ନୂଆଦିଲ୍ଲୀ: ଚାମ୍ପିଅନ୍ସ ଟ୍ରଫି ୨୦୨୫ର ଫାଇନାଲ୍ ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ରବିବାର ଖେଳାଯିବ। ଉଭୟ ଦଳ ପୂର୍ଣ୍ଣ ଶକ୍ତିର ସହିତ ଏହି ଫାଇନାଲ୍ ପାଇଁ ପ୍ରସ୍ତୁତିରେ ବ୍ୟସ୍ତ । କିନ୍ତୁ ଏହା ପୂର୍ବରୁ, ଭାରତୀୟ ଦଳକୁ ଏକ ବିଚଳିତ କଲାଭଳି ଖବର ମିଳିଛି । ଏକ ରିପୋର୍ଟରେ କୁହାଯାଇଛି ଯେ, ଚାମ୍ପିଅନ୍ସ ଟ୍ରଫି ଫାଇନାଲ ପୂର୍ବରୁ ଟିମ୍ ଇଣ୍ଡିଆର ଅଭ୍ୟାସ ସେସନ୍ ସମୟରେ କୋହଲି ଆହତ ହୋଇଛନ୍ତି । ବ୍ୟାଟିଂ ସମୟରେ କୋହଲିଙ୍କୁ ଏହି ଆଘାତ ଲାଗିଛି । ଏହା ପରେ ଡାକ୍ତରୀ ଦଳ ତାଙ୍କର ଚିକିତ୍ସା କରିଛନ୍ତି ।
ବଲ୍ ଆଣ୍ଠୁରେ ବାଜିଛି
ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟରେ ଦାବି କରାଯାଇଛି ଯେ, ଆଇସିସି ଏକାଡେମୀରେ ଅଭ୍ୟାସ ସମୟରେ ବିରାଟ ଦ୍ରୁତ ବୋଲରଙ୍କ ସାମ୍ନା କରୁଥିବା ସମୟରେ ଏକ ବଲ୍ ତାଙ୍କ ଆଣ୍ଠୁରେ ବାଜିଥିଲା। ଏହା ପରେ ସେ ବ୍ୟାଟିଂ ବନ୍ଦ କରିଦେଇଥିଲେ ଏବଂ ଭାରତୀୟ ଦଳର ଡାକ୍ତର ତାଙ୍କର ଚିକିତ୍ସା କରିଛନ୍ତି । ଏହା ପରେ କୋହଲି ଅଭ୍ୟାସ କରିନଥିଲେ । କିନ୍ତୁ ସେ ଅନ୍ୟ ଖେଳାଳିଙ୍କ ଅଭ୍ୟାସ ଦେଖିଥିଲେ ।
ଫାଇନାଲ ପାଇଁ କୋହଲି ଫିଟ୍ ଅଛନ୍ତି
ବିରାଟ ନିକଟରେ ସେ ଆଣ୍ଠୁରେ ଆଘାତ ଯୋଗୁଁ ଇଂଲଣ୍ଡ ବିପକ୍ଷ ଦିନିକିଆ ସିରିଜର ପ୍ରଥମ ମ୍ୟାଚ୍ ଖେଳିପାରି ନଥିଲେ। ଏପରି ପରିସ୍ଥିତିରେ, ସଦ୍ୟତମ ଆଘାତ ଟିମ୍ ଇଣ୍ଡିଆ ଏବଂ ଏହାର ପ୍ରଶଂସକମାନଙ୍କୁ ଅସୁବିଧାରେ ପକାଇପାରେ। ତଥାପି ଆଶ୍ୱସ୍ତିର କଥା ହେଉଛି ଯେ, କୋହଲିଙ୍କୁ ସାମାନ୍ୟ ଆଘାତ ଲାଗିଛି । ଭାରତୀୟ ଦଳର ସହାୟକ କର୍ମଚାରୀଙ୍କ ଅନୁସାରେ, କୋହଲି ଫାଇନାଲ ପାଇଁ ଫିଟ୍ ଅଛନ୍ତି ଏବଂ ସେ ପଡ଼ିଆକୁ ଓହ୍ଲାଇବେ।
ଭାରତ ପାଇଁ ସର୍ବାଧିକ ରନ
ଟାଇଟଲ ଜିତିବାକୁ ହେଲେ ବିରାଟ କୋହଲି ଫିଟ୍ ହୋଇ ପଡ଼ିଆକୁ ଆସିବା ଟିମ୍ ଇଣ୍ଡିଆ ପାଇଁ ବହୁତ ଗୁରୁତ୍ୱପୂର୍ଣ୍ଣ । ଏହି ଟୁର୍ଣ୍ଣାମେଣ୍ଟରେ ଏପର୍ଯ୍ୟନ୍ତ ବିରାଟଙ୍କ ପ୍ରଦର୍ଶନ ଭଲ ରହିଛି । ସେ ଭାରତ ପାଇଁ ସର୍ବାଧିକ ରନ କରିଛନ୍ତି। ପାକିସ୍ତାନ ବିପକ୍ଷରେ ଟାର୍ଗେଟର ପିଛା କରିବା ସମୟରେ କୋହଲି ୧୦୦ ରନର ଅପରାଜିତ ଇନିଂସ ଖେଳି ଦଳକୁ ବିଜୟୀ କରାଇଥିଲେ । ତା'ପରେ ସେମିଫାଇନାଲରେ ମଧ୍ୟ କୋହଲି ୮୪ ରନ କରି ଟିମ୍ ଇଣ୍ଡିଆକୁ ଅଷ୍ଟ୍ରେଲିଆ ବିପକ୍ଷରେ ବିଜୟୀ କରାଇଥିଲେ ଏବଂ ଫାଇନାଲକୁ ନେଇଯାଇଥିଲେ । କୋହଲି ଏପର୍ଯ୍ୟନ୍ତ ଟୁର୍ଣ୍ଣାମେଣ୍ଟର ୪ଟି ଇନିଂସରେ ୨୧୭ ରନ କରିଛନ୍ତି ।
