ଚନ୍ଦ୍ରଶେଖରପୁର,୨୩/୦୧: ଭାରତୀୟ ସ୍ୱାଧୀନତା ସଂଗ୍ରାମର ଅନ୍ୟତମ କର୍ଣ୍ଣଧାର ବୀର ସୁରେନ୍ଦ୍ର ସାଏଙ୍କ ଜୟନ୍ତୀ । ତାଙ୍କ ନାମ ଅନୁସାରେ ୪୭ ବର୍ଷ ପୂର୍ବେ ରାଜଧାନୀର ଭିଏସ୍ଏସ୍ ନଗର କଲୋନୀର ନାମକରଣ କରାଯାଇଥିଲା । ହେଲେ ଦୀର୍ଘ ବର୍ଷ ପରେ ମଧ୍ୟ କଲୋନୀରେ ବୀର ସୁରେନ୍ଦ୍ର ସାଏଙ୍କ ପୂର୍ଣ୍ଣାବୟବ ପ୍ରତିମୂର୍ତ୍ତି ନିର୍ମାଣ ହୋଇପାରିଲାନି । ତେଣୁ ଭିଏସ୍ଏସ୍ ନଗରରେ ତାଙ୍କ ପୂର୍ଣ୍ଣାବୟବ ପ୍ରତିମୂର୍ତ୍ତି ପାଇଁ ଦାବି କରିଛି ଭିଏସ୍ଏସ୍ ନଗର ଉନ୍ନୟନ ପରିଷଦ ଓ ଉତ୍କଳ ସମ୍ମିଳନୀ ।
୧୯୭୮ ମସିହାରୁ ଆରମ୍ଭ ହୋଇଥିଲା ବୀର ସୁରେନ୍ଦ୍ର ସାଏ ନଗର । କଲୋନୀରେ ୧୯୮୦ ମସିହାରେ ସୁରେନ୍ଦ୍ର ସାଏଙ୍କର ଏକ ଆବକ୍ଷ ପ୍ରତିମୂର୍ତ୍ତି ପ୍ରତିଷ୍ଠା କରି କଲୋନୀର ନାମକରଣ କରାଯାଇଥିଲା । ତେବେ ତାଙ୍କର ଏକ ପୂର୍ଣ୍ଣାବୟବ ପ୍ରତିମୂର୍ତ୍ତି ପାଇଁ ଭିଏସ୍ଏସ୍ ନଗରବାସୀ ବାରମ୍ବାର ଦାବି ପରେ ୨୦୦୮ ମସିହା ଅକ୍ଟୋବର ୨୩ ତାରିଖରେ ତତ୍କାଳୀନ ସଂସ୍କୃତି ମନ୍ତ୍ରୀଙ୍କ ଅଧକ୍ଷତାରେ ଏକ ଉଚ୍ଚସ୍ତରୀୟ ବୈଠକ ବସିଥିଲା । ଭୁବନେଶ୍ୱରର ଜୟଦେବ ବିହାର ଛକରେ ସୁରେନ୍ଦ୍ର ସାଏଙ୍କର ଏକ ପୂର୍ଣ୍ଣାବୟବ ପ୍ରତିମୂର୍ତ୍ତି ପ୍ରତିଷ୍ଠା ପାଇଁ ନିଷ୍ପତ୍ତି ନିଆଯାଇଥିଲା । ସଂସ୍କୃତି ବିଭାଗର ଏହି ନିଷ୍ପତ୍ତିକୁ ବିରୋଧ କରାଯାଇଥିଲା । ଏହା ପରେ ଅର୍ଥାଭାବର ଆଳ ଦେଖାଇ ଏହି ପ୍ରତିମୂର୍ତ୍ତି ଆଜି ପର୍ଯ୍ୟନ୍ତ ପ୍ରତିଷ୍ଠା ହୋଇ ପାରିନାହିଁ । ଭିଏସ୍ଏସ୍ ନଗର ଉନ୍ନୟନ ପରିଷଦ ଓ ଉତ୍କଳ ସମ୍ମିଳନୀ ପକ୍ଷରୁ ବହୁ ବାର ସଂସ୍କୃତି ବିଭାଗକୁ ଅନୁରୋଧ କରିବା ପରେ ୨୦୨୩ ମସିହା ଅଗଷ୍ଟ ମାସରେ ନଗରରେ ସାଏଙ୍କ ପୂର୍ଣ୍ଣାବୟବ ପ୍ରତିମୂର୍ତ୍ତି ପ୍ରତିଷ୍ଠା ପାଇଁ ରାଜ୍ୟ ସଂସ୍କୃତି ବିଭାଗ ନିଷ୍ପତ୍ତି ନେଇଛନ୍ତି । ମାତ୍ର ସାଏଙ୍କର ଘୋଡ଼ା ଉପରେ ବୀର ବେଶରେ ଥିବା ପ୍ରତିମୂର୍ତ୍ତି ନିର୍ମାଣ କରିବା ବଦଳରେ ଦଣ୍ଡାୟମାନ ପ୍ରତିମୂର୍ତ୍ତି ନିର୍ମାଣ ପାଇଁ ନିଷ୍ପତ୍ତି ନିଆଯାଇଛି ଯାହାକୁ ଭିଏସ୍ଏସ୍ ନଗର ଉନ୍ନୟନ ପରିଷଦ ଓ ଉତ୍କଳ ସମ୍ମିଳନୀ ବିରୋଧ କରୁଛନ୍ତି ।
ଉତ୍କଳ ସମ୍ମିଳନୀ ମଞ୍ଚେଶ୍ୱର ଶିଳ୍ପାଞ୍ଚଳ ଶାଖା ସଭାପତି ତଥା ଉନ୍ନୟନ ପରିଷଦ ସାଧାରଣ ସମ୍ପାଦକ ଦିଲ୍ଲୀପ ଦାଶଶର୍ମା କହିଛନ୍ତି, ବୀର ଉପାଧି ଥିବା ରାଜ୍ୟର ଏକମାତ୍ର ବରପୁତ୍ର ହେଉଛନ୍ତି ବୀର ସୁରେନ୍ଦ୍ର ସାଏ । ତେଣୁ ବୀର ବେଶରେ ତାଙ୍କ ପ୍ରତିମୂର୍ତ୍ତି ନିର୍ମାଣ କରାଯାଇ ଭିଏସ୍ଏସ୍ ନଗରରେ ପ୍ରତିଷ୍ଠା କରାଯାଉ ବୋଲି ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗକୁ ସେ ଅନୁରୋଧ କରିଛନ୍ତି ।
