ଭୁବନେଶ୍ବର, ୨।୩ : ଦୁର୍ଘଟଣା ଘଟାଇଥିବା ଅଭିଯୁକ୍ତକୁ ଗିରଫ ଓ ଭରଣପୋଷଣ ଦାବିରେ ମୃତଦେହ ରଖି ବନଗୁରିଆ ଗ୍ରାମବାସୀ ମାହାଙ୍ଗା ବ୍ଲକ୍ ର ସାଲେପୁର ଛତିଆ ରାସ୍ତା ଅବରୋଧ କରିଛନ୍ତି। ଉତ୍ତ୍ୟକ୍ତ ଲୋକଙ୍କୁ ପୋଲିସ ବୁଝାସୁଝା କରୁଛି।
ସୁଚନା ଅନୁସାରେ ଶନିବାର ରାତିରେ ମାହାଙ୍ଗା ବ୍ଲକ୍ କୁହୁଣ୍ଡା ପଞ୍ଚାୟତ ର ବନଗୁରିଆ ଗ୍ରାମର ପୂର୍ଣ୍ଣଚନ୍ଦ୍ର ବେହେରା ସାଇକେଲରେ ଆସୁଥିଲେ। ଏହି ସମୟରେ କୋଠପଦା ଅଞ୍ଚଳର ମନ୍ମଥ ବିହାରୀ ମଦ୍ୟ ପାନ କରି ବାଇକ୍ରେ ଆସି ପୂର୍ଣ୍ଣଚନ୍ଦ୍ରଙ୍କୁ ଧକ୍କା ଦେଇଥିଲେ। ଏଥିରେ ପୂର୍ଣ୍ଣଚନ୍ଦ୍ର ଗୁରୁତର ହୋଇଥିଲେ। ଏହା ପରେ ପୂର୍ଣ୍ଣଚନ୍ଦ୍ରଙ୍କୁ ତୁରନ୍ତ କଟକ ବଡ଼ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ରବିବାର ସକାଳେ ପୂର୍ଣ୍ଣଚନ୍ଦ୍ର ଙ୍କ ଶବ ବ୍ୟବଚ୍ଛେଦ କରାଯାଇ ଥିଲା।
ଯେହେତୁ ଗୋଟିଏ ପଞ୍ଚାୟତ ର ପାଖା ପାଖି ଗ୍ରାମର ପୂର୍ଣ୍ଣଚନ୍ଦ୍ର ଏବଂ ମନ୍ମଥ ସେଥିପାଇଁ ଗ୍ରାମବାସୀ ଆପୋଷ ସମାଧାନ କରିବାକୁ ଚେଷ୍ଟା କରିଥିଲେ। କିନ୍ତୁ ଘଟଣା ଘଟେଇଥିବା ମନ୍ମଥ ହଠାଥ ଫେରାର ହୋଇଯାଇଥିଲେ। ଏହା ପରେ ପୂର୍ଣ୍ଣଚନ୍ଦ୍ର ଙ୍କ ପରିବାର ସହ ବନ ଗୁରିଆ ଗ୍ରାମର ଗ୍ରାମବାସୀ ନ୍ୟାୟ ପାଇବା ପାଇଁ ରାସ୍ତାରେ ମୃତଦେହ ରଖି ନିଆଁ ଜାଳି ରାସ୍ତା ଅବରୋଧ କରିଛନ୍ତି। ଘଟଣାସ୍ଥଳରେ ଜୟପୁର ଫାଣ୍ଡି ଅଧିକାରୀ ପହଞ୍ଚି ବୁଝା ସୁଝା କରିଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଦୁର୍ଘଟଣା ଘଟେଇ ଫେରାର ହୋଇଥିବା ମନ୍ମଥକୁ ତୁରନ୍ତ ଗିରଫ କରିବା ସହିତ ପୂର୍ଣ୍ଣଚନ୍ଦ୍ରଙ୍କ ପରିବାରର ଭରଣ ପୋଷଣ କରିବାକୁ ଦାବି କରିଛନ୍ତି। ଯେ ପର୍ଯ୍ୟନ୍ତ ସେମାନଙ୍କ ଦାବୀ ପୂରଣ ନ ହୋଇଛି ସେ ପର୍ଯ୍ୟନ୍ତ ରାସ୍ତା ଅବରୋଧ କରାଯିବ ବୋଲି ଗ୍ରାମବାସୀ କହିଛନ୍ତି।
