ନୂଆଦିଲ୍ଲୀ,୦୧/୦୩; ଇରାନ ଏବଂ ଇସ୍ରାଏଲ-ଆମେରିକା ମଧ୍ୟରେ ଯୁଦ୍ଧ ଆରମ୍ଭ ହୋଇଛି । ଏହାର ପ୍ରଭାବ ଅନେକ ଉପସାଗରୀୟ ଦେଶ ପର୍ଯ୍ୟନ୍ତ ପହଞ୍ଚିଛି । ନିରନ୍ତର କ୍ଷେପଣାସ୍ତ୍ର ଏବଂ ବୋମା ବିସ୍ଫୋରଣ ଯୋଗୁଁ, ଇରାନ, ଇସ୍ରାଏଲ ଏବଂ ପଡ଼ୋଶୀ ଦେଶଗୁଡ଼ିକରେ ବିମାନ ଚଳାଚଳ ସମ୍ପୂର୍ଣ୍ଣ ଭାବରେ ବନ୍ଦ ହୋଇଯାଇଛି । ଯାହା ଫଳରେ ଅନେକ ଲୋକ ବିଭିନ୍ନ ବିମାନବନ୍ଦରରେ ଫସି ରହିଛନ୍ତି । ୟୁଏଇରେ, ଦୁବାଇ ଅନ୍ତର୍ଜାତୀୟ ବିମାନବନ୍ଦର ସବୁଠାରୁ ଅଧିକ ପ୍ରଭାବିତ ହୋଇଛି, ବନ୍ଦ ଥିବାରୁ ହଜାର ହଜାର ଲୋକ ଫସି ରହିଛନ୍ତି । ସେମାନଙ୍କ ମଧ୍ୟରେ ଭାରତର କିମ୍ବଦନ୍ତୀ ବ୍ୟାଡମିଣ୍ଟନ ଖେଳାଳି ପିଭି ସିନ୍ଧୁ ଅଛନ୍ତି । ଯିଏ ଏକ ଟୁର୍ଣ୍ଣାମେଣ୍ଟ ପାଇଁ ବ୍ରିଟେନ ଯାତ୍ରା କରୁଥିଲେ କିନ୍ତୁ ସେଠାରେ ପହଞ୍ଚିବା ପୂର୍ବରୁ ଦୁବାଇରେ ଫସିଛନ୍ତି । ଖାଲି ପିଭି ସିନ୍ଧୁ ନୁହଁନ୍ତି ବଲିଉଡ ଅଭିନେତ୍ରୀ ସୋନଲ ଚୌହାନ ମଧ୍ୟ ଫସିଥିବା ଜଣାପଡିଛି ।

​​​​​​​ଦୁବାଇ ବିମାନବନ୍ଦରରେ ଫସିଛନ୍ତି ସିନ୍ଧୁ- ସପ୍ତାହ ଧରି ଧମକ ଏବଂ ଛକାପଞ୍ଝା ଭିତରେ ଇସ୍ରାଏଲ ଏବଂ ଆମେରିକା ଗତକାଲି  (ଶନିବାର) ଫେବୃଆରୀ ୨୮ ତାରିଖରେ  ଇରାନ ଉପର ଆକ୍ରମଣ କରିଥିଲା । ଜବାବୀ ଆକ୍ରମଣ କରି ଇରାନ ଇସ୍ରାଏଲ ଉପରେ କ୍ଷେପଣାସ୍ତ୍ର ନିକ୍ଷେପ କରି ପ୍ରତିଶୋଧ ନେଇଥିଲା । ଇରାନ ୟୁଏଇ ସମେତ ଆମେରିକାର ସାମରିକ ଘାଟି ଥିବା ଦେଶଗୁଡ଼ିକୁ ମଧ୍ୟ ଟାର୍ଗେଟ କରିଥିଲା ।   ଦୁବାଇ ଅନ୍ତର୍ଜାତୀୟ ବିମାନବନ୍ଦର ବନ୍ଦ ରହିଛି । ବିଶ୍ୱର ସବୁଠାରୁ ବ୍ୟସ୍ତବହୁଳ ବିମାନବନ୍ଦରଗୁଡ଼ିକ ମଧ୍ୟରୁ ଗୋଟିଏ ହଠାତ୍ ବନ୍ଦ ହୋଇଯିବା ଫଳରେ ହଜାର ହଜାର ଯାତ୍ରୀ ବିଦେଶରେ ଫସି ରହିଥିଲେ । ଭାରତର ଅଲିମ୍ପିକ୍ ପଦକ ବିଜେତା ସଟଲର୍ ସିନ୍ଧୁ ବିମାନ ବନ୍ଦରରେ ଫସିଛନ୍ତି  । ସେ ଅଲ୍ ଇଂଲଣ୍ଡ ବ୍ୟାଡମିଣ୍ଟନ୍ ଚାମ୍ପିଅନସିପରେ ଅଂଶଗ୍ରହଣ କରିବା ପାଇଁ ୟୁକେର ବର୍ମିଂହାମ ଯାତ୍ରା କରୁଥିଲେ । 

ଏହା ବି ପଢନ୍ତୁ...​​​​​​​୩୦ ସେକେଣ୍ଡ, ୩୦ ଟନ୍‌ର ୩୦ ବମ୍‌... କିପରି ହେଲା ଇରାନ ସୁପ୍ରିମ୍ ଖାମେନେଇଙ୍କ ବଂଶର ଅନ୍ତ ?

ଆମେରିକା-ଇସ୍ରାଏଲ ଆକ୍ରମଣ ଏବଂ ପରବର୍ତ୍ତୀ ଇରାନର ପ୍ରତିଶୋଧ ଯୋଗୁ ସମଗ୍ର ମଧ୍ୟପ୍ରାଚ୍ୟ ଯୁଦ୍ଧ ଘେରରେ ରହିଛି । ଏହି ଅଶାନ୍ତି ମଧ୍ୟରେ, ଅନେକ ଉପସାଗରୀୟ ଦେଶ ଫେବ୍ରୁଆରି ୨୮ ରୁ ମାର୍ଚ୍ଚ ୧ ପର୍ଯ୍ୟନ୍ତ ସେମାନଙ୍କର ଆକାଶ ସୀମା ବନ୍ଦ କରି ଦେଇଛନ୍ତି । ଫଳରେ ଅନେକ ସେଲିବ୍ରିଟି ୟୁଏଇରେ ଫସି ରହିଛନ୍ତି । ୟୁଏଇର ଦୁବାଇ ଅନ୍ତର୍ଜାତୀୟ ବିମାନବନ୍ଦର ଓ ଆବୁଧାବି ବିମାନବନ୍ଦରରେ ଶହ ଶହ ଉଡ଼ାଣ ଅନିର୍ଦ୍ଦିଷ୍ଟ କାଳ ପାଇଁ ବାତିଲ କରାଯାଇଛି। ଏହା ଯୋଗୁ ବିଶ୍ୱର ହଜାର ହଜାର ପର୍ଯ୍ୟଟକ ଦୁବାଇ ଓ ଆବୁଧାବିରେ ଫସି ରହିଛନ୍ତି । ଅନେକ ଖେଳାଳି, କଳାକାରଏବଂ ରିଆଲିଟି ଟିଭି ସେଲିବ୍ରିଟି ଫସି ରହିଛନ୍ତି ।