ଭୁବନେଶ୍ଵର, ୧୪/୦୩ : ଭିସୁଟ୍ ଛାତ୍ରଙ୍କ ଉପରେ ଲାଗିଲା ଅଙ୍କୁଶ। ୭ଟି ଜାଗାକୁ ଯିବା ଉପରେ କଟକଣା ଲଗାଇଲେ କର୍ତ୍ତୃପକ୍ଷ। ପାଓ୍ବାର କେନାଲ, ମହାନଦୀ, ସାଇଫନ୍, ୧୮ ହଜାର ପଏଣ୍ଟ୍, ରାଇଟ୍ ଡାଇକ, ଝାଙ୍କରାଣୀ ମନ୍ଦିର, ଫିସରି ପଏଣ୍ଟକୁ ଯିବା ଉପରେ କଟକଣା ଲାଗିଛି। ଛାତ୍ରମାନେ କେବେବି କୌଣସି ସମୟରେ ନଯିବା ପାଇଁ ନୋଟିସ ଜାରି କରିଛନ୍ତି ବିଶ୍ଵବିଦ୍ୟାଳୟ କର୍ତ୍ତୃପକ୍ଷ। ୧୮ ହଜାର ପଏଣ୍ଟ ପାୱାର କେନାଲରେ ଜଣେ ଛାତ୍ର ବୁଡ଼ି ଯିବାପରେ ଲାଗିଛି କଟକଣା।
ସୂଚନା ଥାଉକି, ଗୁରୁବାର ବୁର୍ଲା ଥାନା ଅଠର ହଜାର ନିକଟ ପାୱାର୍ କେନାଲ୍ରେ ବୁଡ଼ି ଭିସୁଟ୍ର ସିଭିଲ ଇଞ୍ଜିନିୟରିଂ ବିଭାଗର ପ୍ରଥମ ବର୍ଷର ଛାତ୍ର ପ୍ରିୟାଂଶୁ ପ୍ରକାଶ ବେହେରାଙ୍କ ମୃତ୍ୟୁ ଘଟିଛି। ପୂର୍ବରୁ ମଧ୍ୟ ପାୱାର କେନାଲରେ ବୁଡ଼ି ଭିସୁଟ୍ ଛାତ୍ର ପ୍ରାଣ ହରାଇଛନ୍ତି। ବାରମ୍ଵାର ଏଭଳି ଘଟଣା ଘଟୁଥିବାରୁ ଏବେ ବିଶ୍ଵବିଦ୍ୟାଳୟ କର୍ତ୍ତୃପକ୍ଷ କଠୋର ହୋଇଛନ୍ତି। ବୁର୍ଲା ସହର ସମେତ ଆଖପାଖରେ ଥିବା ବିପଜ୍ଜନକ ସ୍ଥାନକୁ ବ୍ଲାକ୍ ସ୍ପଟ୍ ଭାବେ ଚିହ୍ନଟ କରାଯାଇଛି। ଏସବୁ ସ୍ଥାନଗୁଡ଼ିକୁ ଭିସୁଟ୍ ଛାତ୍ରଛାତ୍ରୀ ବୁଲିବାକୁ ଯିବା ଉପରେ କଟକଣା ଜାରି କରାଯାଇଛି। ଏହାକୁ ଉଲ୍ଲଙ୍ଘନ କଲେ ଦୃଢ କାର୍ଯ୍ୟାନୁଷ୍ଠାନ ନିଆଯିବ। ହୋଲି ଥିବାରୁ ଭିସୁଟ ସୁରକ୍ଷା କର୍ମୀ ସ୍ୱତନ୍ତ୍ର ଗାଡ଼ିରେ ବିଭିନ୍ନ ସ୍ଥାନ ବୁଲି ଛାତ୍ରଛାତ୍ରୀଙ୍କ ଉପରେ ନଜର ରଖିବେ ବୋଲି କୁଳପତି ପ୍ରଫେସର ଦୀପକ କୁମାର ସାହୁ ସୂଚନା ଦେଇଛନ୍ତି।
ସୂଚନାଯୋଗ୍ୟ, ୨୦୨୨ ଏପ୍ରିଲ୍ ୨୯ରେ ଅଠର ହଜାର ପାୱାର୍ କେନାଲ ଘାଟରେ ଭିସୁଟ୍ ମେକାନିକାଲ୍ ଇଞ୍ଜିନିୟରିଂ ବିଭାଗର ଦ୍ୱିତୀୟ ବର୍ଷର ଛାତ୍ର ତ୍ରିଲୋଚନ ମହାରଣାଙ୍କ ମୃତ୍ୟୁ ଘଟିଥିଲା । ସେ ମଧ୍ୟ ସେମିଷ୍ଟର୍ ପରୀକ୍ଷା ପରେ ସାଙ୍ଗମାନଙ୍କ ସହ ଗାଧୋଇବାକୁ ଯାଇ ଭାସି ଯାଇଥିଲେ ।
ଏହି ଖବରଟିକୁ ପଢନ୍ତୁ-ଭଦ୍ରକ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଇସି ସଦସ୍ୟାଙ୍କ ବିକ୍ଷୋଭ
