କଟକ, ୦୪/୧୨ : ସହରରେ ପ୍ରଥମ ଥର ପାଇଁ ଶୋଭାପାଇବ ପୂର୍ବତନ ପ୍ରଧାନମନ୍ତ୍ରୀ ଭାରତରତ୍ନ ସ୍ୱର୍ଗତଃ ଅଟଳ ବିହାରୀ ବାଜପେୟୀଙ୍କ ପୂର୍ଣ୍ଣାବୟବ ବ୍ରୋଞ୍ଜ୍ ପ୍ରତିମୂର୍ତ୍ତି । ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ କଟକରେ ପ୍ରସିଦ୍ଧ ଭାସ୍କର୍ଯ୍ୟ ଶିଳ୍ପୀ ଲକ୍ଷ୍ମୀଧର ରଣାଙ୍କ ଦ୍ୱାରା ଏହାକୁ ତିଆରି କରାଯାଉଛି । ପାଖାପାଖି ୧୧ କିଲୋ ବ୍ରୋଞ୍ଜ୍ ଦ୍ୱାରା ସୁନ୍ଦର କାରିଗରୀ ସହ ୧୦ ଫୁଟ୍ର ଏହି ପ୍ରତିମୂର୍ତ୍ତି ନିର୍ମାଣ ହେବ । ଯାହାକୁ ଆସନ୍ତା ୨୫ ତାରିଖ ଦିନ ଜନ୍ମ ଜୟନ୍ତୀ ଉପଲକ୍ଷେ ବେଲିଭ୍ୟୁ ଛକରେ ଲୋକାର୍ପଣ କରିବାକୁ ଯୋଜନା କରାଯାଉଛି । ରାଜ୍ୟ ସରକାରଙ୍କ ଦ୍ୱାରା ବିଭିନ୍ନ ସହରରେ ୧୫ରୁ ଅଧିକ ମହାପୁରୁଷଙ୍କ ପ୍ରତିମୂର୍ତ୍ତି ସ୍ଥାପନ କରାଯିବ । ଏଥିରେ କଟକ ଓ ସମ୍ବଲପୁରରେ ଭାରତରତ୍ନ ସ୍ୱର୍ଗତଃ ଅଟଳ ବିହାରୀ ବାଜପେୟୀଙ୍କ ପୂର୍ଣ୍ଣାବୟବ ପ୍ରତିମୂର୍ତ୍ତି ଶୋଭା ପାଇବ ବୋଲି ନିଷ୍ପତ୍ତି ହୋଇଛି ।
ବେଲିଭ୍ୟୁ ଛକରେ ଏହାର ନିର୍ମାଣ କାର୍ଯ୍ୟ ଆରମ୍ଭ ହୋଇସାରିଛି । ଶିଳ୍ପୀ ସଞ୍ଜିବ ବିଶ୍ୱାଳଙ୍କ ତତ୍ତ୍ୱାବଧାନରେ ପ୍ରସିଦ୍ଧ ଭାସ୍କର୍ଯ୍ୟ ଶିଳ୍ପୀ ଲକ୍ଷ୍ମୀଧର ରଣାଙ୍କ କାରଖାନାରେ କରାଯାଉଛି । ପାଖାପାଖି ୧୧ କିଲୋ ବ୍ରୋଞ୍ଜ୍କୁ ବ୍ୟବହାର କରି ୧୦ ଫୁଟ୍ର ସ୍ୱତନ୍ତ୍ର ପ୍ରତିମୂର୍ତ୍ତି ହେବ । କାରଖାନାରେ ପୁଅ ଶ୍ରୀକାନ୍ତ ରଣାଙ୍କ ସମେତ ସମୁଦାୟ ୨୨ ଜଣ କାରିଗର ଏହି କାମରେ ନିୟୋଜିତ ଅଛନ୍ତି । ଯାହା ଆସନ୍ତା ୨୫ ତାରିଖ ପୂର୍ବରୁ ଶେଷ କରାଯିବ । ତେବେ ଭାସ୍କର୍ଯ୍ୟ ଶିଳ୍ପୀ ଲକ୍ଷ୍ମୀଧର ରଣା ନିଜ କାରିଗରୀ ମାଧ୍ୟମରେ ଅନେକ ଚମକ ସୃଷ୍ଟି କରିଛନ୍ତି । ନିଜ କାରିଗରୀରେ ବାଲିଯାତ୍ରାର ମୁଖ୍ୟ ତୋରଣ ହେଉ କି ଜୁଡିସିଆଲ୍ ଏକାଡେମୀ ନିକଟରେ ଗାନ୍ଧିଙ୍କ ପ୍ରତିମୂର୍ତ୍ତି ଅତ୍ୟନ୍ତ ଆକର୍ଷଣୀୟ ରହିଛି । ରାଜ୍ୟର ଅନେକ ସ୍ଥାନରେ ସେ କାମ କରିବ ଲୋକପ୍ରିୟତା ସାଉଣ୍ଟିଛନ୍ତି । ଏଭଳି ସ୍ଥିତିରେ ରାଜ୍ୟ ସରକାରଙ୍କ ଦ୍ୱାରା କେବଳ କଟକ ନୁହେଁ ବରଂ ସମ୍ବଲପୁର ପାଇଁ ମଧ୍ୟ ସେ ପ୍ରତିମୂର୍ତ୍ତି ତିଆରି କରୁଛନ୍ତି ।
