ନୂଆଦିଲ୍ଲୀ,୧୮/୦୩; ୧୯ ଦିନ ପରେ ବି ଥମୁନି ମଧ୍ୟପ୍ରାଚ୍ୟ ଯୁଦ୍ଧ । ଆଜି ବି ଇସ୍ରାଏଲ- ଆମେରିକା ଓ ଇରାନ ମଧ୍ୟରେ ହୋଇଛି ଘମାଘୋଟ ଲଢେଇ । ପରସ୍ପର ଉପରେ ଘନ ଘନ ମିଜାଇଲ ଓ ଡ୍ରୋନ୍ ମାଡ଼ କରିଛନ୍ତି ଉଭୟ ଇରାନ ଓ ଇସ୍ରାଏଲ । ଇସ୍ରାଏଲ ଉପରେ ପୁଣି ମିଜାଇଲ ବର୍ଷା କରିଛି ଇରାନ । ଏହାରି ଭିତରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ଉପରେ ଆକ୍ରମଣ ଜାରି ରହିବ ବୋଲି କହିଛନ୍ତି । ଆକ୍ରମଣକୁ ଅଧିକ ପ୍ରଭାବଶାଳୀ କରାଯିବ । ଇରାନକୁ ପରମାଣୁ ଅସ୍ତ୍ର ହାସଲ କରିବାକୁ ରୋକିବାକୁ ଏହା କରିବା ଜରୁରୀ ବୋଲି କହିଛନ୍ତି ଟ୍ରମ୍ପ ।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇଙ୍ଗିତ କରିଛନ୍ତି କି, ''ଇରାନ ଉପରେ ଆକ୍ରମଣ ଶୀଘ୍ର ଶେଷ ହେବ ନାହିଁ । କ୍ଷତି ଅଧିକ ପ୍ରଭାବଶାଳୀ ହେବା ଉଚିତ୍ ଯାହା ଦ୍ୱାରା ଭବିଷ୍ୟତରେ କୌଣସି ରାଷ୍ଟ୍ରପତିଙ୍କୁ ପୁଣି ଥରେ ଏପରି ବିପଦର ସମ୍ମୁଖୀନ ହେବାକୁ ନପଡେ । ହୋଇଥିବା କ୍ଷତିକୁ ମରାମତି କରିବାକୁ ୧୦ ବର୍ଷ ଲାଗିବ । କିନ୍ତୁ ମୁଁ ଭାବୁଛି ଆମକୁ ଏହାକୁ ଟିକେ ଅଧିକ ପ୍ରଭାବଶାଳୀ କରିବାକୁ ପଡ଼ିବ ଯାହାଦ୍ୱାରା ଅନ୍ୟ କୌଣସି ରାଷ୍ଟ୍ରପତିଙ୍କୁ ଏହି ପରିସ୍ଥିତି ଦେଇ ଗତି କରିବାକୁ ପଡିବ ନାହିଁ । ଯଦି ଆମେରିକା ସାମରିକ କାର୍ଯ୍ୟାନୁଷ୍ଠାନ ନେଇ ନଥାନ୍ତା ତେବେ ଇରାନ ପରମାଣୁ କ୍ଷମତା ହାସଲ କରିସାରିଥାନ୍ତା । ସେମାନେ କେବଳ ୨ ସପ୍ତାହ ଦୂରରେ ଥିଲେ । ସେମାନେ ଏହାର ପ୍ରୟୋଗ କରିବାକୁ ପ୍ରସ୍ତୁତ ଥିଲେ । ଆଉ କିଛି ସପ୍ତାହର କଥା । ଏ ଯୁଦ୍ଧ ଆଉ ଲମ୍ବା ଚାଲିବ ନାହିଁ ।''
ଏହା ବି ପଢନ୍ତୁ...ଇରାନକୁ ବଡ଼ ଝଟକା; ସତ ହେଲା ଇସ୍ରାଏଲ ଦାବି, ଇରାନର ସର୍ବୋଚ୍ଚ ସୁରକ୍ଷା ମୁଖ୍ୟ ଲାରିଜାନି ନିହତ
ହ୍ୱାଇଟ୍ ହାଉସରେ ଭାଷଣ ଦେଇ ଟ୍ରମ୍ପ ଯୁକ୍ତି ଦେଇଛନ୍ତି ଯେ, ଏହାର ଲକ୍ଷ୍ୟ ହେଉଛି ଇରାନ ଯେପରି ଆଉ କେବେ ପରମାଣୁ ବିପଦରେ ପରିଣତ ନହୁଏ ତାହା ନିଶ୍ଚିତ କରିବା । ଆମେ ଆଉ କେବେ ଏପରି ସମସ୍ୟା ଚାହୁଁନାହୁଁ । ବିଶେଷ କରି ପାଗଳମାନଙ୍କ ସହିତ ନୁହେଁ । ଆମେ ପାଗଳମାନଙ୍କ ହାତରେ ପରମାଣୁ ଅସ୍ତ୍ର ରଖିବାକୁ ଦେଇପାରିବୁ ନାହିଁ । ଯୁଦ୍ଧର ପ୍ରୟାସ ଭଲ ଭାବେ ଅଗ୍ରଗତି କରୁଛି । ଆମେରିକା ଏବଂ ଏହାର ସହଯୋଗୀଙ୍କ ଆକ୍ରମଣ ଇରାନର କ୍ଷମତାକୁ ଯଥେଷ୍ଟ ଦୁର୍ବଳ କରି ଦେଇଛି । ଆମେ ଏକ ମହାନ କାମ କରୁଛୁ । ଇରାନକୁ କେବେବି ପରମାଣୁ ଅସ୍ତ୍ର ବିକଶିତ କରିବାକୁ ଅନୁମତି ଦିଆଯିବା ଉଚିତ୍ ନୁହେଁ । ଯୁଦ୍ଧ ୱାସିଂଟନ ସପକ୍ଷରେ । ସାମ୍ପ୍ରତିକ ଆକ୍ରମଣ ଏପରି ଫଳାଫଳ ଆଣିଛି ଯାହାକୁ କେହି ଭାବି ନଥିଲେ ।
ନାଟୋରୁ ସମର୍ଥନ ପାଇଲି ନାହିଁ... ପୂର୍ବରୁ ଟ୍ରମ୍ପ ସାମ୍ପ୍ରତିକ ଆକ୍ରମଣ ପରେ ଇରାନର ନେତ଼ୃତ୍ୱକୁ ନେଇ ଅନିଶ୍ଚିତତାକୁ ସ୍ୱୀକାର କରିଥିଲେ । ଅନେକ ବରିଷ୍ଠ ଇରାନୀ ଅଧିକାରୀଙ୍କ ହତ୍ୟା ସମ୍ପର୍କରେ ଉଲ୍ଲେଖ କରି ସେ କହିଥିଲେ, ଆମେ କାହା ସହିତ କଥା ହେବା ଜାଣିନାହୁଁ । ରାଷ୍ଟ୍ରପତି ଏହି ସୁଯୋଗକୁ ନାଟୋ ସହଯୋଗୀଙ୍କୁ ସମାଲୋଚନା କରିବା ପାଇଁ ମଧ୍ୟ ବ୍ୟବହାର କରିଥିଲେ ଯେଉଁମାନେ ହୋର୍ମୁଜକୁ ସୁରକ୍ଷିତ ରଖିବା ପାଇଁ ଆମେରିକାର ଅନୁରୋଧକୁ ପ୍ରତ୍ୟାଖାନ କରିଥିଲେ ।
