ନମୌଜା,୧୩|୭(ଆପ୍ର):କେନ୍ଦ୍ରାପଡ଼ା ଜିଲ୍ଲା ଆଳି ଥାନା ଅନ୍ତର୍ଗତ କଟକ-ଚାନ୍ଦବାଲି ମୁଖ୍ୟ ରାସ୍ତା ର ରାଇସରପୁର ପେଟ୍ରୋଲ ପମ୍ପ ଛକ ନିକଟରେ ଏକ ସ୍କୁଟି-ଟ୍ରକ ମଧ୍ୟରେ ମୁହାଁମୁହିଁ ଧକ୍କା ହୋଇଛି। ଏଥିରେ ସ୍କୁଟି ଚାଳକ ଗୁରୁତର ହୋଇଛନ୍ତି। ସ୍କୁଟି ଚାଳକ ଜଣକ ହେଲେ ଆଳି ଥାନା ପତ୍ରପୁର ପଞ୍ଚାୟତ ବିଲିକଣା ଗ୍ରାମ ର ଭଗବାନ ଦାଶ ଙ୍କ ପୁଅ କୈଳାସ(୫୪)।

କୈଳାସ ଦାଶ ଆଳି ସିଙ୍ଗିରିରୁ ତାଙ୍କ ଦୋକାନ ସାମଗ୍ରୀ ନେଇ ନିଜ ଦୋକାନ ଅଭିମୁଖେ ସ୍କୁଟିରେ ଯାଉଥିଲେ। ଏହି ସମୟରେ ଏକ ଟ୍ରକ ତାଙ୍କୁ ଧକ୍କା ଦେଇଥିଲା।  ରାସ୍ତାରେ ରକ୍ତ ଜୁଡୁବୁଡୁ   ଅବସ୍ଥାରେ କୈଳାସ ପଡିଥିଲେ। ଏହି ସମୟରେ ପଟ୍ଟାମୁଣ୍ଡାଇରୁ ଆଳି ଫେରୁଥିବା ସଡ଼କ ବନ୍ଧୁ ସୁଶାନ୍ତ ତରାଇ ପହଞ୍ଚି ସେଠାରେ ତାଙ୍କର ବ୍ୟାଣ୍ଡେଜ କରାଇଥିଲେ l ଶ୍ରୀ ତରାଇ ଦମକଳ ବାହିନୀକୁ ଖବର ଦେଇଥିଲେ।  ଦମକଳ ବାହିନୀ ପହଞ୍ଚି ତାଙ୍କୁ ଆଳି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର କୁ ଆଣିଥିଲେ l ତାଙ୍କୁ ପ୍ରଥମେ ଆଳି ସ୍ୱାସ୍ଥ୍ୟକେନ୍ଦ୍ର ଓ ପରେ ଅଧିକ ଚିକିତ୍ସା ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇ ଦିଆଯାଇଛି l ଦୁର୍ଘଟଣା ସ୍ଥଳରୁ କୈଳାସଙ୍କ ମୋବାଇଲ ଓ ତାଙ୍କ ଟଙ୍କାକୁ ଶ୍ରୀ ତରାଇ ତାଙ୍କ ବାପା ଭଗବାନ ଦାଶଙ୍କୁ ହସ୍ତାନ୍ତର କରିଥିଲେ।