ନୂଆଦିଲ୍ଲୀ: ଆସନ୍ତାମାସ (ସେପ୍ଟେମ୍ବର)ରେ ଭାରତ ରୁଷୀୟ ତୈଳ ଆମଦାନୀକୁ ବୃଦ୍ଧି କରିବାକୁ ଯାଉଛି । ଏନେଇ ଡିଲର୍ସ ମାନେ ରଏଟର୍ସଙ୍କୁ ସୂଚନା ଦେଇଛନ୍ତି । କାରଣ ଡୋନାଲ୍ଡ ଟ୍ରମ୍ପଙ୍କ ନେତୃତ୍ୱାଧୀନ ଆମେରିକା ପ୍ରଶାସନ ବୁଧବାର ଠାରୁ ଭାରତୀୟ ରପ୍ତାନି ଉପରେ ଶୁଳ୍କ ଦ୍ୱିଗୁଣିତ କରି ୫୦% କରିଛି । ଆମେକରିକାର ଚାପ ସତ୍ତ୍ୱେ, ଭାରତୀୟ ରିଫାଇନର ମାନେ ଅଗଷ୍ଟ ଲେବୁଲରୁ ୧୦-୨୦% କିମ୍ବା ପ୍ରତିଦିନ ପ୍ରାୟ ୧୫୦,୦୦୦-୩୦୦,୦୦୦ ବ୍ୟାରେଲ କ୍ରୟ ବୃଦ୍ଧି କରିବେ ବୋଲି ଆଶା କରାଯାଉଛି ।
ଟ୍ରମ୍ପ୍ ପ୍ରଥମେ ଅଗଷ୍ଟ ୭ ତାରିଖରେ ପ୍ରାୟ ୭୦ଟି ଦେଶ ଉପରେ ସମାନ ପଦକ୍ଷେପ ସହିତ ୨୫% ପାରସ୍ପରିକ ଶୁଳ୍କ ଲାଗୁ କରିଥିଲେ, କିନ୍ତୁ ପରେ ଭାରତର ରୁଷୀୟ ଅଶୋଧିତ ତୈଳ କ୍ରୟ ଜାରି ରଖିବା ହେତୁ ଅତିରିକ୍ତ ୨୫% ବୃଦ୍ଧି କରିଥିଲେ। ଚାପ ସତ୍ତ୍ୱେ, ଭାରତ ସରକାର ସଙ୍କେତ ଦେଇଛନ୍ତି ଯେ, ଏହା ତେଲ ଆମଦାନୀରେ କୌଣସି ତୀବ୍ର କଟକଣାକୁ ଏଡାଇବା ସହିତ କୂଟନୈତିକ ସମାଧାନ ଖୋଜୁଛି।
୨୦୨୨ ମସିହାରେ ୟୁକ୍ରେନ ଆକ୍ରମଣ ପରେ ପଶ୍ଚିମା ପ୍ରତିବନ୍ଧକ ମସ୍କୋକୁ ଅନେକ ବଜାରରୁ କାଟି ଦେବା ପରେ ଭାରତ ରୁଷୀୟ ଅଶୋଧିତ ତୈଳର ସବୁଠାରୁ ବଡ଼ କ୍ରେତା ଭାବରେ ଉଭା ହୋଇଛି। ଏହି ପରିବର୍ତ୍ତନ ଭାରତୀୟ ରିଫାଇନର୍ସଙ୍କୁ ଶସ୍ତା ଯୋଗାଣ ସୁରକ୍ଷିତ କରିବାରେ ସାହାଯ୍ୟ କରିଛି।
୨୦୨୪ ମଧ୍ୟଭାଗ ସୁଦ୍ଧା, ଭାରତ ପ୍ରତିଦିନ ପ୍ରାୟ ୧.୫-୧.୬ ନିୟୁତ ବ୍ୟାରେଲ ରୁଷୀୟ ତୈଳ ଆମଦାନୀ କରୁଥିଲା, ଯାହା ଏହାର ପ୍ରାୟ ୪୦% ଅଶୋଧିତ ଆବଶ୍ୟକତା ପୂରଣ କରୁଥିଲା। ମିଳିଥିବା ତଥ୍ୟ ଦର୍ଶାଉଛି ଯେ ଅଗଷ୍ଟ ମାସର ପ୍ରଥମ ୨୦ ଦିନରେ ଆମଦାନୀ ହାରାହାରି ୧.୫ ନିୟୁତ ବ୍ୟାରେଲ ଥିଲା, ଯାହା ଜୁଲାଇରୁ ଅପରିବର୍ତ୍ତିତ କିନ୍ତୁ ପୂର୍ବ ଶିଖର ଠାରୁ ଟିକିଏ କମ୍ ଥିଲା।
ବିଶ୍ୱ ବଜାର ଅସ୍ଥିର ରହିବା ସତ୍ତ୍ୱେ ରୁଷୀୟ ତୈଳର ଅଧିକ ଅନୁକୂଳ ମୂଲ୍ୟ ଭାରତୀୟ ରିଫାଇନର୍ସଙ୍କ ପାଇଁ ବିଶେଷ ଭାବରେ ଆକର୍ଷଣୀୟ କରିଥାଏ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ ସାକ୍ଷାତ ସମେତ କୂଟନୈତିକ ପ୍ରଚାର ଜାରି ରଖିଥିବା ବେଳେ, ଭାରତ ୱାଶିଂଟନ ସହିତ ଶୁଳ୍କ ବିବାଦର ସମାଧାନ ପାଇଁ ଆଲୋଚନା କରିବାକୁ ଚାହୁଁଛି ।
ବିଶ୍ଳେଷକ ମାନେ ସତର୍କ କରାଇ ଦେଇଛନ୍ତି ଯେ ଯଦି ଭାରତ ତାର ରୁଷୀୟ ଅଶୋଧିତ ତୈଳ ଆମଦାନୀକୁ ଉଲ୍ଲେଖନୀୟ ଭାବରେ ହ୍ରାସ କରେ, ତେବେ ବିଶ୍ୱବ୍ୟାପୀ ତୈଳ ଯୋଗାଣ ପ୍ରତିଦିନ ପ୍ରାୟ ୧ ନିୟୁତ ବ୍ୟାରେଲ ହ୍ରାସ ପାଇପାରେ, ଯାହା ମୂଲ୍ୟ ପ୍ରତି ବ୍ୟାରେଲ ୧୦୦ ଡଲାର ପାଖାପାଖି ପହଞ୍ଚାଇପାରେ। ଏପରି ପଦକ୍ଷେପ ମସ୍କୋକୁ ମଧ୍ୟ କଠିନ ପ୍ରଭାବିତ କରିବ, କାରଣ ରୁଷର ରପ୍ତାନି ପରିମାଣ ଏବଂ ଯୁଦ୍ଧକାଳୀନ ରାଜସ୍ୱ ବଜାୟ ରଖିବା ପାଇଁ ଭାରତର ଚାହିଦା ଗୁରୁତ୍ୱପୂର୍ଣ୍ଣ ହୋଇଯାଇଛି।
