ନୂଆଦିଲ୍ଲୀ: ହର୍ମୁଜ୍ ପ୍ରଣାଳୀକୁ ନେଇ ଇରାନ ଏବଂ ଆମେରିକା ମଧ୍ୟରେ ଉତ୍ତେଜନା ଜାରି ରହିଥିବା ବେଳେ, ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ପାନାମା କେନାଲ ବିଷୟରେ ମନେ ପକାଇ ଦେିଛନ୍ତି। ସେ କହିଛନ୍ତି ଯେ, ଆମେରିକା କେବେବି କେନାଲର ନିୟନ୍ତ୍ରଣ ପାନାମାକୁ ହସ୍ତାନ୍ତର କରିବା ଉଚିତ୍ ନୁହେଁ। ସେ ଅଭିଯୋଗ କରିଛନ୍ତି ଯେ, ପାନାମା କେନାଲରେ ପରିବହନ ଶୁଳ୍କ ଅତ୍ୟଧିକ ବୃଦ୍ଧି କରିଛି। ଟ୍ରମ୍ପ ପାନାମା କେନାଲ ଉପରେ ଚୀନକୁ ମଧ୍ୟ ସମାଲୋଚନା କରି କହିଛନ୍ତି ଯେ ସେ କେବେବି ବେଜିଂକୁ ଏହି ଗୁରୁତ୍ୱପୂର୍ଣ୍ଣ ଜଳପଥ ଉପରେ ପ୍ରଭାବ ପକାଇବାକୁ ଦେବେ ନାହିଁ।
ରାଷ୍ଟ୍ରପତି ଥିଓଡୋର ରୁଜଭେଲ୍ଟ ପ୍ରେସିଡେନ୍ସିଆଲ ଲାଇବ୍ରେରୀ ଉଦଘାଟନ କରିବା ପାଇଁ ବୁଧବାର ମେଡୋରାରେ ଥିଲେ। ଗସ୍ତ ସମୟରେ, ସେ ପାନାମାକୁ କେନାଲ ହସ୍ତାନ୍ତରକୁ ସମାଲୋଚନା କରିଥିଲେ ଏବଂ କହିଥିଲେ ଯେ ଆମେରିକା ଏହାକୁ ନିୟନ୍ତ୍ରଣ କରିବା ପାଇଁ ଚୀନର ଯେକୌଣସି ପ୍ରୟାସକୁ ଦୃଢ଼ ବିରୋଧ କରିବ।
'ପାନାମା ବହୁତ ଟଙ୍କା ରୋଜଗାର କରିଛି'
ଟ୍ରମ୍ଫ କହିଥିଲେ କି,"ଆମେ ପାନାମା କେନାଲକୁ ପାନାମାକୁ ହସ୍ତାନ୍ତର କରିଥିଲୁ। ପ୍ରଥମେ, ସେମାନେ ଜାହାଜର ମୂଲ୍ୟ ଚାରିଗୁଣ ବୃଦ୍ଧି କରିଥିଲେ। ଏହି ସମୟ ମଧ୍ୟରେ, ସେମାନେ ଗୋଟିଏ ବି ଜାହାଜ ହରାଇ ନଥିଲେ। ତା'ପରେ ସେମାନେ ଆଉ ଦୁଇଗୁଣ ମୂଲ୍ୟ ବୃଦ୍ଧି କରିଥିଲେ, ଏବଂ ସେମାନେ ଗୋଟିଏ ବି ଜାହାଜ ହରାଇ ନଥିଲେ। ପାନାମା ବର୍ଷ ବର୍ଷ ଧରି ଏଥିରୁ ବହୁତ ଟଙ୍କା ରୋଜଗାର କରିଥିଲା। ଆମ ପକ୍ଷରୁ ଏହା ଏକ ମୂର୍ଖତାପୂର୍ଣ୍ଣ କାର୍ଯ୍ୟ।"
ଚୀନକୁ ପାନାମା କେନାଲ ଦଖଲ କରିବାକୁ ଦେବି ନାହିଁ : ଟ୍ରମ୍ପ
ଟ୍ରମ୍ଫ କହିଥିଲେ ଯେ ଚୀନ୍ ପାନାମା କେନାଲ ଦଖଲ କରିବାକୁ ଚେଷ୍ଟା କରୁଛି। "କିନ୍ତୁ ଆମେ ତାହା ହେବାକୁ ଦେବୁ ନାହିଁ।" ଟ୍ରମ୍ପ୍ ୧୯୭୭ ଟୋରିଜୋସ୍-କାର୍ଟର ଚୁକ୍ତିନାମାକୁ ଉଲ୍ଲେଖ କରୁଥିଲେ, ଯାହା ଅଧୀନରେ ଆମେରିକା ପାନାମା କେନାଲର ନିୟନ୍ତ୍ରଣ ହସ୍ତାନ୍ତର କରିବାକୁ ରାଜି ହୋଇଥିଲା। ପରବର୍ତ୍ତୀ ସମୟରେ, ଆମେରିକା ୧୯୯୯ ମସିହାରେ ପାନାମାକୁ ୧୯୧୪ରେ ନିର୍ମିତ କେନାଲ ହସ୍ତାନ୍ତର କରିଥିଲା। ଏହା ଉଲ୍ଲେଖନୀୟ ଯେ ସେ ପୂର୍ବରୁ ପାନାମା କେନାଲ ପ୍ରତି ନିଜର ଅସନ୍ତୋଷ ପ୍ରକାଶ କରିଛନ୍ତି।
ପାନାମା କେନାଲ ଏତେ ଗୁରୁତ୍ୱପୂର୍ଣ୍ଣ କାହିଁକି ?
ପାନାମା କେନାଲକୁ ବିଶ୍ୱର ସବୁଠାରୁ ବ୍ୟସ୍ତ ଏବଂ ରଣନୈତିକ ଭାବରେ ଗୁରୁତ୍ୱପୂର୍ଣ୍ଣ ଜାହାଜ ପରିବହନ ମାର୍ଗ ମଧ୍ୟରୁ ଗୋଟିଏ ବୋଲି ବିବେଚନା କରାଯାଏ। ପ୍ରତିବର୍ଷ ବିଶ୍ୱ ବାଣିଜ୍ୟର ପ୍ରାୟ ୫ ପ୍ରତିଶତ ଏହି କେନାଲ ଦେଇ ଗତି କରେ, ପ୍ରାୟ ୨୭୦ ବିଲିୟନ ଡଲାର ମୂଲ୍ୟର ସାମଗ୍ରୀ ପରିବହନ କରେ। ଏହା ପ୍ରାୟ ୪୦ ପ୍ରତିଶତ ଆମେରିକୀୟ କଣ୍ଟେନର ଟ୍ରାଫିକ ପରିଚାଳନା କରେ।
ପାନାମା କେନାଲ ପ୍ରାୟ ୮୨ କିଲୋମିଟର ଲମ୍ବିତ। ଏହା ଆଟଲାଣ୍ଟିକ ପାର୍ଶ୍ୱରେ କାରିବିଆନ ସାଗରକୁ ପ୍ରଶାନ୍ତ ମହାସାଗର ସହିତ ସଂଯୋଗ କରେ। ଏହା କୋଲନରୁ ଆରମ୍ଭ ହୋଇ ଗାଟୁନ୍ ହ୍ରଦ ଏବଂ ଗେଲର୍ଡ କଟ୍ ଦେଇ ପାନାମା ସିଟିରେ ପହଞ୍ଚିଥାଏ। କେନାଲ ନିର୍ମାଣ ହେବା ପୂର୍ବରୁ, ଆଟଲାଣ୍ଟିକ ଏବଂ ପ୍ରଶାନ୍ତ ମହାସାଗର ମଧ୍ୟରେ ଯାତ୍ରା କରୁଥିବା ଜାହାଜ ଗୁଡ଼ିକୁ ମାଗେଲାନ୍ ପ୍ରଣାଳୀ କିମ୍ବା କେପ୍ ହର୍ନ ଦେଇ ଦକ୍ଷିଣ ଆମେରିକାରେ ଯିବାକୁ ପଡୁଥିଲା। ଏହା ଯାତ୍ରା ଦୂରତା ଏବଂ ସମୟ ଉଭୟକୁ ବୃଦ୍ଧି କରିଥିଲା। କେନାଲ ନିର୍ମାଣ ଦ୍ୱାରା ନ୍ୟୁୟର୍କ ଏବଂ ସାନ ଫ୍ରାନ୍ସିସ୍କୋ ମଧ୍ୟରେ ଦୂରତା ପ୍ରାୟ ୮ ହଜାର ମାଇଲ ହ୍ରାସ ପାଇଥିଲା ।
