ନୂଆଦିଲ୍ଲୀ,୨୮/୦୪: ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ପାକିସ୍ତାନକୁ ଘେରି ରହିବା ପାଇଁ ପ୍ରସ୍ତୁତି ଆରମ୍ଭ କରିଛି। ଏଥିପାଇଁ ଭାରତ କେବଳ ବିଦେଶୀ କୂଟନୀତିଜ୍ଞଙ୍କୁ ଡାକି ଏହି ଆକ୍ରମଣରେ ପାକିସ୍ତାନର ସମ୍ପୃକ୍ତିର ପ୍ରମାଣ ଦେଖାଇଛି ତାହା ନୁହେଁ ବରଂ ବିଶ୍ବର ମହାଶକ୍ତି ସହ ମଧ୍ୟ କଥା ହୋଇଥିଲା। ଏହି ସମୟରେ ଭାରତ ଏବଂ ତାଲିବାନ ମଧ୍ୟରେ ଏକ ଉଚ୍ଚ ସ୍ତରୀୟ ବୈଠକ ମଧ୍ୟ ଅନୁଷ୍ଠିତ ହୋଇଛି ଯେଉଁଥିରେ ଉଭୟ ଦେଶର ବରିଷ୍ଠ ଅଧିକାରୀମାନେ ଅଂଶଗ୍ରହଣ କରିଛନ୍ତି। ଏହି ବୈଠକ ମଧ୍ୟ ଗୁରୁତ୍ୱପୂର୍ଣ୍ଣ, କାରଣ ତାଲିବାନ ଏବଂ ପାକିସ୍ତାନ ମଧ୍ୟରେ ସମ୍ପର୍କ ଭଲ ନୁହେଁ। ତାଲିବାନ ମଧ୍ୟ ପହଲଗାମ ଆକ୍ରମଣକୁ ନିନ୍ଦା କରିବା ସହ ଭାରତକୁ ସମର୍ଥନ ଜଣାଇଛି।
ବରିଷ୍ଠ ଭାରତୀୟ କୂଟନୀତିଜ୍ଞ ତଥା ବୈଦେଶିକ ବ୍ୟାପାର ମନ୍ତ୍ରଣାଳୟର ସଚିବ ଆନନ୍ଦ ପ୍ରକାଶ ଏବଂ ପିଏଆଇ (ପାକିସ୍ଥାନ, ଆଫଗାନିସ୍ତାନ ଏବଂ ଭାରତ ଡିଭିଜନ୍) ର ଚାର୍ଜ ଡି’ଆଫେୟାର ରବିବାର ଦିନ କାବୁଲରେ କାର୍ଯ୍ୟରତ ଆଫଗାନିସ୍ତାନ ବୈଦେଶିକ ମନ୍ତ୍ରୀ ଆମୀର ଖାନ ମୁଟାକିଙ୍କୁ ଭେଟିଛନ୍ତି। ମଧ୍ୟବର୍ତ୍ତୀ ଆଫଗାନିସ୍ତାନ ସରକାରଙ୍କ ଦ୍ବାରା ଜାରି ବିବୃତ୍ତି ଅନୁଯାୟୀ ଆଫଗାନିସ୍ତାନରେ ସ୍ଥଗିତ ପଦକ୍ଷେପକୁ ପୁନଃ ଜୀବିତ କରିବ ବୋଲି ତାଲିବାନ ଅଧିକାରୀଙ୍କୁ ଭାରତ କହିଛି ଏବଂ ଦେଶ ସହ ଜାରି ରହିଥିବା ସହଯୋଗ ପାଇଁ ଭାରତର ପ୍ରତିବଦ୍ଧତାକୁ ମଧ୍ୟ ନିଶ୍ଚିତ କରିଛି।
ଆଫଗାନିସ୍ତାନର କାର୍ଯ୍ୟକାରୀ ବୈଦେଶିକ ମନ୍ତ୍ରୀ ଆମୀର ଖାନ ମୁଟାକି ଭାରତ ସହ କୂଟନୈତିକ ତଥା ଅର୍ଥନୈତିକ ସମ୍ପର୍କକୁ ପ୍ରୋତ୍ସାହିତ କରିବା ଉପରେ ଗୁରୁତ୍ୱାରୋପ କରିଛନ୍ତି। ଅଧିକନ୍ତୁ, ମୁଟାକି ଭାରତୀୟ ନିବେଶକମାନଙ୍କୁ ଆଫଗାନିସ୍ତାନରେ ଉପଲବ୍ଧ ଅନୁକୂଳ ବିନିଯୋଗ ସୁଯୋଗର ଲାଭ ଉଠାଇବାକୁ ଅନୁରୋଧ କରିଛନ୍ତି। ଏହି ବୈଠକରେ ଦ୍ୱିପାକ୍ଷିକ ରାଜନୈତିକ ସମ୍ପର୍କ, ବାଣିଜ୍ୟ, ଗମନାଗମନ ଏବଂ "ସାମ୍ପ୍ରତିକ ଆଞ୍ଚଳିକ ରାଜନୈତିକ ବିକାଶ" ଉପରେ ମଧ୍ୟ ଆଲୋଚନା କରାଯାଇଥିଲା।
