ୱାଶିଂଟନ,୩୧/୧୦: ଆଉ ୫ ଦିନ ପରେ ଆମେରିକାରେ ହେବ ରାଷ୍ଟ୍ରପତି ନିର୍ବାଚନ । ଡୋନାଲ୍ଡ ଟ୍ରମ୍ପ୍ ଓ କମଳା ହାରିସଙ୍କ ମଧ୍ୟରୁ ଜଣକୁ ରାଷ୍ଟ୍ରପତି ବାଛିବେ ଦେଶବାସୀ । ଜନତାଙ୍କ ସମର୍ଥନ ସାଉଁଟିବା ପାଇଁ ଉଭୟ ନେତା ପାରୁପର୍ଯ୍ୟନ୍ତ ଉଦ୍ୟମ ଚଳାଇଛନ୍ତି । ସେଲିବ୍ରିଟିମାନେ ମଧ୍ୟ ନିଜ ପସନ୍ଦର ନେତାଙ୍କ ପାଇଁ ପ୍ରଚାର ମଇଦାନକୁ ଓହ୍ଲାଇଛନ୍ତି । ଏହି କ୍ରମରେ ଆମେରିକାର ପ୍ରଖ୍ୟାତ ସିଙ୍ଗର ଜେନିଫର ଲୋପେଜ କମଳାଙ୍କ ସମର୍ଥନରେ ପ୍ରଚାର କରିବାକୁ ପ୍ରସ୍ତୁତ ହୋଇଛନ୍ତି ।
ଗୁରୁବାର ଲାସ ଭେଗାସରେ ହେବାକୁ ଥିବା କମଳାଙ୍କ ‘ହ୍ୱେନ୍ ୱି ଭୋଟ ୱି ୱିନ୍’ ରାଲିରେ ଜେନିଫର ସାମିଲ ହେବେ । ଜେନିଫରଙ୍କୁ ଦେଖିବା ପାଇଁ ରାଲିରେ ପ୍ରବଳ ଜନସମାଗମ ହେବ, ଯାହା କମଳାଙ୍କ ଲାଗି ବେଶ୍ ଲାଭଦାୟକ ହୋଇପାରେ । ରାଲି ସମୟରେ ଜେନିଫର ମଧ୍ୟ ଜନତାଙ୍କୁ ମଞ୍ଚରୁ ସମ୍ବୋଧନ କରିବେ । କମଳାଙ୍କ ଲାଗି ସେ ଭୋଟ ମାଗିବେ । ଏହା ପୂର୍ବରୁ ବିୟୋନ୍ସେ ଓ ଲିଓନୋର୍ଡୋ ଡିକାପ୍ରିଓଙ୍କ ଭଳି ଆଗ ଧାଡ଼ିର ସେଲିବ୍ରିଟି କମଳାଙ୍କ ପାଇଁ ପ୍ରଚାର କରିସାରିଛନ୍ତି । ନଭେମ୍ବର ୫ରେ ଆମେରିକାରେ ରାଷ୍ଟ୍ରପତି ନିର୍ବାଚନ ହେବ।
