ନୂଆଦିଲ୍ଲୀ,୧୪।୭: ଆମେରିକା ରାଷ୍ଟ୍ରପତି ଡୋନାଲ୍ଡୋ ଟ୍ରମ୍ପ ୟୁକ୍ରେନ୍ ଯୁଦ୍ଧକୁ ରୋକିବା ପାଇଁ କୌଣସି ରାସ୍ତା ବାହାର ନକରିବା ନେଇ ଅସନ୍ତୋଷ ପ୍ରକାଶ କରିଛନ୍ତି। ଟ୍ରମ୍ପ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଉପରେ ଅସନ୍ତୋଷ ପ୍ରକାଶ କରି କହିଛନ୍ତି ଯେ ସେ ଜଣେ ଦୋମୁହାଁ ନୀତି ରଖିଥିବା ବ୍ୟକ୍ତି। ଟ୍ରମ୍ପ କହିଛନ୍ତି, ପୁଟିନ ଦିନରେ ଫୋନରେ ଭଲ ଭାବରେ କଥା ହୁଅନ୍ତି କିନ୍ତୁ ରାତିରେ ୟୁକ୍ରେନ ଉପରେ କ୍ଷେପଣାସ୍ତ୍ର ବର୍ଷା କରନ୍ତି। ଏହି ମନୋଭାବ ୟୁକ୍ରେନରେ ଶାନ୍ତି ଆଣିବ ନାହିଁ। ଟ୍ରମ୍ପ ୟୁକ୍ରେନକୁ ପାଟ୍ରିଅଟ୍ ଏୟାର ଡିଫେନ୍ସ କ୍ଷେପଣାସ୍ତ୍ର ଦେବାକୁ ମଧ୍ୟ ଘୋଷଣା କରିଛନ୍ତି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରବିବାର ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଉପରେ ଅଭିଯୋଗ କରିଛନ୍ତି। ସେ କହିଛନ୍ତି, ପୁଟିନ୍ ଗୋଟିଏ କଥା କହୁଛନ୍ତି ଏବଂ ଅନ୍ୟ କିଛି କରୁଛନ୍ତି। 'ମୁଁ ପୂର୍ବରୁ ଭାବୁଥିଲି ଯେ ପୁଟିନ ଯାହା କୁହନ୍ତି ତାହା କରନ୍ତି କିନ୍ତୁ ଏହା ସେପରି ନୁହେଁ। ସେ ଦିନରେ ବହୁତ ଭଲ ଭାବରେ କଥା ହୁଅନ୍ତି ଏବଂ ରାତିରେ ୟୁକ୍ରେନୀୟ ଲୋକଙ୍କ ଉପରେ ବୋମା ମାଡ଼ କରୁଛନ୍ତି। ଆମେ ଏହା ପସନ୍ଦ କରୁନାହୁଁ।' ଟ୍ରମ୍ପଙ୍କ ଏହି ବୟାନ ଏପରି ସମୟରେ ଆସିଛି ଯେତେବେଳେ ରୁଷ ୟୁକ୍ରେନ ଉପରେ ଆକ୍ରମଣକୁ ଆହୁରି ବଢାଇ ଦେଇଛି।
ନାଟୋ ସହଯୋଗୀଙ୍କୁ କମ୍ ପ୍ରତିରକ୍ଷା ଖର୍ଚ୍ଚ ପାଇଁ ଘେରୁଥିବା ଟ୍ରମ୍ପ କହିଛନ୍ତି, ଏହା ବହୁତ ପୂର୍ବରୁ ହୋଇଯିବା ଦରକାର। ୟୁରୋପକୁ ଆଞ୍ଚଳିକ ସୁରକ୍ଷାର ଅଧିକ ଦାୟିତ୍ବ ନେବା ଦରକାର, ତାକୁ ଆମେରିକା ଉପରେ ପକାଇବା ଉଚିତ ନୁହେଁ। ଟ୍ରମ୍ପ ବାରମ୍ବାର କହୁଛନ୍ତି, ତାଙ୍କର ସହଯୋଗୀ ହତିଆର ଉପରେ ଖର୍ଚ୍ଚ କରିବାକୁ ଚାହାଁନ୍ତି ନାହିଁ। ୟୁରୋପୀୟ ସଂଘ ଏପର୍ଯ୍ୟନ୍ତ ଟ୍ରମ୍ପଙ୍କ ଘୋଷଣା ଉପରେ କୌଣସି ପ୍ରତିକ୍ରିୟା ଦେଇ ନାହିଁ।
