ନୂଆଦିଲ୍ଲୀ, ୯।୯:  ଉପରାଷ୍ଟ୍ରପତି ପଦ ପାଇଁ ନିର୍ବାଚନ ଆରମ୍ଭ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଥମ ଭୋଟ୍ ଦେଇଛନ୍ତି । ପରବର୍ତ୍ତୀ ଉପରାଷ୍ଟ୍ରପତିଙ୍କୁ ବାଛିବା ପାଇଁ ଲୋକସଭା ଏବଂ ରାଜ୍ୟସଭାର ସାଂସଦମାନେ ସଂସଦ ଭବନ ଆସି ନିଜର ମତାଧିକାର ସାବ୍ୟସ୍ତ କରୁଛନ୍ତି । ଉପରାଷ୍ଟ୍ରପତି ରେସ୍‌ରେ ଏନ୍‌ଡିଏ ପକ୍ଷରୁ ସିପି ରାଧାକ୍ରିଷ୍ଣନ ପ୍ରାର୍ଥୀ ହୋଇଥିବା ବେଳେ ବିରୋଧୀ 'ଇଣ୍ଡି' ମେଣ୍ଟ ପକ୍ଷରୁ ସୁପ୍ରିମକୋର୍ଟର ପୂର୍ବତନ ବିଚାରପତି ବି. ସୁଦର୍ଶନ ରେଡ୍ଡୀ ପ୍ରାର୍ଥୀ ହୋଇଛନ୍ତି । ଆଜି ସଂସଦ ଭବନରେ ଉଭୟଙ୍କ ମଧ୍ୟରେ କଡ଼ା ପ୍ରତିଦ୍ୱନ୍ଦିତା ଦେଖିବାକୁ ମିଳୁଛି । ଭୋଟିଂ ପ୍ରକ୍ରିୟା ପରେ ଆଜି ସନ୍ଧ୍ୟାରେ ନିର୍ବାଚନ ଫଳାଫଳ ଘୋଷଣା ହେବ ।

​​​​​​​

ମଙ୍ଗଳବାର ସକାଳ ୧୦ଟାରେ ଭୋଟିଂ ଆରମ୍ଭ ହୋଇଥିବା ବେଳେ ସନ୍ଧ୍ୟା ୫ଟାରେ ସରିବ । ସନ୍ଧ୍ୟା ୬ଟାରେ ଭୋଟ୍ ଗଣତି ହେବ । ବିଜୟୀ ପ୍ରାର୍ଥୀ ଦେଶର ୧୫ତମ ଉପରାଷ୍ଟ୍ରପତି ହେବେ । ନିର୍ବାଚିତ ଉପରାଷ୍ଟ୍ରପତି ରାଜ୍ୟସଭାର ଅଧ୍ୟକ୍ଷ ଭାବେ କାର୍ଯ୍ୟ ତୁଲାଇବେ  । ସେପଟେ ଉପରାଷ୍ଟ୍ରପତି ପ୍ରାର୍ଥୀଙ୍କୁ ସାଂସଦମାନେ ‌ଗୋପନ ବାଲଟ୍‌ ଜରିଆରେ ଭୋଟ୍ ଦାନ କରୁଛନ୍ତି । ଇଚ୍ଛା ଅନୁଯାୟୀ ଭୋଟ୍ ଦେବାର ସ୍ୱାଧୀନତା ସାଂସଦମାନଙ୍କର ରହିଥିଲେ ମଧ୍ୟ ସେମାନେ ସାଧାରଣତଃ ଦଳୀୟ ଆଧାରରେ ‌ମତଦାନ କରିଥାନ୍ତି । ‌ଗୋପନ ବାଲଟ୍ ଜରିଆ ଭୋଟ୍ ହେଉଥିବାରୁ କ୍ରସ୍ ଭୋଟିଂର ମଧ୍ୟ ଆଶଙ୍କା ରହୁଛି ।

ସୂଚନା ଅନୁଯାୟୀ, ଉପରାଷ୍ଟ୍ରପତି ନିର୍ବାଚନ ପାଇଁ ମୋଟ୍ ୭୮୧ ସଦସ୍ୟ ରହିଛନ୍ତି । ସେମାନଙ୍କ ମଧ୍ୟରୁ ରାଜ୍ୟସଭାର ୨୩୮ ହୋଇଥିବ‌ାବେଳେ ଲୋକସଭାର ୫୪୨ ସଦସ୍ୟ ରହିଛନ୍ତି । ଲୋକସଭାର ଗୋଟିଏ ଏବଂ ରାଜ୍ୟସଭାର ୬ଟି ଆସନ ଏବେ ଖାଲି ପଡ଼ିଛି । ତେଣୁ ଜିତିବା ପାଇଁ ମ୍ୟାଜିକ୍‌ ସଂଖ୍ୟା ହେଉଛି ୩୯୧ । କିନ୍ତୁ ବିଜେଡି(୭) ଓ ବିଆର୍‌ଏସ୍‌(୪)ଭୋଟଦାନରୁ ବିରତ ‌ରହିବେ ବୋଲି ପୂର୍ବରୁ ଘୋଷଣା କରିସାରିଥିବାରୁ ମ୍ୟାଜିକ୍‌ ସଂଖ୍ୟା ଆହୁରି ତଳକୁ ଖସିଯିବ । ଦେଖିବାକୁ ଗଲେ ଏନ୍‌ଡିଏର ୪୨୫ ସଦସ୍ୟ ରହିଛନ୍ତି । ଏଥିସହିତ ୱାଇଏସ୍‌ଆର୍‌ କଂଗ୍ରେସର ୧୧ ସାଂସଦଙ୍କ ସମର୍ଥନ ଏନ୍‌ଡିଏକୁ ମିଳିବ । ତେଣୁ ଏହାର ମୋଟ୍ ସଂଖ୍ୟା ୪୩୬ରେ ପହଞ୍ଚିଛି । ଅନ୍ୟପକ୍ଷରେ ବିରୋଧୀ ଇଣ୍ଡି ମେଣ୍ଟର ପ୍ରାର୍ଥୀଙ୍କୁ ୩୨୪ ସାଂସଦଙ୍କ ସମର୍ଥନ ରହିଛି । ନିଜ ପ୍ରାର୍ଥୀଙ୍କ ସପକ୍ଷରେ କିଭଳି ଅଧିକରୁ ଅଧିକ ଭୋଟ୍ ପଡ଼ିବ ସେ ନେଇ ଉଭୟ ଶାସକ ଓ ବିରୋଧୀ ଲାଗି ପଡ଼ିଛନ୍ତି ।