ନୂଆଦିଲ୍ଲୀ, ୨୩/୦୪ : ପଶ୍ଚିମବଙ୍ଗ ଏବଂ ତାମିଲନାଡୁରେ ବିଧାନସଭା ନିର୍ବାଚନ ପାଇଁ ଭୋଟିଂ ଆରମ୍ଭ। ନେତା ବାଛୁଛନ୍ତି ଜନତା। ପଶ୍ଚିମବଙ୍ଗରେ ପ୍ରଥମ ପର୍ଯ୍ୟାୟରେ ୧୬ଟି ଜିଲ୍ଲାରେ ୧୫୨ ଆସନ ପାଇଁ ମତଦାନ ଚାଲିଛି। ମୋଟ ୪୪,୩୭୬ଟି ପୋଲିଂ ଷ୍ଟେସନରେ ମତଦାନ ଚାଲିଛି। ପ୍ରଥମ ପର୍ଯ୍ୟାୟ ନିର୍ବାଚନ ଲାଗି ମୋଟ ୧୪୭୮ ପ୍ରାର୍ଥୀ ନିର୍ବାଚନୀ ମଇଦାନକୁ ଓହ୍ଲାଇଛନ୍ତି । ୩.୬ କୋଟି ମତଦାତା ସେମାନଙ୍କର ଭାଗ୍ୟ ନିର୍ଦ୍ଧାରଣ କରିବେ। ଶାସକ ତୃଣମୂଳ କଂଗ୍ରେସ ଓ ବିଜେପି ମଧ୍ୟରେ ଜୋରଦାର୍ ଟକ୍କର ହେବ। ସେହିପରି ତାମିଲନାଡ଼ୁରେ ସମସ୍ତ ୨୩୪ ଆସନ ପାଇଁ ଭୋଟିଂ ଜାରି ରହିଛି। ୫.୭୩ କୋଟି ଭୋଟର ୪ ହଜାର ୨୩ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ। DMK-AIADMK ଫାଇଟ୍ ମଧ୍ୟରେ ବିଜୟଙ୍କ ଉପରେ ସମସ୍ତଙ୍କ ନଜର ରହିଛି। ଶାନ୍ତିପୂର୍ଣ୍ଣ ଏବଂ ନିଷ୍ପକ୍ଷ ମତଦାନ ସୁନିଶ୍ଚିତ କରିବାକୁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି।
ତାମିଲନାଡୁ ନିର୍ବାଚନ ଆରମ୍ଭ ହେବା ମାତ୍ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟବାସୀଙ୍କୁ ଭୋଟ ଦେବାକୁ ନିବେଦନ କରିଛନ୍ତି। ଟ୍ୱିଟରରେ ପୋଷ୍ଟ କରି ମୋଦି ଲେଖିଛନ୍ତି ଯେ, "ତାମିଲନାଡୁ ବିଧାନସଭା ନିର୍ବାଚନ ପାଇଁ ମତଦାନ ଚାଲିଥିବାରୁ, ମୁଁ ସମସ୍ତ ଭୋଟରଙ୍କୁ ଗଣତନ୍ତ୍ରର ଏହି ପବିତ୍ର ପର୍ବରେ ଉତ୍ସାହର ସହିତ ଅଂଶଗ୍ରହଣ କରିବାକୁ ଆହ୍ୱାନ କରୁଛି। ବିଶେଷକରି ତାମିଲନାଡୁର ଯୁବପିଢ଼ି ଏବଂ ମହିଳାମାନଙ୍କୁ ବହୁ ସଂଖ୍ୟାରେ ଭୋଟ ଦେବାକୁ ଅନୁରୋଧ କରୁଛି।"
As Tamil Nadu votes in the Assembly elections, I call upon all voters to take part enthusiastically in this sacred duty of democracy. I urge the youth and the women of Tamil Nadu in particular to come out and vote in record numbers.
— Narendra Modi (@narendramodi) April 23, 2026
ସେହିପରି ପଶ୍ଚିମବଙ୍ଗ ନିର୍ବାଚନ ପାଇଁ ମୋଦି ଲେଖିଛନ୍ତି ଯେ, "ପଶ୍ଚିମ ବଙ୍ଗ ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ଆଜି ଅନୁଷ୍ଠିତ ହେଉଛି। ମୁଁ ସମସ୍ତ ନାଗରିକଙ୍କୁ ଉତ୍ସାହର ସହିତ ଗଣତନ୍ତ୍ରର ଏହି ଉତ୍ସବରେ ଅଂଶଗ୍ରହଣ କରିବାକୁ ଅନୁରୋଧ କରୁଛି। ବିଶେଷକରି ମୋର ଯୁବ ବନ୍ଧୁ ଏବଂ ପଶ୍ଚିମବଙ୍ଗର ମହିଳାମାନଙ୍କୁ ବହୁ ସଂଖ୍ୟାରେ ଭୋଟ ଦେବାକୁ ନିବେଦନ କରୁଛି।"
Phase 1 of the West Bengal Assembly elections takes place today. I urge all citizens to participate in this festival of democracy with full strength. I especially appeal to my young friends and to the women of West Bengal to vote in large numbers.
— Narendra Modi (@narendramodi) April 23, 2026
ମତଦାନ ସକାଳ ୭ଟାରୁ ଆରମ୍ଭ ହୋଇ ସନ୍ଧ୍ୟା ୬ଯାଏ ଚାଲିବ। ନିର୍ବାଚନକୁ ସ୍ୱଚ୍ଛ, ନିରପେକ୍ଷ ଏବଂ ଶାନ୍ତିପୂର୍ଣ୍ଣ କରିବା ଲାଗି ନିର୍ବାଚନ କମିଶନ ସମସ୍ତ ସୁରକ୍ଷା ବ୍ୟବସ୍ଥା ଗ୍ରହଣ କରିଛନ୍ତି । ସେଥିମଧ୍ୟରେ କ୍ୱିକ୍ ରେସପନ୍ସ ଟିମ୍(କ୍ୟୁଆରଟି), ଫ୍ଲାଇଂ ସ୍କ୍ୱାଡ୍ ମୁତୟନ, ପୋଲିଂ ଷ୍ଟେସନରେ ସିସିଟିଭି ଲଗାଇବା ପ୍ରଭୃତି ସାମିଲ ରହିଛି। ପଶ୍ଚିମବଙ୍ଗରେ ବିଗତ ୧୫ ବର୍ଷ ହେଲା ମମତା ବାନାର୍ଜୀଙ୍କ ନେତୃତ୍ୱରେ ତୃଣମୂଳ କଂଗ୍ରେସ(ଟିଏମ୍ସି) କ୍ଷମତାରେ ରହିଛି। ଚଳିତଥର ସେଠାରେ ଟିଏମ୍ସି, ବିଜେପି ଏବଂ ବାମ ଦଳ ମଧ୍ୟରେ ମୁଖ୍ୟତଃ ଲଢ଼େଇ ଦେଖିବାକୁ ମିଳିବ। ସେହିପରି ଚଳିତଥର ତାମିଲନାଡୁରେ କଂଗ୍ରେସ ଡିଏମ୍କେ ସହ ମେଣ୍ଟ କରି ନିର୍ବାଚନ ଲଢୁଥିବାବେଳେ ବିଜେପି ବିରୋଧୀ ଏଆଇଏଡିଏମ୍କେ ସହ ମେଣ୍ଟ କରିଛି। ଏମାନଙ୍କ ବ୍ୟତୀତ ସୁପରଷ୍ଟାର ବିଜୟଙ୍କ ତାମିଲଗା ଭେଟ୍ରି କାଝଗମ୍(ଟିଭିକେ) ମଧ୍ୟ ମଇଦାନକୁ ଓହ୍ଲାଇଛି ।
ଏହି ଖବରଟିକୁ ପଢନ୍ତୁ- ଜାଣନ୍ତୁ ଭାରତରୁ ପାକିସ୍ତାନ ଗଲେ କେତେ ହେବ ଖର୍ଚ୍ଚ ?
