ଭବାନୀପାଟଣା,୨୦/୫: ମଙ୍ଗଳବାର କଳାହାଣ୍ଡି ଭବାନୀପାଟଣା ଠାରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଜଣେ ବ୍ୟକ୍ତିଙ୍କୁ ଧକ୍କା ଦେଇ ଫେରାର ମାରିଲା ଅଜଣା ଟ୍ରକ୍। ସିସିଟିଭି କ୍ୟାମେରାରେ ଛାତିଥରା ଦୃଶ୍ୟ କଏଦ ହୋଇଛି । ସ୍ଥାନୀୟ ପୁଲିସ ମାମଲା ରୁଜୁ କରି ତଦନ୍ତ କରୁଛି ।
ସୂଚନା ମୁତାବକ, ଆଜି ଭୋଟ ପ୍ରାୟ ସାଢ଼େ ୪ଟା ସମୟରେ ଭବାନୀପାଟଣା ବିମଳା କନଭେଣ୍ଟ ଛକ ନିକଟ ବିଏନ୍ ମେଡିକାଲ ଷ୍ଟୋର ସାମ୍ନାରେ ସ୍ଥାନୀୟ ଇରିଗେସନ କୋଲୋନୀର ଶତ୍ରୁଘ୍ନ ଶତନାମୀ ନାମକ ବ୍ୟକ୍ତିଙ୍କୁ ଏକ ଅଜଣା ଟ୍ରକ୍ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ଶତ୍ରୁଘ୍ନଙ୍କ ମୃତ୍ୟୁ ଘଟିଥିଲା।
ଦୁର୍ଘଟଣା ଘଟାଇବା ପରେ ଟ୍ରକ୍ ଡ୍ରାଇଭର ଫେରାର ହୋଇଯାଇଥିଲେ। ଖବର ପାଇ ଦୁର୍ଘଟଣାସ୍ଥଳରେ ଟାଉନ୍ଥାନା ପୁଲିସ ପହଞ୍ଚି ମୃତଦେହ ଜବତ କରିଥିଲା। ପରେ ମୃତଦେହକୁ ବ୍ୟବଚ୍ଛେଦ ପାଇଁ ଭବାନୀପାଟଣା ମୁଖ୍ୟ ଚିିକିତ୍ସାଳୟ ପଠାଇଥିଲା। ଶବ ବ୍ୟବଚ୍ଛେଦ ପରେ ମରଶରୀର ପରିବାରକୁ ହସ୍ତାନ୍ତର କରାଯାଇଛି। ଏସଂକ୍ରାନ୍ତରେ ଟାଉନଥାନାରେ ଏକ ମାମଲା ରୁଜୁ ହୋଇଛି । ଅଧିକ ତଦନ୍ତ ଜାରି ରହିଥିବା ଥାନା ଅଧିକାରୀ ଯଶୋବନ୍ତ ହିଆଲ ସୂଚନା ଦେଇଛନ୍ତି ।
