ଖଲ୍ଲିକୋଟ - ପରିବେଶ ପ୍ରଦୂଷଣ ପାଇଁ ସରକାର ପୋଡା ଇଟା ଭାଟିକୁ ନିଷିଦ୍ଧ କରିଥିବା ବେଳେ ଖଲ୍ଲିକୋଟ ଅଞ୍ଚଳରେ ଚାଲିଛି ମାଳ ମାଳ ବେଆଇନ ପୋଡା ଇଟା ଭାଟି। ଏହି ଇଟା ଭାଟି ଗୁଡିକରେ ବାହାର ଜିଲ୍ଲାରୁ ଅଧିକ ଅର୍ଥ ଉପାର୍ଜନର ଲୋଭ ଦେଖାଇ ଶ୍ରମିକ ଆଣି କାମରେ ନିୟୋଜିତ କରାଯାଉଥିବା ବେଳେ ସେମାନଙ୍କୁ ଠିକ୍ ସମୟରେ ପାରିଶ୍ରମିକ ଦିଆ ଯାଉ ନଥିବା ଏବଂ ଟଙ୍କା ମାଗିଲେ ନିର୍ଯାତନା ଦିଆଯାଉଥିବା ଅଭିଯୋଗ ହେଉଛି। ଏଭଳି ଏକ ଘଟଣା ସାମ୍ନାକୁ ଆସିଛି ମାଣିକପୁର ଇଟା ଭାଟିରୁ।
ଅଭିଯୋଗ ପାଇବା ପରେ ସଂପୃକ୍ତ ଇଟା ଭାଟିରେ ଚଢାଉ କରି ଥିଲେ ସହକାରୀ ଶ୍ରମ ଅଧିକାରୀ , ଅତିରିକ୍ତ ତହସିଲଦାର ଓ ଖଲ୍ଲିକୋଟ ପୁଲିସ। ସୂଚନା ଆଧାରରେ ଖଲ୍ଲିକୋଟ ବ୍ଲକ ଅନ୍ତର୍ଗତ ମାଣିକପୁର ନିକଟରେ ଥିବା ଏମ ଏସ ଇଟାଭାଟିରେ ବରଗଡ଼ ଜିଲ୍ଲା ର ୧୨ ଜଣ ଶ୍ରମିକ କାମ କରୁଥିଲେ। ତେବେ ଇଟା ଭାଟି ମାଲିକ ଦୀର୍ଘ ଦିନ ହେଲା ଶ୍ରମିକ ମାନଙ୍କୁ ପାରିଶ୍ରମିକ ନଦେଇ ନିର୍ଯାତନା ଦେଉଥିବା ବରଗଡ ଜିଲ୍ଲାର ଏକ ଏନଜିଓ ଗଞ୍ଜାମ ଜିଲ୍ଲା ଶ୍ରମ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ।
ବରଗଡ ଅଞ୍ଚଳର ୧୨ ଜଣ ମହିଳା ଓ ପୁରୁଷ ଶ୍ରମିକ ଇଟା ଭାଟିରେ କାମ କରିବା ପାଇଁ ୩ ମାସ ତଳେ ମାଣିକପୁର ଗ୍ରାମକୁ ଆସିଥିଲେ। ତେବେ ଏମଏସ ଇଟା ଭାଟିର ମାଲିକ ଶ୍ରମିକ ମାନଙ୍କୁ ବିଭିନ୍ନ ପ୍ରଲୋଭନ ଦେଖାଇ ଆଣିଥିବା ବେଳେ ସେମାନଙ୍କୁ ଏଠାରେ ଆଣି କାମ କରାଇବା ସହ ଟଙ୍କା ଦେଉ ନଥିଲେ । ତେବେ ୧୨ ଜଣଙ୍କ ମଧ୍ୟରୁ କିଛି ଦିନ ତଳେ ଗୋଟିଏ ପରିବାର ୫ ଜଣ ନିଜ ଝିଅ ବାହାଘର କରିବା ପାଇଁ ଟଙ୍କା ମାଗିଥିଲେ , କିନ୍ତୁ ମାଲିକ ଟଙ୍କା ନଦେଇ ଫୋନ ପେ’ରେ ଟଙ୍କା ପଠେଇ ଦେବି ବୋଲି କହି ସେମାନଙ୍କୁ ଗାଁକୁ ପଠେଇ ଦେଇଥିଲେ।
କିନ୍ତୁ ଫୋନ ପେ’ରେ ଟଙ୍କା ପଠେଇଲେ ନାହିଁ। ଗାଁକୁ ଯିବା ପରେ ଉକ୍ତ ଶ୍ରମିକ ମାନେ ବରଗଡର ଏକ ଏନଜିଓ ସଂସ୍ଥାର ସହେଯାଗ ଲୋଡି ଥିଲେ। ଆଉ ଏହା ପରେ ଉକ୍ତ ଏନଜିଓ ସଂସ୍ଥା ଗଞ୍ଜାମ ଜିଲ୍ଲା ଶ୍ରମ ଅଧିକାରୀଙ୍କୁ ଯୋଗାଯୋଗ କରି ସମସ୍ତ ଘଟଣା ଜଣାଇ ଥିଲେ। ଅଭିଯୋଗ ପାଇ ଆଜି ସହକାରୀ ଶ୍ରମ ଅଧିକାରୀ ରଶ୍ମୀ ରେଖା ପଣ୍ଡା , ଖଲ୍ଲିକୋଟ ଅତିରିକ୍ତ ତହସିଲଦାର ଅଜୟ କୁମାର ସ୍ୱାଇଁ ଓ ଖଲ୍ଲିକୋଟ ଥାନା ଅଧିକାରୀ ରମେଶ କୁମାର ପ୍ରଧାନ ମିଳିତ ଭାବେ ଏମଏସ ଇଟା ଭାଟିରେ ଚଢାଉ କରି ଥିଲେ । ଚଢାଉ ବେଳେ ଜାଣିବାକୁ ପାଇଥିଲେ ବରଗଡ ଜିଲ୍ଲାର ୭ ଜଣ ଶ୍ରମିକ କାମ କରିବାକୁ ଆସି ଏଠି ଫସି ରହିଛନ୍ତି । ସେମାନଙ୍କୁ ସେମାନଙ୍କ ପରିଶ୍ରମିକ ମଧ୍ୟ ମାଲିକ ଦେଇ ନାହାନ୍ତି । ତେବେ ସହକାରୀ ଶ୍ରମ ଅଧିକାରୀଙ୍କ ହସ୍ତକ୍ଷେପ ଫଳରେ ଇଟା ଭାଟି ମାଲିକ ଶ୍ରମିକ ମାନଙ୍କୁ ସେମାନଙ୍କ ପାରିଶ୍ରମିକ ବାବଦ ପ୍ରାପ୍ୟ ଟଙ୍କା ପ୍ରଦାନ କରିଥିଲେ।
ଏ ନେଇ ସହକାରୀ ଶ୍ରମ ଅଧିକାରୀ ରଶ୍ମି ରେଖା ପଣ୍ଡା କହିଛନ୍ତି ଶ୍ରମିକ ମାନଙ୍କୁ ସେଠାରୁ ଉଦ୍ଧାର କରାଯିବା ସହ ଶ୍ରମିକ ମାନଙ୍କ ଟଙ୍କା ଫେରାଇଛନ୍ତି ଉକ୍ତ ଇଟା ଭାଟି ମାଲିକ । ତେବେ ଆଇନ ଅନୁଯାୟୀ ଉକ୍ତ ମାଲିକଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଅଯିବ ବୋଲି ସହକାରୀ ଶ୍ରମ ଅଧିକାରୀ କହିଥିବା ବେଳେ , ଅତିରିକ୍ତ ତହସିଲଦାର ଓ ଖଲ୍ଲିକୋଟ ଥାନା ଅଧିକାରୀ କହିଛନ୍ତି ଖଲ୍ଲିକୋଟ ଅଞ୍ଚଳରେ ବେଇଆଇନ ଇଟା ଭାଟି ଅଧିକ ମାତ୍ରାରେ ଥିବା ବେଳେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପାଇଁ ତହସିଲଦାର ପ୍ରସ୍ତୁତ ହେଉଛନ୍ତି। ଆଗାମୀ ଦିନରେ ଖଲ୍ଲିକୋଟ ଅଞ୍ଚଳର ସମସ୍ତ ଇଟା ଭାଟିକୁ ଜେସିବି ଲଗାଇ ଭଙ୍ଗାଯିବ ବୋଲି ମଧ୍ୟ ସେମାନେ ସୂଚନା ଦେଇଛନ୍ତି।
