ଭୁବନେଶ୍ୱର,୧୩/୦୬: ଜାତୀୟ ଓଟିଟିରେ ସ୍ଥାନ ପାଇବ ଓଡ଼ିଆ ସିନେମା "ମାମା ୱେଡ୍ସ ପାପା' । ୨ ବର୍ଷ ତଳେ ଏହା ଓଡ଼ିଆ ଭାଷାରେ ରିଲିଜ୍ ହୋଇ ଲୋକପ୍ରିୟତା ସାଉଣ୍ଟିଥିଲା । ଦମ୍ଦାର୍ କାହାଣୀ ଏବଂ ସୁନ୍ଦର ଗୀତ ପାଇଁ ଚର୍ଚ୍ଚାରେ ରହିଥିଲା । ଏହାର ଗୀତକୁ ଆଜି ବି ଦର୍ଶକ ଗୁଣୁଗୁଣୁ ହୋଇଥାନ୍ତି । ବର୍ତ୍ତମାନ ଏହା ଓଟିଟିରେ ରିଲିଜ୍ ହେବାକୁ ଯାଉଛି । ଯାହା ହିନ୍ଦୀ ଭାଷାରେ ଆସିବ । ଏହା ଓଡ଼ିଆ ସିନେମା ପାଇଁ ଗର୍ବର ବିଷୟ । ତେବେ ତା’ ପୂର୍ବରୁ ଶୁକ୍ରବାର ୧୩ ତାରିଖ ସନ୍ଧ୍ୟା ୫ଟାରେ ଭୁବନେଶ୍ୱରର ଏକ ମଲ୍ଟିସ୍କ୍ରିନ୍ରେ ଏହାର ସ୍ୱତନ୍ତ୍ର ପ୍ରଦର୍ଶନୀ ଅନୁଷ୍ଠିତ ହେବ ଯେଉଁଥିରେ ଓଲିଉଡ୍ର ବହୁ ପରିଚିତ ଚେହେରା ଯୋଗଦେବାର କାର୍ଯ୍ୟକ୍ରମ ରହିଛି ।
ଶ୍ରୀହାନ୍ ସିନେକ୍ରିଏନ୍ସ ବ୍ୟାନରରେ ନିର୍ମିତ "ମାମା ୱେଡ୍ସ ପାପା'ର ପ୍ରଯୋଜନା କରିଛନ୍ତି ବି. ଚନ୍ଦ୍ରପ୍ରିୟ ସୁବୁଦ୍ଧି । କାହାଣୀ, ଚିତ୍ରନାଟ୍ୟ ସାଙ୍ଗକୁ ନିର୍ଦ୍ଦେଶନା ଦେଇଛନ୍ତି ଆପ୍ପୁ କାନୁନ୍ଗୋ । ସଙ୍ଗୀତ ଦେଇଛନ୍ତି ଆସାଦ ନିଜାମ୍ । ଚିତ୍ର ଉତ୍ତୋଳନ କରିଛନ୍ତି ନିରଞ୍ଜନ ଦାଶ । ସିନେମାରେ ବଲିଉଡ୍ ଅଭିନେତା କୃଷ୍ଣା ଅଭିଷେକ ପ୍ରଥମ କରି ଓଡ଼ିଆ ସିନେମାରେ ଅଭିନୟ କରିଛନ୍ତି । ଅଭିଷେକ ରଥ, ଋତିଶା, ପ୍ରିୟଙ୍କା ପାଣିଗ୍ରାହୀ, ଜ୍ୟୋତି ମିଶ୍ର, ଦେବୁ ପଟ୍ଟନାୟକ, ଗୁଡ୍ଡୁ ପ୍ରମୁଖ ଅଭିନୟ କରିଛନ୍ତି । ଗୋଟିଏ କୁନି ଝିଅ ତା'ର ପାପା-ମାମାଙ୍କର କିଭଳି ବାହାଘର କରୁଛି ତାକୁ ନେଇ କାହାଣୀ ଗତିଶୀଳ ହୋଇଛି । ଓଡ଼ିଆରେ ହଲ୍ରେ ରିଲଜ୍ ହେବା ପରେ ପ୍ରଯୋଜନା ସଂସ୍ଥା ପକ୍ଷରୁ ଏହାକୁ ହିନ୍ଦୀ ଭାଷାରେ ରିଲିଜ୍ ପାଇଁ ଯୋଜନା ହୋଇଥିଲା, ଯାହା ସଫଳ ହେବାକୁ ଯାଉଛି ।
