ନୂଆଦିଲ୍ଲୀ: ଭାରତ ଓ ଫିଲିପାଇନ୍ସ ମଧ୍ୟରେ ସିଧାସଳଖ ବିମାନ ସେବା ଚଳିତ ବର୍ଷ ଅକ୍ଟୋବର ୧ ତାରିଖରୁ ଆରମ୍ଭ ହେବାକୁ ଯାଉଛି। ଏୟାର ଇଣ୍ଡିଆ ଦିଲ୍ଲୀରୁ ଫିଲିପାଇନ୍ସର ରାଜଧାନୀ ମାନିଲା ପର୍ଯ୍ୟନ୍ତ ସପ୍ତାହରେ ପାଞ୍ଚ ଦିନ (ସୋମବାର, ବୁଧବାର, ଗୁରୁବାର, ଶନିବାର ଓ ରବିବାର) ସିଧାସଳଖ ବିମାନ ଚଳାଚଳ କରିବ। ଏହି ସେବା ଏୟାର ଇଣ୍ଡିଆର ଏୟାରବସ୍ A321neo ବିମାନ ମାଧ୍ୟମରେ ପରିଚାଳିତ ହେବ। ଯେଉଁଥିରେ ବିଜନେସ୍ କ୍ଲାସ, ପ୍ରିମିୟମ ଇକୋନୋମୀ ଓ ଇକୋନୋମୀ କ୍ଲାସରେ ଯାତ୍ରା କରିବାର ସୁବିଧା ରହିଛି।

ଏୟାର ଇଣ୍ଡିଆର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ତଥା ମ୍ୟାନେଜିଂ ଡାଇରେକ୍ଟର କ୍ୟାମ୍ପବେଲ ଉଇଲସନ କହିଛନ୍ତି, “ଦିଲ୍ଲୀ-ମାନିଲା ରୁଟରେ ଏହି ନନ୍-ଷ୍ଟପ୍ ସେବା ଆରମ୍ଭ ହେଉଛି ଆମର ମିଶନର ଏକ ଅଂଶ। ଯାହା ଭାରତକୁ ବିଶ୍ୱର ଅନ୍ୟ ଅଞ୍ଚଳ ସହ ସିଧାସଳଖ ଯୋଡ଼ିବାକୁ ଲକ୍ଷ୍ୟ ରଖିଛି।” ଏହି ନୂଆ ରୁଟ ଦୁଇ ଦେଶ ମଧ୍ୟରେ ପର୍ଯ୍ୟଟନ, ବାଣିଜ୍ୟ ଓ ସାଂସ୍କୃତିକ ଆଦାନପ୍ରଦାନକୁ ପ୍ରୋତ୍ସାହିତ କରିବ।

ଫିଲିପାଇନ୍ସ ସମ୍ପ୍ରତି ଭାରତୀୟ ପର୍ଯ୍ୟଟକଙ୍କ ପାଇଁ ୧୪ ଦିନ ପର୍ଯ୍ୟନ୍ତ ଭିସା-ମୁକ୍ତ ପ୍ରବେଶ ଘୋଷଣା କରିଛି। ଯାହା ଭାରତୀୟ ଯାତ୍ରୀଙ୍କ ପାଇଁ ବୋରାକେରର ଧଳା ବାଲୁକା ବେଳାଭୂମି, ପାଲାୱାନର ମନୋରମ ପ୍ରାକୃତିକ ଦୃଶ୍ୟ ଏବଂ ସେବୁରେ ଐତିହାସିକ ସ୍ଥାନଗୁଡ଼ିକୁ ପରିଦର୍ଶନ କରିବାକୁ ଅଧିକ ସହଜ କରିବ। ଅନ୍ୟପକ୍ଷରେ, ଭାରତ ମଧ୍ୟ ଫିଲିପିନୋ ପର୍ଯ୍ୟଟକଙ୍କ ପାଇଁ ସମାନ ଭିସା-ମୁକ୍ତ ସୁବିଧା ଘୋଷଣା କରିଛି।

୨୦୨୩-୨୪ ଆର୍ଥିକ ବର୍ଷରେ ଭାରତ ଓ ଫିଲିପାଇନ୍ସ ମଧ୍ୟରେ ବାଣିଜ୍ୟ ୩.୫୩ ବିଲିୟନ ଡଲାରରେ ପହଞ୍ଚିଛି। ଯାହା ୨୦୧୫-୧୬ର ୧.୮୯ ବିଲିୟନ ଡଲାରରୁ ପ୍ରାୟ ଦ୍ୱିଗୁଣିତ ହୋଇଛି। ଏହି ସିଧାସଳଖ ବିମାନ ସେବା ଦୁଇ ଦେଶ ମଧ୍ୟରେ ଆର୍ଥିକ ଓ ସାଂସ୍କୃତିକ ସମ୍ପର୍କକୁ ଆହୁରି ମଜବୁତ କରିବ ବୋଲି ଆଶା କରାଯାଉଛି।

ଏୟାର ଇଣ୍ଡିଆ ଏହି ରୁଟରେ ଏକମାତ୍ର ବିମାନ ସେବା ପ୍ରଦାନକରୀ ସଂସ୍ଥା ହେବ। ଯାହା ଭାରତୀୟ ଯାତ୍ରୀଙ୍କୁ ଫିଲିପାଇନ୍ସର ୭,୦୦୦ରୁ ଅଧିକ ଦ୍ୱୀପପୁଞ୍ଜ ଏବଂ ସେହି ଦେଶର ସାଂସ୍କୃତିକ ଓ ଆଧୁନିକ ଆକର୍ଷଣକୁ ଅନୁଭବ କରିବାରେ ସାହାଯ୍ୟ କରିବ।