ନୂଆଦିଲ୍ଲୀ,୨୮/୦୬: ଇରାନ ଉପରେ ଲାଗୁ ହୋଇଥିବା କଠୋର ତେଲ କଟକଣା କୋହଳ ହୋଇପାରେ । ବୁଧବାର ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଥିଲେ, ଇରାନ ଉପରେ ଅତିରିକ୍ତ ଚାପ ଦିଆଯିବନି । ଏହା ମଧ୍ୟରେ ତେଲ ବିକ୍ରି କଟକଣା ସାମିଲ ରହିଛି । ତେବେ ଏହି ଦେଶର ଅର୍ଥନୀତି ଯେଭଳି ପୁଣି ଥରେ ଚଳଚଞ୍ଚଳ ହେବ ତାକୁ ଧ୍ୟାନରେ ରଖି କଟକଣା କିଛିଟା କୋହଳ ହୋଇପାରେ । ଅର୍ଥନୀତିକୁ ସୁଧାରିବା ଲାଗି ସେମାନେ ଅର୍ଥ ଆବଶ୍ୟକ କରୁଛନ୍ତି । ଆମେ ସେଥିରେ କିଛି ପ୍ରତିବନ୍ଧକ ସୃଷ୍ଟି କରିବୁନି । ଯୁଦ୍ଧ ବିରତି ନେଇ ଇରାନ ରାଜି ହେବା ପରେ ଚୀନ ଏହି ଦେଶରୁ ତେଲ କିଣି ସହାୟତା କରିପାରିବ ବୋଲି ମଧ୍ୟ ଦିନକ ଆଗରୁ କହିଥିଲେ ଟ୍ରମ୍ପ । ତେବେ ଏହା ପରେ ହ୍ୱାଇଟ ହାଉସ ପକ୍ଷରୁ ଏହାକୁ ନେଇ ସ୍ପଷ୍ଟୀକରଣ ଦିଆଯାଇଥିଲା । ଏହାର ଅର୍ଥ ଇରାନ ଉପରୁ ସମ୍ପୂର୍ଣ୍ଣ ଭାବେ କଟକଣା ହଟିବା ନୁହେଁ ବୋଲି କହିଥିଲା ହ୍ୱାଇଟ ହାଉସ । ତେବେ ଏଭଳି ସ୍ଥିତିରେ ୨୦୨୩ ମାର୍ଚ୍ଚ ପରଠୁ ତେଲ ଦର ସପ୍ତାହର ସର୍ବାଧିକ ହ୍ରାସ ହୋଇଛି ।
ଇରାନ-ଇସ୍ରାଏଲ ଯୁଦ୍ଧ ବନ୍ଦ ହେବା ଯୋଗୁ ତେଲ ଯୋଗାଣ ବାଧାପ୍ରାପ୍ତ ହେବା ନେଇ ରହିଥିବା ସମସ୍ୟା ଟଳିଛି । ଉଭୟ ବ୍ରେଣ୍ଟ ଏବଂ ଡବ୍ଲୁଟିଆ ବର୍ଗରେ ଅଶୋଧିତ ତେଲ ୧୨% ହ୍ରାସ ହୋଇଛି । ବ୍ୟାରେଲ ପିଛା ବ୍ରେଣ୍ଟ ୬୮.୦୯ ଡଲାର ଏବଂ ଡବ୍ଲ୍ୟୁଟିଆଇ ୬୫.୫୭ ଡଲାର ସ୍ତରରେ ରହିଛି । ଜୁନ ୧୩ରେ ଇସ୍ରାଏଲ ଇରାନର ସାମରିକ ଏବଂ ଆଣବିକ କେନ୍ଦ୍ର ଗୁଡ଼ିକ ଉପରେ ଆକ୍ରମଣ କରିଥିଲା । ଏହା ପରେ ଆମେରିକା ଇରାନର ଆଣବିକ ଫାସିଲିଟି ଉପରେ ଆକ୍ରମଣ କରିବା ପରେ ଅଶୋଧିତ ତେଲ ରେକର୍ଡ ବୃଦ୍ଧି ହୋଇଥିଲା । ମାତ୍ର ତେବେ ଯୁଦ୍ଧ ସ୍ଥିତି ଟଳିବା ଯୋଗୁ ଏବେ ତେଲ ପୂର୍ବ ସ୍ଥିତିକୁ ଫେରିଛି । ଏପଟେ ଜୁନ ମାସରେ ଇରାନରୁ ଚୀନର ତେଲ କିଣା ରେକର୍ଡ ଛୁଇଁଛି ।
