତୀୟ ମୁଦ୍ରାରେ ଖର୍ଚ୍ଚ ହୋଇଥିଲା ୩ ହଜାର କୋଟି ଟଙ୍କା ।
