ନୂଆଦିଲ୍ଲୀ,୦୮/୦୯: ଆସନ୍ତା ୯ ତାରିଖ (ମଙ୍ଗଳବାର)ରେ ଦେଶର ସପ୍ତଦଶ ଉପରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବ । ସଂସଦ ଭବନର ରୁମ ନମ୍ବର ଏଫ-୧୦୧ (ବସୁଧା)ରେ ପୂର୍ବାହ୍ନ ୧୦ଟାରୁ ମତଦାନ ଆରମ୍ଭ ହୋଇ ଅପରାହ୍ନ ୫ଟା ପର୍ଯ୍ୟନ୍ତ ଚାଲିବ । ମତଦାନ ଶେଷ ହେବା ପରେ ଅପରାହ୍ନ ୬ଟାରେ ଭୋଟ ଗଣତି କରାଯିବ ଏବଂ ଫଳାଫଳ ଘୋଷଣା ହେବ ବୋଲି ରାଜ୍ୟସଭାର ମହାସଚିବ ତଥା ରିଟର୍ଣ୍ଣିଂ ଅଫିସର ପି.ସି ମୋଦି କହିଛନ୍ତି ।
ଏଥର ନିର୍ବାଚନରେ ଏନ୍ଡିଏ ପ୍ରାର୍ଥୀ ବରିଷ୍ଠ ବିଜେପି ନେତା ସିପି ରାଧାକ୍ରିଷ୍ଣନ ଏବଂ ବିରୋଧୀ ଇଣ୍ଡି ମେଣ୍ଟ ପ୍ରାର୍ଥୀ ତଥା ସୁପ୍ରିମକୋର୍ଟର ପୂର୍ବତନ ବିଚାରପତି ବି. ସୁଦର୍ଶନ ରେଡ୍ଡୀଙ୍କ ମଧ୍ୟରେ ମୁକାବିଲା ହେଉଛି । ଉଭୟ ପ୍ରାର୍ଥୀ ଉତ୍ତର ଭାରତର । ରାଧାକ୍ରିଷ୍ଣନ ତାମିଲନାଡ଼ୁ ଏବଂ ଜଷ୍ଟିସ୍ ରେଡ୍ଡୀ ତେଲଙ୍ଗାନାର ବାସିନ୍ଦା ।
ଉପରାଷ୍ଟ୍ରପତି ନିର୍ବାଚନ ପୂର୍ବରୁ ରବିବାର ଏନ୍ଡିଏ ସାଂସଦମାନଙ୍କର ଦୁଇ ଦିନିଆ କର୍ମଶାଳା ଆରମ୍ଭ ହୋଇଛି । ଦିଲ୍ଲୀ ସଂସଦ ପରିସରରେ ଥିବା ଜିଏମ୍ସି ବାଳଯୋଗୀ ଅଡିଟୋରିୟମରେ ଚାଲିଥିବା କର୍ମଶାଳାର ପ୍ରଥମ ଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାମିଲ ହୋଇଥିଲେ । ତେବେ ସେ ହଲ୍ରେ ସମସ୍ତଙ୍କ ପଛରେ ବସିଥିବା ଦେଖିବାକୁ ମିଳିଥିଲା । ଗୋରଖପୁର ସାଂସଦ ରବି କିଶନ, ରାଜ୍ୟସଭା ସଦସ୍ୟ ସଙ୍ଗୀତା ବଳବନ୍ତ ଏହାର ଫଟୋ ସୋସିଆଲ ମିଡିଆ ଏକ୍ସରେ ପୋଷ୍ଟ କରିଛନ୍ତି । କର୍ମଶାଳାର ଉଦ୍ଦେଶ୍ୟ ଉପରାଷ୍ଟ୍ରପତି ନିର୍ବାଚନ ପୂର୍ବରୁ ଶତ ପ୍ରତିଶତ ଭୋଟିଂ ପାଇଁ ସାଂସଦମାନଙ୍କୁ ଟ୍ରେନିଂ ଦେବା । ଏହା ପୂର୍ବରୁ ସେପ୍ଟେମ୍ବର ୮ରେ ଏନ୍ଡିଏ ସାଂସଦଙ୍କ ପାଇଁ ପ୍ରଧାନମନ୍ତ୍ରୀ ମୋଦି ଡିନର ଦେବାର କାର୍ଯ୍ୟକ୍ରମ ଥିଲା । କିନ୍ତୁ ବିଭିନ୍ନ ରାଜ୍ୟରେ ଦେଖାଦେଇଥିବା ବନ୍ୟା ପରିସ୍ଥିତିକୁ ଦୃଷ୍ଟିରେ ରଖି ତାକୁ ବାତିଲ କରାଯାଇଛି । ଏହି କର୍ମଶାଳାରେ ଦୁଇ ଦିନରେ ୪ଟି ଅଧିବେଶନ ଅନୁଷ୍ଠିତ ହେବ । ଏଥିରେ ଦଳର ଇତିହାସ ଏବଂ ବିକାଶ ଉପରେ ଚର୍ଚ୍ଚା ହେବ । ଏଥିସହ ସାଂସଦଙ୍କ କାର୍ଯ୍ୟକୁଶଳତା ବଢ଼ାଇବା ଉପରେ ମଧ୍ୟ ଆଲୋଚନା ହେବ । ପ୍ରଥମ ଦିନ ବୈଠକରେ ବିଜେପି ସାଂସଦମାନେ ଜିଏସ୍ଟି ସ୍ଲାବ୍ରେ ପରିବର୍ତ୍ତନ ପାଇଁ ପ୍ରଧାନମନ୍ତ୍ରୀ ମୋଦିଙ୍କୁ ଧନ୍ୟବାଦ ଦେଇଥିଲେ ।
ଅନ୍ୟପକ୍ଷରେ ଉପରାଷ୍ଟ୍ରପତି ନିର୍ବାଚନକୁ ନେଇ ଇଣ୍ଡି ମେଣ୍ଟ ପକ୍ଷରୁ ତତ୍ପରତା ପ୍ରକାଶ ପାଇଛି । ଏହି କ୍ରମରେ ସୋମବାର ଇଣ୍ଡି ମେଣ୍ଟର ସାଂସଦମାନଙ୍କ ଏକ ବୈଠକ ଡକାଯାଇଛି । ଅପରାହ୍ନ ୨ଟା ୩୦ରେ ସମ୍ବିଧାନ ସଦନର କେନ୍ଦ୍ରୀୟ ହଲ୍ରେ ଏହି ବୈଠକ ବସିବ । ବୈଠକରେ ମେଣ୍ଟ ସହଯୋଗୀ ଦଳର ସବୁ ସାଂସଦମାନେ ଉପସ୍ଥିତ ରହିବେ । ସେଥିରେ ଉପରାଷ୍ଟ୍ରପତି ନିର୍ବାଚନ ଉପରେ ବ୍ୟାପକ ଆଲୋଚନା କରାଯିବ । ବୈଠକ ଅବସରରେ ଏକ ମକ୍ ପୋଲ୍ ମଧ୍ୟ ଆୟୋଜିତ ହେବ । ନିର୍ବାଚନ ସମୟରେ ସାଂସଦମାନେ କିଭଳି ନିର୍ଭୁଲ ଭାବରେ ସେମାନଙ୍କ ମତଦାନ ସାବ୍ୟସ୍ତ କରିପାରିବେ ସେ ସମ୍ପର୍କରେ ସେମାନଙ୍କୁ ତାଲିମ୍ ଦିଆଯିବ । ଏହା ପରେ ସନ୍ଧ୍ୟା ୭ଟା ୩୦ ମିନିଟରେ କଂଗ୍ରେସ ଅଧ୍ୟକ୍ଷ ମଲିକାର୍ଜୁନ ଖଡ୍ଗେ ମେଣ୍ଟର ସାଂସଦମାନଙ୍କ ପାଇଁ ଡିନର ପାର୍ଟିର ଆୟୋଜନ କରିଛନ୍ତି । ପାର୍ଲାମେଣ୍ଟ ଆନେକ୍ସରେ ଏହି ଡିନର ପାର୍ଟି ଅନୁଷ୍ଠିତ ହେବ । ବିରୋଧୀ ଦଳ ଉପରାଷ୍ଟ୍ରପତି ନିର୍ବାଚନକୁ ବୈଚାରିକ ଲଢ଼େଇ ବୋଲି ଯୁକ୍ତି ବାଢ଼ିଛନ୍ତି ।୧୯୯୭ ଠାରୁ ବିରୋଧୀ ଦଳମାନେ କ୍ରମାଗତ ଭାବେ ଉପରାଷ୍ଟ୍ରପତି ନିର୍ବାଚନରେ ପ୍ରାର୍ଥୀ ଦେଇଆସୁଛନ୍ତି । ହେଲେ ଶାସକ ଦଳର ପ୍ରାର୍ଥୀ ସବୁଥର ନିର୍ବାଚନରେ ବିଜୟୀ ହୋଇଛନ୍ତି । କିନ୍ତୁ ଭୋଟ ହାରରେ କମ୍ ଓ ବେଶି ଦେଖାଯାଇଛି ।
ଉପରାଷ୍ଟ୍ରପତି ନିର୍ବାଚନରେ ଲୋକସଭା ଓ ରାଜ୍ୟସଭାର ସାଂସଦମାନେ ଭୋଟ ଦେଇଥାନ୍ତି । ସେମାନଙ୍କୁ ନେଇ ଇଲେକ୍ଟୋରାଲ କଲେଜ ଗଠନ କରାଯାଇଥାଏ । ଏହି ଇଲେକ୍ଟୋରାଲ କଲେଜରେ ଉଭୟ ଗୃହର ମୋଟ ୭୮୮ ସାଂସଦ ସ୍ଥାନ ପାଇଥାନ୍ତି । ଅର୍ଥାତ ସେମାନେ ଭୋଟ ଦେବାକୁ ଯୋଗ୍ୟ ବିବେଚିତ ହୋଇଥାନ୍ତି । ସେମାନଙ୍କ ମଧ୍ୟରେ ରାଜ୍ୟସଭାର ୨୩୩ ନିର୍ବାଚିତ ସଦସ୍ୟ, ୧୨ ଜଣ ମନୋନୀତ ସଦସ୍ୟ ଏବଂ ଲୋକସଭାର ୫୪୩ ଜଣ ସଦସ୍ୟ ସାମିଲ ଅଛନ୍ତି । ହେଲେ ବର୍ତ୍ତମାନ ଇଲେକ୍ଟୋରାଲ କଲେଜର ସଦସ୍ୟ ସଂଖ୍ୟା ରହିଛି ୭୮୨ । ବର୍ତ୍ତମାନ ଲୋକସଭାର ୫ ଓ ରାଜ୍ୟସଭାର ଗୋଟିଏ ଆସନ ଖାଲି ରହିଛି । ନିର୍ବାଚନ ଲାଗି ଜଣେ ପ୍ରାର୍ଥୀଙ୍କୁ ଅତିକମ୍ରେ ୩୯୨ ଭୋଟ ଆବଶ୍ୟକ । ସଂଖ୍ୟା ଦୃଷ୍ଟିରୁ ଦେଖିଲେ ଏନ୍ଡିଏ ପ୍ରାର୍ଥୀଙ୍କ ପଲା ଭାରି ଅଛି । କାରଣ ତାଙ୍କ ସପକ୍ଷରେ ୪୨୩ ସଦସ୍ୟଙ୍କ ସମର୍ଥନ ରହିଛି । ସେଥିରେ ଲୋକସଭାର ୨୯୩ ଏବଂ ରାଜ୍ୟସଭାର ୧୩୦ ସଦସ୍ୟ ଅଛନ୍ତି । ଯଦି ଏନ୍ଡିଏର ସବୁ ସଦସ୍ୟ ରାଧାକ୍ରିଷ୍ଣଙ୍କ ସପକ୍ଷରେ ମତଦାନ କରନ୍ତି ତେବେ ତାଙ୍କ ବିଜୟ ସୁନିଶ୍ଚିତ । ଏହାବ୍ୟତୀତ ୱାଇଏସ୍ଆରସିପି ମଧ୍ୟ ତାଙ୍କୁ ସମର୍ଥନ ଘୋଷଣା କରିଛି ।
ସୂଚନାଯୋଗ୍ୟ ଯେ ଗତ ଜୁଲାଇ ୨୧ ତାରିଖରେ ସ୍ୱାସ୍ଥ୍ୟଗତ କାରଣ ଦର୍ଶାଇ ଉପରାଷ୍ଟ୍ରପତି ପଦରୁ ଜଗଦୀପ ଧନଖଡ ହଠାତ୍ ଇସ୍ତଫା ଦେବା ପରେ ଏହି ପଦ ଖାଲି ପଡିଛି । ସମ୍ବିଧାନର ଧାରା ୬୩ରୁ ୭୧ ଓ ଉପରାଷ୍ଟ୍ରପତି (ନିର୍ବାଚନ) ଆଇନ ଅନୁସାରେ ଧନଖଡଙ୍କ ଇସ୍ତଫାର ୬୦ ଦିନ ଅର୍ଥାତ ସେପ୍ଟେମ୍ବର ୧୯ ତାରିଖ ପୂର୍ବରୁ ନିର୍ବାଚନ କରାଯିବା ଆବଶ୍ୟକ
