କୋଣାର୍କ,୧୫/୦୮: କୋଣାର୍କ ହେଲିପ୍ୟାଡ ନିକଟ ସୁରକ୍ଷା ଜଙ୍ଗଲ ଭିତରୁ ଏକ ଅଚିହ୍ନା ମୃତଦେହ ଉଦ୍ଧାର ହୋଇଛି । ଏନେଇ କୋଣାର୍କ ଥାନାରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି । ମୃତଦେହକୁ ବ୍ୟବଚ୍ଛେଦ ପାଇଁ ଚାରିଛକ ହସ୍ପିଟାଲ ପଠାଯିବ ବୋଲି ଜଣାପଡ଼ିଛି ।
ସୂଚନା ମୁତାବକ, ଶୁକ୍ରବାର ହେଲିପ୍ୟାଡ ନିକଟ ଜଙ୍ଗଲରେ ଗୋଟିଏ ଗଛରେ ଅଚିହ୍ନା ଲୋକ ଆତ୍ମହତ୍ୟା କରିଥିବା ଖବର ପ୍ରଚାରିତ ହୋଇଥିଲା । ଏସମ୍ପର୍କରେ ଖବର ପାଇ ଘଟଣା ସ୍ଥଳରେ କୋଣାର୍କ ପୁଲିସ ପହଞ୍ଚି ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଥିଲା । ଲୋକଟି ଜିନ୍ସ ପ୍ୟାଣ୍ଟ ଓ ଫୁଲ ସାଟ ପିନ୍ଧିଥିବା ଦେଖିବାକୁ ମିଳିଛି । କୋଣାର୍କ ଥାନାରେ ଏକ ଅପମୃତ୍ୟୁ ମାମଲା ରୁଜୁ କରାଯାଇ ମୃତଦେହକୁ ବ୍ୟବଚ୍ଛେଦ ନିମନ୍ତେ ଚାରିଛକ ହସ୍ପିଟାଲ ପଠାଯିବ ବୋଲି ପୁଲିସ ସୂଚନା ଦେଇଛି।
