ବ୍ରହ୍ମପୁର,୧୪/୧୧: ଶିକ୍ଷା ହେଉଛି ମୌଳିକ ଅଧିକାର । ଏଥିରୁ କେହି ଯେପରି ବଞ୍ଛିତ ନହୁଏ ସେଥିପ୍ରତି ସରକାର ସଚେତନ ଓ ଯତ୍ନବାନ। ଜେଲ୍ ଅନ୍ତେବାସୀଙ୍କ କ୍ଷେତ୍ରରେ ଶିକ୍ଷା ଅଧିକାରକୁ ନିଶ୍ଚିତ କରିବା ପାଇଁ ସରକାର ସ୍ୱତନ୍ତ୍ର ସୁବିଧା କରିଛନ୍ତି । ଜେଲ୍ ଅନ୍ତେବାସୀଙ୍କ ଉଚ୍ଚ ଶିକ୍ଷା ଆଶା ପୂରଣ ପାଇଁ ରାଜ୍ୟ ସରକାର ଓଡ଼ିଶା ରାଜ୍ୟ ମୁକ୍ତ ବିଶ୍ୱବିଦ୍ୟାଳୟ (ଓଏସ୍ଓୟୁ) ନାମରେ ଏକ ବିକଳ୍ପ ସୃଷ୍ଟି କରିଛନ୍ତି । ଏହାର ସରଳ ସିଲାବସ୍, ପରୀକ୍ଷା ଶୈଳୀ ଓ ନାମଲେଖା ସୁବିଧା କାରଣରୁ ଓଏସ୍ଓୟୁ ଖୁବ୍ କମ ସମୟ ମଧ୍ୟରେ ଲୋକପ୍ରିୟତା ହାସଲ କରିଛି । ସେଥିପାଇଁ ଜେଲ୍ରେ ଥିବା ବନ୍ଦୀ ଓ ବିଚାରାଧୀନ ବନ୍ଦୀମାନେ ଓଏସ୍ଓୟୁର ବିଭିନ୍ନ ପାଠ୍ୟକ୍ରମରେ ନାମ ଲେଖାଇବାକୁ ଆଗ୍ରହ ପ୍ରକାଶ କରୁଛନ୍ତି ।
୨୦୨୪-୨୫ ସେସନ୍ରେ ପାଠ ପଢ଼ା ପାଇଁ ମାଓନେତା ସବ୍ୟସାଚୀ ପଣ୍ଡା ଆବେଦନ କରିଛନ୍ତି। ସେ ପବ୍ଲିକ୍ ଆଡମିନିଷ୍ଟ୍ରେସନ୍ ସ୍ନାତକୋତ୍ତର ପାଠ୍ୟକ୍ରମରେ ନାମ ଲେଖାଇବାକୁ ଆବେଦନ କରିଥିବା ଓଏସ୍ଓୟୁ ଆଞ୍ଚଳିକ ନିର୍ଦ୍ଦେଶିକା ଶୀତଳ ପୂର୍ଣ୍ଣିମା କହିଛନ୍ତି । ଜେଲ୍ ଅନ୍ତେବାସୀଙ୍କ ପାଠ ପଢ଼ା ସୁବିଧା ପାଇଁ ଓଏସ୍ଓୟୁ ବ୍ରହ୍ମପୁର ମଣ୍ଡଳ କାରାଗାର ଭିତରେ ସ୍ୱତନ୍ତ୍ର ଷ୍ଟଡି ସେଣ୍ଟର୍ ସ୍ଥାପନ କରିଛି । ଏହା ପରଠାରୁ ଅନ୍ତେବାସୀଙ୍କ ଭିତରେ ପାଠ ପଢ଼ିବାର ଆଗ୍ରହ ବଢ଼ିଛି ବୋଲି ସେ କହିଛନ୍ତି ।
୨୪-୨୫ ଶିକ୍ଷା ବର୍ଷ ପାଇଁ ନାମଲେଖା ଆରମ୍ଭ ହୋଇଛି । ସ୍ନାତୋକତ୍ତର ଇତିହାସ, ରାଜନୀତି ବିଜ୍ଞାନ, ଅର୍ଥନୀତି ଓ ପବ୍ଲିକ୍ ଆଡମିନିଷ୍ଟ୍ରେସନ୍ ପାଠ୍ୟକ୍ରମ ପାଇଁ ଆବେଦନ ପ୍ରକ୍ରିୟା ଜାରି ରହିଛି । ଅକ୍ଟୋବର ୧୦ ଆରମ୍ଭ ହୋଇଥିବା ଆବେଦନ ପ୍ରକ୍ରିୟା ଆସନ୍ତା ୧୫ରେ ଶେଷ ହେବ । ଉପରୋକ୍ତ ୪ଟି ପାଠ୍ୟକ୍ରମ ଭିତରୁ ପବ୍ଲିକ୍ ଆଡମିନିଷ୍ଟ୍ରେସନ୍ ବିଷୟରେ ପଢ଼ିବାକୁ ମାଓନେତା ସବ୍ୟସାଚୀ ପଣ୍ଡା ଆବେଦନ କରିଛନ୍ତି । ତାଙ୍କ ସହ ଆଉ ଚାରି ଜଣ ଜେଲ୍ ଅନ୍ତେବାସୀ ଏହି ପାଠ୍ୟକ୍ରମରେ ନାମ ଲେଖାଇବାକୁ ଆବେଦନ କରିଥିବା ଆଞ୍ଚଳିକ ନିର୍ଦ୍ଦେଶିକା କହିଛନ୍ତି । ନାମ ଲେଖାଇବା ପରେ ପାଠ ପଢ଼ା ଓ ପରୀକ୍ଷା ଦେବାରେ ଯେପରି ଅସୁବିଧା ନହୁଏ ସେଥିପ୍ରତି ବିଶେଷ ଧ୍ୟାନ ଦିଆଯାଉଛି ବୋଲି ସେ କହିଛନ୍ତି । ଏ ସମସ୍ତ ସୁବିଧା ପାଇଁ ୨୦୨୦ରେ ଓଏସ୍ଓୟୁ ଓ ବ୍ରହ୍ମପୁର ମଣ୍ଡଳ କାରାଗାର ମଧ୍ୟରେ ବୁଝାମଣା ସ୍ୱାକ୍ଷର ହୋଇଛି । ନାମ ଲେଖାଇଥିବା ଅନ୍ତେବାସୀଙ୍କୁ ମୁକ୍ତ ବିଶ୍ୱବିଦ୍ୟାଳୟର ପାଠ୍ୟପୁସ୍ତକ ପ୍ରଦାନ କରାଯାଉଛି । ପ୍ରତ୍ୟେକ ସେମିଷ୍ଟର୍ରେ ୪ଟି ଅଫ୍ଲାଇନ୍ କ୍ଲାସ୍ କରାଯାଉଛି । ସେମିଷ୍ଟର୍ ପରୀକ୍ଷା ପୂର୍ବରୁ ଅଧ୍ୟାପକମାନେ ଜେଲ୍ ପରିସରସ୍ଥ ଶିକ୍ଷାକେନ୍ଦ୍ରକୁ ଯାଇ ପାଠ ପଢ଼ାଉଛନ୍ତି । ପ୍ରତ୍ୟେକ ସମୟରେ ଜେଲ୍ କର୍ତ୍ତୃପକ୍ଷଙ୍କ ଜରିଆରେ ପାଠପଢ଼ା ଓ ପରୀକ୍ଷା ସଂକ୍ରାନ୍ତ ସୂଚନା ଆଦାନପ୍ରଦାନ ସୁବିଧା ମଧ୍ୟ ଓଏସ୍ଓୟୁ ଯୋଗାଉଛି । ଜେଲ୍ କର୍ତ୍ତୃପକ୍ଷଙ୍କ ସହଯୋଗରେ ଅନ୍ତେବାସୀଙ୍କ ନାମଲେଖା, ପାଠ୍ୟପୁସ୍ତକ ଯୋଗାଣ, ପାଠ ପଢ଼ା, ପରୀକ୍ଷା ପରିଚାଳନା ଓ ଅନ୍ୟାନ୍ୟ କାର୍ଯ୍ୟକ୍ରମ ସୁରୁଖୁରୁରେ ହେଉଥିବା ଆଞ୍ଚଳିକ ନିର୍ଦ୍ଦେଶକା ଶୀତଲ୍ କହିଛନ୍ତି ।
ଉଲ୍ଲେଖଯୋଗ୍ୟ ଯେ, ୨୦୨୧ ଶିକ୍ଷା ବର୍ଷରେ ୧୧ ଜଣ ଅନ୍ତେବାସୀ ନାମ ଲେଖାଇଥିଲେ । ସେମାନଙ୍କ ଭିତରେ ସାମ୍ବାଦିକତା ଓ ଗଣଯୋଗାଯୋଗ, ଡିପ୍ଲୋମା ଇନ୍ ସାଇବର୍ ସିକ୍ୟୁରିଟି, ଡିପ୍ଲୋମା ଇନ୍ ଟ୍ରାଇବାଲ୍ ଷ୍ଟଡିଜ୍ ଏବଂ ଟୁରିଜିମ୍ ମ୍ୟାନେଜ୍ମେଣ୍ଟର ସାର୍ଟିଫିକେଟ୍ କୋର୍ସରେ ନାମ ଲେଖାଇଥିଲେ । ଦ୍ୱିତୀୟ ବର୍ଷ ଅର୍ଥାତ ୨୦୨୨ରେ ୧୩ ଜଣ ନୂଆ କରି ନାମ ଲେଖାଇଥିଲେ । ଏଯାଏଁ ମୋଟ ୨୪ ଜଣ ଜେଲ୍ ଅନ୍ତେବାସୀ ଓଏସ୍ଓୟୁର ବିଭିନ୍ନ ପାଠ୍ୟକ୍ରମରେ ନାମ ଲେଖାଇଥିବା ସୂଚନା ମିଳିଛି ।
