କରଞ୍ଜିଆ,୦୬/୧୨: ଶିମିଳିପାଳରେ ଶିକାରୀଙ୍କୁ ପୁଣି ଧରିଲା ଟ୍ରାପ୍ କ୍ୟାମେରା । ଅଭୟାରଣ୍ୟକୁ ପ୍ରବେଶ କରିଥିବା ବେଳେ ୨ ଶିକାରୀଙ୍କୁ ଧରିଲା ବନବିଭାଗ । ୨ ଅଭିଯୁକ୍ତ ଯଶୀପୁର ଥାନା ଅଞ୍ଚଳ କନ୍ଦିବିଲ ଗାଁର ଲକ୍ଷ୍ମଣ ବାଦ୍ରା ଓ ପୂର୍ଣ୍ଣ ତିରିଆ ବୋଲି ଜଣାପଡ଼ିଛି । ମୟୂରଭଞ୍ଜ ଜିଲ୍ଲା ଶିମିଳିପାଳ ଅଭୟାରଣ୍ୟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ୨ ଜଣ ଶିକାରୀ ବନ୍ୟଜନ୍ତୁଙ୍କ ଶିକାର କରିବା ପାଇଁ ଶିମିଳିପାଳ ଅଭୟାରଣ୍ୟ ଭିତରକୁ ପ୍ରବେଶ କରିଥିଲେ । ସେମାନେ ଶିମିଳିପାଳର ଜେନବିଲ ବନ୍ୟପ୍ରାଣୀ ବନାଞ୍ଚଳରେ ଶୀକାର ପାଇଁ ଯାଇଥିବାବେଳେ ଟ୍ରାପ୍ କ୍ୟାମେରାରେ ଏହାର କିଛି ଦୃଶ୍ୟ କଏଦ ହୋଇଥିଲା । କ୍ୟାମେରାରୁ ଫୁଟେଜ ଦେଖି ବନ ବିଭାଗ ଦୁଇ ଶିକାରୀଙ୍କୁ ଧରିବାରେ ସଫଳ ହୋଇଛି । ସେମାନଙ୍କୁ ଗିରଫ କରାଯାଇଥିବା ବେଳେ ଶୁକ୍ରବାର କୋର୍ଟ ଚାଲାଣ କରାଯିବ ବୋଲି ସୂଚନା ମିଳିଛି ।
