ନୂଆଦିଲ୍ଲୀ: କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଦରମୈୟାଙ୍କ ଉପରେ ବର୍ଷିଛନ୍ତି। କର୍ଣ୍ଣାଟକର କଂଗ୍ରେସ ସରକାର ଲୋକଙ୍କ ସ୍ୱରକୁ ଦମନ କରୁଥିବା ନେଇ ସେ ଅଭିଯୋଗ କରିନ୍ତି। କେନ୍ଦ୍ରମନ୍ତ୍ରୀ କହିଛନ୍ତି ଯେ, କଂଗ୍ରେସ ସରକାର ଏକଛତ୍ରବାଦୀ ଶାସକ ଠାରୁ ଖରାପ କାମ କରୁଛି । ସେପଟେ କର୍ଣ୍ଣାଟକର କଂଗ୍ରେସ ସରକାର ରାଜ୍ୟ ବିଜେପି ବିରୋଧରେ ମାନହାନୀ ମାମଲା ଦାୟର କରିଛି । କର୍ଣ୍ଣାଟକ ସରକାର ଅଭିଯୋଗ କରିଛନ୍ତି ଯେ, ବିଜେପି ରାଜ୍ୟ ସରକାରଙ୍କ ଦୁଇ ବର୍ଷର ବିଫଳତା ଉପରେ ଅଭିଯୋଗ ପତ୍ର ଶୀର୍ଷକ ଏକ ପ୍ରଚାର ଚଳାଇ ମିଥ୍ୟା କହୁଛି । ସରକାରଙ୍କ ଏହି ପଦକ୍ଷେପକୁ କର୍ଣ୍ଣାଟକରେ ଜରୁରୀକାଳୀନ ପରିସ୍ଥିତିର ଦ୍ୱିତୀୟ ଅଧ୍ୟାୟର ଆରମ୍ଭ ବୋଲି କହିଛି ବିଜେପି ।
ଏକ୍ସରେ ଏକ ପୋଷ୍ଟ କରି ପ୍ରହ୍ଲାଦ ଯୋଶୀ ଦାବି କରିଛନ୍ତି ଯେ, କଂଗ୍ରେସ ସରକାର ନ୍ୟୁଜ୍ ଚ୍ୟାନେଲ ଆଙ୍କରମାନଙ୍କୁ ଭୟଭୀତ କରିବାକୁ ଚେଷ୍ଟା କରୁଛି । ସେ ଶାସକ କଂଗ୍ରେସକୁ ପ୍ରଶ୍ନ କରିଛନ୍ତି ଯେ, କାହିଁକି ସେମାନେ ନିଜର ବିଫଳତା, ଦୁର୍ନୀତି ଏବଂ କର୍ଣ୍ଣାଟକର ଅର୍ଥନୀତି ଏବଂ ରାଜନୀତିରେ କରିଥିବା କ୍ଷତି ବିଷୟରେ କଥା ହେବାକୁ ଭୟ କରୁଛନ୍ତି ? କ’ଣ କର୍ଣ୍ଣାଟକ ହିଟଲରଙ୍କ ସମୟ ପରି ଏକ ଏକଛତ୍ରବାଦୀ ଶାସନରେ ପରିଣତ ହୋଇଛି ? ସେ ଅଭିଯୋଗ କରିଛନ୍ତି ଯେ, ସମ୍ବିଧାନ ଏବଂ ଡକ୍ଟର ବାବାସାହେବ ଆମ୍ବେଦକରଙ୍କ ଚିନ୍ତାଧାରା ପାଳନ କରୁଥିବା ଦାବି କରୁଥିବା କଂଗ୍ରେସ ସରକାର ଯେକୌଣସି ଏକଛତ୍ରବାଦୀ ଶାସକଙ୍କ ଅପେକ୍ଷା ମଧ୍ୟ ଖରାପ କାମ କରୁଛି ।
ସିଦ୍ଦରମୈୟା, ଲୋକଙ୍କ ସ୍ୱରକୁ ଦମନ କରିବା କ'ଣ ସମ୍ବିଧାନର ଏକ ଅଂଶ ବୋଲି ପ୍ରହ୍ଲାଦ ଯୋଶୀ ପ୍ରଶ୍ନ କରିଛନ୍ତି । ସିଦ୍ଦରମୈୟା ଏବଂ ଡିକେ ଶିବକୁମାର ସମାଲୋଚନାକୁ ଏତେ ଭୟ କାହିଁକି କରୁଛନ୍ତି ? କ୍ଷମତାରେ ରଖିବାକୁ ସିଦ୍ଦରମୈୟା ଚେଷ୍ଟା କରୁଛନ୍ତି । ଆମେ ଆପଣଙ୍କ ଅସହାୟତା ଦେଖିପାରୁଛୁ । କିନ୍ତୁ କର୍ଣ୍ଣାଟକ କେବେବି ଏହି ଏକଛତ୍ରବାଦୀ ମନୋଭାବ କିମ୍ବା ମୋଗଲ ଶୈଳୀର ଶାସନକୁ ଗ୍ରହଣ କରିବ ନାହିଁ ବୋଲି କହିଛନ୍ତି ପ୍ରହ୍ଲାଦ ଯୋଶୀ । ରାଜ୍ୟ ବିଜେପି ସଭାପତି ବିୱାଇ ବିଜୟେନ୍ଦ୍ର କହିଛନ୍ତି ଯେ, ତାଙ୍କ ଦଳ ଏପରି ଚାଲ୍ ଉପରେ ଚୁପ୍ ରହିବ ନାହିଁ । ସେ ଏକ୍ସ ରେ ଲେଖିଛନ୍ତି ଯେ, ଯଦି ଆପଣ ଭାବୁଛନ୍ତି ପୋଲିସ ଏବଂ ଆଇନର ଭୟ ଦେଖାଇ ବିରୋଧୀକୁ ଚୁପ୍ କରିପାରିବ, ତେବେ ଏହା ଆପଣଙ୍କର ମୂର୍ଖତା। କର୍ଣ୍ଣାଟକରେ ଜରୁରୀକାଳୀନ ପରିସ୍ଥିତିର ଦ୍ୱିତୀୟ ଅଧ୍ୟାୟ ଆରମ୍ଭ ହୋଇଛି । କର୍ଣ୍ଣାଟକର କଂଗ୍ରେସ ସରକାର ଖୁବଶୀଘ୍ର ଅନୁଭବ କରିବ ଯେ, ଏହାକୁ ଗଣତନ୍ତ୍ର, କର୍ଣ୍ଣାଟକର ଜନତା, ବିରୋଧୀ ଦଳ ଏବଂ ଗଣମାଧ୍ୟମର ଓଲଟାଇ ଦେବାର ଶକ୍ତି ଅଛି ।
