ନୂଆଦିଲ୍ଲୀ,୨୩/୧୧ : ଭାରତର ଧୂଆଁଧାର ବ୍ୟାଟର ତିଲକ ବର୍ମା ଟି-୨୦ କ୍ରିକେଟରେ ବିଶ୍ବ ରେକର୍ଡ଼ କରିଛନ୍ତି । ତିଲକ ବର୍ମା ଟି-୨୦କ୍ରିକେଟରେ ଲଗାତର ଭାବେ ୩ଶତକ ଯୋଡ଼ି ଇତିହାସ ରଚିଛନ୍ତି । ତିଲକ ବର୍ମା ଶନିବାର ସୟଦ ମୁସ୍ତାକ ଅଲୀ ଟ୍ରଫି ଟୁର୍ଣ୍ଣାମେଣ୍ଟରେ ହାଇଦ୍ରାବାଦ ଲାଗି ଖେଳିବାକୁ ଯାଇ ଏକ ଏଭଳି କମାଲ କଲେ ଯେଭଳି ଭାବେ ଏବେ ପର୍ଯ୍ୟନ୍ତ ବିଶ୍ବର କୌଣସି ବି ବ୍ୟାଟର କରିପାରିନାହାନ୍ତି । ତିଲକ ବର୍ମା ଟି-୨୦ କ୍ରିକେଟରେ ଶତକରେ ହାଟ୍ରିକ ଲଗାଇବାରେ ବିଶ୍ବର ପ୍ରଥମ ବ୍ୟାଟର ହୋଇଯାଇଛନ୍ତି ।

ତିଲକ ବର୍ମା ଶନିବାର ସୟଦ ମୁସ୍ତାକ ଅଲୀ ଟ୍ରଫି ଟୁର୍ଣ୍ଣାମେଣ୍ଟରେ ମେଘାଳୟ ବିପକ୍ଷ ମ୍ୟାଚରେ ୬୭ବଲରେ ୧୫୧ରନ୍ କରିଛନ୍ତି । ତିଲକ ବର୍ମା ଏହି ସମୟରେ ୨୨୫.୩୭ର ଷ୍ଟ୍ରାଇକ ରେଟରେ ବ୍ୟାଟିଂ କରି ୧୪ଚୌକା ଏବଂ ୧୦ଛକ୍କା ମାରିଛନ୍ତି । ତିଲକ ବର୍ମାଙ୍କ ଏହା ଟି-୨୦ କ୍ରିକେଟରେ ଲଗାତର ଭାବେ ତୃତୀୟ ଶତକ ରହିଛି । ଏହା ପୂର୍ବରୁ ତିଲକ ବର୍ମା ନିକଟରେ ସାଉଥ ଆଫ୍ରିକା ବିପକ୍ଷରେ ଖେଳାଯାଇଥିବା ମ୍ୟାଚର ଟି-୨୦ ସିରିଜରେ ଲଗାତର ଦୁଇ ଶତକ ମାରିଥିଲେ । ତିଲକ ବର୍ମା ସାଉଥ ଆଫ୍ରିକା ବିପକ୍ଷରେ ଏହି ମାସ ସେଞ୍ଚୁରିୟନ ଏବଂ ଜୋହାନ୍ସବର୍ଗରେ ଲଗାତର ଭାବେ ଦୁଇ ଶତକ ଯୋଡ଼ିଥିଲେ । 

ତିଲକ ବର୍ମା ଟି-୨୦ କ୍ରିକେଟରେ ୧୫୦ ତଥା ତା’ଠାରୁ ଅଧିକ ରନ୍ କରିଥିବା ଭାରତର ପ୍ରଥମ ବ୍ୟାଟର ହୋଇଯାଇଛନ୍ତି । ତିଲକ ବର୍ମା ସୟଦ ମୁସ୍ତାକ ଅଲୀ ଟ୍ରଫି ଟୁର୍ଣ୍ଣାମେଣ୍ଟର ଇତିହାସରେ ସବୁଠାରୁ ବଡ଼ ବ୍ୟକ୍ତିଗତ ପାଳି ଖେଳିବାର ରେକର୍ଡ଼ ବି ନିଜ ନାଁରେ କରି ନେଇଛନ୍ତି । ତିଲକ ବର୍ମାଙ୍କ ପୂର୍ବରୁ ଶ୍ରେୟସ ଅୟରଙ୍କ ନାଁ ସୟଦ ମୁସ୍ତାକ ଅଲୀ ଟ୍ରଫି ଟୁର୍ଣ୍ଣାମେଣ୍ଟରେ ସବୁଠାରୁ ବଡ଼ ବ୍ୟକ୍ତିଗତ ପାଳି ଖେଳିବାର ରେକର୍ଡ଼ ଥିଲା । ଶ୍ରେୟସ ଅୟର ୨୦୧୯ରେ ସିକ୍କିମ ବିପକ୍ଷରେ ୧୪୭ରନର ପାଳି ଖେଳିଥିଲେ ।