ଭୁବନେଶ୍ୱର, ୨୪ ।୮: ଜାଲ୍ ପାସ୍ପୋର୍ଟରେ ଭୁବନେଶ୍ୱରରୁ ଥାଇଲାଣ୍ଡ ଯାତ୍ରା କରୁଥିବା ଜଣେ ଯୁବକଙ୍କୁ ଗିରଫ କରିଛି ଏୟାରପୋର୍ଟ ଥାନା ପୁଲିସ୍ । ଗିରଫ ଅଭିଯୁକ୍ତ ଜଣଙ୍କ ହେଲେ ଉତ୍ତରପ୍ରଦେଶର ବିନୋଦ ଚୌଧୁରୀ । ତାଙ୍କଠାରୁ ଗୋଟିଏ ମୋବାଇଲ ଓ କିଛି ନକଲି କାଗଜପତ୍ର ଜବତ କରିଛି ପୁଲିସ୍ । ଶୁକ୍ରବାର ରାତି ପ୍ରାୟ ସାଢ଼େ ୯ଟା ବେଳେ ବିନୋଦ ଚୌଧୁରୀ ଭୁବନେଶ୍ୱର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦରରେ ପହଞ୍ଚିଥିଲେ । ହାତରେ ଧରିଥିଲେ ଥାଇଲାଣ୍ଡର ଟିକଟ । ଇମିଗ୍ରେସନ ବିଭାଗର ଯାଞ୍ଚ ସମୟରେ ଅଭିଯୁକ୍ତଙ୍କ ନିକଟରେ ଏକାଧିକ ଜାଲ ପାସପୋର୍ଟ ଥିବା ଦେଖିବାକୁ ମିଳିଥିଲା । ସେହିଠାରେ କାର୍ଯ୍ୟ କରୁଥିବା ସବ-ଇନ୍ସପେକ୍ଟର ତାଙ୍କୁ ଧରି ଏୟାରପୋର୍ଟ ଥାନାକୁ ନେଇଥିଲେ । ପୁଲିସ୍ ତାକୁ ଜେରା କରିବା ପରେ ଜଣାପଡିଥିଲା ବିନୋଦଙ୍କ ପାଖରେ ଥିବା ସବୁ କାଗଜପତ୍ର ଓ ପାସ୍ପୋର୍ଟ ନକଲି । ପଚରାଉଚରା ବେଳେ ଅଭିଯୁକ୍ତ ମନ୍ଦ ଉଦ୍ଦେଶ୍ୟ ରଖି ଏହିଭଳି ଜାଲ ପାସପୋର୍ଟ ନିଜ ପାଖରେ ରଖିଥିବା ସ୍ୱୀକାର କରିଥିଲେ । ବିନୋଦଙ୍କ ନାମରେ ପୂର୍ବରୁ ଉତ୍ତରପ୍ରଦେଶ ଗୋରଖପୁର ଜିଲ୍ଲାର ଗୋଲା ଥାନାରେ ଏକ ମାମଲା ରହିଥିବା ଜଣାପଡ଼ିଛି ।
