ଭୁବନେଶ୍ୱର,୨୮/୦୬ : ରେଳଯାତ୍ରୀଙ୍କ ପାଇଁ ଖୁସି ଖବର । ଏଣକି ଟ୍ରେନ ବିଳମ୍ୱ ହେଲେ କିମ୍ବା ଏସି ଖରାପ ଥିଲେ ଫେରସ୍ତ ପାଇବେ ଟଙ୍କା । ଭାରତୀୟ ରେଳ ମନ୍ତ୍ରଣାଳୟର ଟିକେଟ ବୁକିଂ ୱେବସାଇଟ୍ ଆଇଆରସିଟିସି ଯାତ୍ରୀଙ୍କ ପାଇଁ ଏହି ନୂଆ ସୁବିଧା ଆରମ୍ଭ କରିଛି ।
ଏହି ସୁବିଧା ଅନୁଯାୟୀ ଯଦି ଟ୍ରେନ ୩ ଘଣ୍ଟାରୁ ଅଧିକ ବିଳମ୍ୱ ହୁଏ କିମ୍ୱା ଏସି କୋଚ୍ରେ ୨ ଘଣ୍ଟାରୁ ଅଧିକ ସମୟ ବିତି ଯାଇଥିଲେ ସୁଦ୍ଧା ଥଣ୍ଡା ଅନୁଭବ ନହୁଏ ତେବେ ଏପରି ପରିସ୍ଥିତିରେ ଯାତ୍ରୀମାନଙ୍କୁ ଆଇଆରସିଟିସି ୱେବସାଇଟ୍ରେ ୨୪ ଘଣ୍ଟା ମଧ୍ୟରେ ଆବେଦନ କରିବାକୁ ପଡ଼ିବ । ୭ରୁ ୧୦ ଦିନ ମଧ୍ୟରେ ବ୍ୟାଙ୍କ ଆକାଉଣ୍ଟକୁ ଟଙ୍କା ଫେରସ୍ତ ଦିଆଯିବ । ଏହି ରିଫଣ୍ଡ ନିୟମ କେବଳ ନିଶ୍ଚିତ(କନଫର୍ମ) ଟିକେଟ ପାଇଁ ପ୍ରଯୁଜ୍ୟ । ଯଦି ଟିକେଟ୍ ୱେଟିଂ ତାଲିକାରେ ଥିବ କିମ୍ୱା ବାତିଲ ହୋଇଥିବ, ସେ କ୍ଷେତ୍ରରେ ଏହି ନିୟମ ପ୍ରଯୁଜ୍ୟ ହେବ ନାହିଁ । ଟ୍ରେନ ବିଳମ୍ୱର କାରଣ ପ୍ରାକୃତିକ ବିପର୍ଯ୍ୟୟ ହୋଇଥିଲେ, ରିଫଣ୍ଡ ମିଳିବ ନାହିଁ ।
ଏସି ଖରାପ ହେବା ବିଷୟରେ ଅଭିଯୋଗ କରିବାକୁ, ଟ୍ରେନର ଟିଟିଇ କିମ୍ୱା କର୍ମଚାରୀଙ୍କଠାରୁ ଏକ ଲିଖିତ ଅଭିଯୋଗ ନେବାକୁ ପଡ଼ିବ । ଯାହାକୁ ପ୍ରମାଣ ସ୍ୱରୂପ ଦେଖାଇବାକୁ ପଡ଼ିବ ବୋଲି ବିଭିନ୍ନ ଜାତୀୟ ଗଣମାଧ୍ୟମରେ ପ୍ରକାଶ ପାଇଛି ।
