ବଣାଇଁ,୧୪/୧୩: ସୁନ୍ଦରଗଡ଼ ଜିଲ୍ଲା ଟିକାୟତପାଲି ଥାନା ଅଧୀନ ଝିର୍ଡାପାଲୀ ଗ୍ରାମରେ ୭ ମାସର ଗର୍ଭବତୀ ସୌମ୍ୟାମୟୀ ବେହେରାଙ୍କ ହତ୍ୟା ଘଟଣାର ପର୍ଦ୍ଦାଫାସ କରିଛି ପୁଲିସ୍ । ପରକୀୟା ପ୍ରୀତିରୁ ସ୍ୱାମୀ ଦେବେନ ବେହେରା ହିଁ ହତ୍ୟା କରିଥିବା ଜଣାପଡ଼ିଛି । ଏଥିରେ ସହଯୋଗ କରିଥିଲେ ତାଙ୍କ ଶଳା ତଥା ପୁଲିସ୍ ଏଏସ୍ଆଇ ସତ୍ୟ ନାରାୟଣ ବେହେରା । ପୁଲିସ୍ ଶଳା ଓ ଭିଣୋଇଙ୍କୁ ଗିରଫ କରିବା ସହ ଘର ଭିତରେ ଭାତହାଣ୍ଡିରେ ଲୁଚାଇ ରଖାଯାଇଥିବା ବନ୍ଧୁକକୁ ଜବତ କରିଛି । ଦେବେନର ଅନ୍ୟ ଏକ ଯୁବତୀଙ୍କ ସହ ସମ୍ପର୍କ ଥିବା ସ୍ତ୍ରୀ ଜାଣିବା ପରେ ସବୁ ବେଳେ ଉଭୟଙ୍କ ମଧ୍ୟରେ ଲାଗୁଥିଲା ଝଗଡ଼ା । ବୁଧବାର ବିଳମ୍ବତ ରାତିରେ ସୌମ୍ୟାମୟୀଙ୍କୁ ଗୁଳି କରି ହତ୍ୟା କରିଥିଲା ଦେବେନ । ହେଲେ ହତ୍ୟା ପରେ ମିଛ ନାଟକ କରୁଥିଲା । ଲୁଟ୍ ପାଇଁ ଆସିଥିବା ଦୁର୍ବୃତ୍ତମାନେ ତାଙ୍କ ସ୍ତ୍ରୀକୁ ହତ୍ୟା କରିଥିବା ପୁଲିସ୍କୁ ଅଭିଯୋଗ କରିଥିଲା । ରାଉରକେଲା ଜିଲ୍ଲା ପୁଲିସ ମୁଖ୍ୟାଳୟରେ ଶୁକ୍ରବାର ସନ୍ଧ୍ୟାରେ ଆୟୋଜିତ ସାମ୍ବାଦିକ ସମ୍ମିଳନୀରେ ପଶ୍ଚିମାଞ୍ଚଳ ଡିଆଇଜି ବ୍ରିଜେଶ କୁମାର ରାୟ ଓ ଏସ୍ପି ନିତେଶ ୱାଧୱାନୀ
ସୂଚନା ଦେଇଥିଲେ ଯେ, ଝିର୍ଡାପାଲି ଗ୍ରାମରେ ଜଣେ ଗର୍ଭବତୀଙ୍କୁ ଗୁଳି କରି ହତ୍ୟା କରାଯାଇଥିବା ଖବର ପାଇବା ପରେ ଟିକାୟତପାଲି ପୁଲିସ୍ ଘଟଣା ସ୍ଥଳରେ ପହଞ୍ଚିଥିଲା । କିଏ ଓ କଣ ପାଇଁ ହତ୍ୟା କଲା ତାର ତଦନ୍ତ ଆରମ୍ଭ କରିଥିଲା । ଗୋଟିଏ ପୁଲିସ ଟିମ୍ ଘଟଣା ସ୍ଥଳରେ ଛାନ୍ଭିନ୍ ଆରମ୍ଭ କରିଥିବା ବେଳେ ଅନ୍ୟ ଟିମ୍ ମୃତ ମହିଳାଙ୍କ ସ୍ୱାମୀ ଓ ସମ୍ପର୍କୀୟମାନଙ୍କୁ ପଚରାଉଚରା ଚଳାଇଥିଲା । ଦେବେନ ପୁଲିସ୍କୁ କହିଥିଲା ବିଳମ୍ବିତ ରାତିରେ ତାଙ୍କ ଘରକୁ ଚୋରି କରିବାକୁ ଆସିଥିବା ଲୁଟେରାମାନେ ତାଙ୍କ ସ୍ତ୍ରୀକୁ ଗୁଳି କରି ପଳାଇ ଯାଇଥିଲେ । ସେ କେମିତି ଏକଥା ଜାଣି ପାରିଲେ ନାହିଁ ବୋଲି ପୁଲିସ୍ ପଚାରିବାରୁ ଦେବେନ ଏପଟସେପଟ କଥା କହିଥିଲା । ଦେବେନ ଉପରେ ପୁଲିସ୍ର ସନ୍ଦେହ ହୋଇଥିଲା ଓ ଅଧିକ ଜେରା ପରେ ସେ ସବୁ କଥା ମାନିଥିଲା ।
ଜଣେ ଯୁବତୀଙ୍କ ସହ ଦେବେନଙ୍କ ସମ୍ପର୍କ ରହିଥିଲା । ଏ ସମ୍ପର୍କରେ ସୌମ୍ୟାମୟୀ ଜାଣିବା ପରେ ସବୁ ସମୟରେ ଉଭୟଙ୍କ ମଧ୍ୟରେ ଝଗଡ଼ା ଲାଗୁଥିଲା । ତେଣୁ ସୌମ୍ୟାମୟୀ ଅନୁଗୁଳ ଜିଲ୍ଲା ଛେଣ୍ଡିପଦାସ୍ଥିତ ବାପ ଘରେ ରହୁଥିଲେ । ସ୍ୱାମୀଙ୍କ ଘରକୁ ଯିବା ଲାଗି ସେ ରାଜି ହେଉନଥିଲେ । ହେଲେ କିଛି ସପ୍ତାହ ତଳେ ସୌମ୍ୟାମୟୀ ସ୍ୱାମୀଙ୍କ ଘରକୁ ଆସିଥିଲେ । ସ୍ତ୍ରୀକୁ ସବୁ ଦିନ ପାଇଁ ରାସ୍ତାରୁ ହଟାଇବା ଲାଗି ଯୋଜନା କରିଥିଲା ଦେବେନ । ତେଣୁ ସେ ଶଳା ତଥା ରାଉରକେଲା ଉଦିତନଗର କୋର୍ଟରେ ଏଏସ୍ଆଇ ଭାବେ କାର୍ଯ୍ୟ କରୁଥିବା ସତ୍ୟ ନାରାୟଣ ବେହେରାଙ୍କ ସହାୟତା ନେଇଥିଲା । ଯୋଜନା ମୁତାବକ ବୁଧବାର ବିଳମ୍ବିତ ରାତିରେ ସୌମ୍ୟାମୟୀ ପରିସ୍ରା ପାଇଁ ଉଠିଥିବା ବେଳେ ବାହାରେ ଲୁଚି ରହିଥିବା ଦେବେନ ତାଙ୍କ ଉପରକୁ ଏକ ଦେଶୀ ବନ୍ଧୁକରୁ ଗୁଳି ଚଳାଇଥିଲା । ଗୁଳିଟି ସୌମ୍ୟାମୟୀଙ୍କ ବାମ ପଟ ଛାତିରେ ବାଜିଥିଲା ଓ ତାଙ୍କର ମୃତ୍ୟୁ ଘଟିଥିଲା । ଏହି କାଣ୍ଡ ଭିଆଇବା ପରେ ପୁଲିସ୍କୁ କ’ଣ କହିବାର ଅଛି, କେମିତି କହିବ, ବନ୍ଧୁକ କେଉଁଠାରେ ଲୁଚାଇବ ସେ ନେଇ ଦେବେନକୁ ଟିକିନିକି ବୁଝାଇ ଦେଇଥିଲେ ସତ୍ୟନାରାୟଣ ।
ପୁଲିସ୍ ଘଟଣାର ପର୍ଦ୍ଦାଫାସ କରିବା ପରେ ଘର ଭିତରେ ଥିବା ଭାତହାଣ୍ଡିରୁ ବନ୍ଧୁକ, ୩ ରାଉଣ୍ଡ ଗୁଳି, ଗୋଟିଏ ଖୋକା ଓ ସ୍କ୍ରର୍ପିଓ (ଓଡି୧୪ଏସି ୩୫୩୧)କୁ ଜବତ କରିଛି । ଦେବେନ ଓ ସତ୍ୟନାରାୟଣଙ୍କୁ ଗିରଫ କରାଯାଇଛି । ସତ୍ୟନାରାୟଣଙ୍କ ଉପରେ ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିଆଇଜି ଶ୍ରୀ ରାୟ କହିଛନ୍ତି । ଅଭିଯୁକ୍ତମାନଙ୍କୁ ଘଟଣାସ୍ଥଳକୁ ପୁଲିସ୍ ନେଇ ସିନ୍ ରିକ୍ରିଏସନ୍ କରିଥିଲା । ଶନିବାର ସେମାନଙ୍କୁ ବଣାଇଁ କୋର୍ଟକୁ ଚାଲାଣ କରାଯିବ ।
