ନୂଆଦିଲ୍ଲୀ: ଆମେରିକାର ମଧ୍ୟ ଏବଂ ଦକ୍ଷିଣ ଅଞ୍ଚଳରେ ଏକ ଭୟଙ୍କର ଝଡ଼ତୋଫାନ ବ୍ୟାପକ କ୍ଷୟକ୍ଷତି ଘଟାଇଛି। ଘୂର୍ଣ୍ଣିଝଡ଼, ପ୍ରବଳ ପବନ ଏବଂ ଜଙ୍ଗଲରେ ନିଆଁ ଲାଗି ଘର, ସ୍କୁଲ ଏବଂ ଅନେକ ଯାନବାହନ ନଷ୍ଟ କରିଦେଇଛି। ଏହି ଭୟଙ୍କର ପ୍ରାକୃତିକ ବିପର୍ଯ୍ୟୟରେ ଏପର୍ଯ୍ୟନ୍ତ ୩୨ ଜଣଙ୍କର ମୃତ୍ୟୁ ହୋଇଛି ଏବଂ ଲକ୍ଷ ଲକ୍ଷ ଲୋକ କ୍ଷୟକ୍ଷତିର ସମ୍ମୁଖୀନ ହୋଇଛନ୍ତି।
ମିସୌରୀର ବାୟନେ କାଉଣ୍ଟିରେ ସବୁଠାରୁ ଅଧିକ କ୍ଷୟକ୍ଷତି ହୋଇଛି । ଡାକୋଟା ହେଣ୍ଡରସନ୍ ନାମକ ଜଣେ ସ୍ଥାନୀୟ ବାସିନ୍ଦା କହିଛନ୍ତି ଯେ, ସେ ଏବଂ ଅନ୍ୟମାନେ ଭଗ୍ନାବଶେଷରେ ଫସି ରହିଥିବା କିଛି ଲୋକଙ୍କୁ ଉଦ୍ଧାର କରିଛନ୍ତି। "ଆମେ ପାଞ୍ଚଟି ମୃତଦେହ ଦେଖିଲୁ,ଏହା ଭୟଙ୍କର ଥିଲା ବୋଲି ସେ କହିଛନ୍ତି।
ବାତ୍ୟା ଯୋଗୁଁ ଆମେରିକାର ଅନ୍ୟ ରାଜ୍ୟରେ ମଧ୍ୟ ବଡ଼ ଧରଣର କ୍ଷୟକ୍ଷତି ଦେଖାଯାଇଛି। ମିସିସିପି ରାଜ୍ୟରେ ଛଅ ଜଣଙ୍କର ମୃତ୍ୟୁ ହୋଇଛି ଏବଂ ତିନି ଜଣ ନିଖୋଜ ଅଛନ୍ତି। ଆଲାବାମାରେ ଝଡ଼ ଯୋଗୁଁ ରାସ୍ତା ଏବଂ ଘର ନଷ୍ଟ ହୋଇଯାଇଛି । ତିନି ଜଣଙ୍କ ମୃତ୍ୟୁ ପରେ ଆର୍କାନସାସର ଗଭର୍ଣ୍ଣର ସାରା ହୁକାବି ସାଣ୍ଡର୍ସ ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି । ଯେତେବେଳେ କି ଜର୍ଜିଆ ଗଭର୍ଣ୍ଣର ବ୍ରାଏନ୍ କେମ୍ପ ମଧ୍ୟ ପରିସ୍ଥିତିର ଗମ୍ଭୀରତାକୁ ବିଚାର କରି ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି।
ପ୍ରବଳ ଧୂଳିଝଡ଼ ଯୋଗୁଁ, ଅନେକ ସ୍ଥାନରେ ଦୁର୍ଘଟଣା ଘଟିଛି, ଯେଉଁଥିରେ କାନସାସର ଏକ ରାଜପଥରେ ୫୦ରୁ ଅଧିକ ଗାଡ଼ି ମଧ୍ୟରେ ଧକ୍କା ହୋଇଛି, ଏଥିରେ ୮ ଜଣଙ୍କର ମୃତ୍ୟୁ ହୋଇଛି। ଆଉ ସେହି ସମୟରେ, ଟେକ୍ସାସର ଆମରିଲୋରେ ଧୂଳି ଝଡ଼ରେ କାର୍ ଦୁର୍ଘଟଣା ଯୋଗୁଁ ୩ ଜଣ ଲୋକ ପ୍ରାଣ ହରାଇଛନ୍ତି।
