ପାଣାଜୀ, ୧୯।୧: ପାରାଗ୍ଲାଇଡିଂ ବେଳେ ଅଘଟଣ । ଗୋଆରେ ପାରାଗ୍ଲାଇଡିଂ ବେଳେ ଦୁଇ ଜଣଙ୍କର ମୃତ୍ୟୁ ହୋଇଥିବା ଜଣାପଡ଼ିଛି । ମୃତକଙ୍କ ମଧ୍ୟରେ ପୁଣେର ଜଣେ ୨୭ ବର୍ଷୀୟ ମହିଳା ଶିବାନୀ ଓ ୨୬ ବର୍ଷୀୟ ପାରାଗ୍ଲାଇଡିଂ ପାଇଲଟ ସୁମନ ନେପାଳୀ । ଉଭୟଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଛି । ଜାନୁଆରୀ ୧୮ରେ ବିନା ଅନୁମତିରେ ଓ ସୁରକ୍ଷା ଉପକରଣ ବିନା ପାରାଗ୍ଲାଇଡିଂ ବେଳେ ଉଭୟଙ୍କର ମୃତ୍ୟୁ ହୋଇଥିବା କହିଛି ଗୋଆ ପୋଲିସ । ଏନେଇ ଗୋଆ ପୋଲିସ ଏକ ମାମଲା ରୁଜୁ କରିଥିବା ବେଳେ ପାରାଗ୍ଲାଇଡିଂ କମ୍ପାନୀର ମାଲିକକୁ ଗିରଫ କରିଛି ।
କହିରଖୁ କି, ଏହି ଦୁର୍ଘଟଣା ୧୮ ଜାନୁଆରୀରେ ହୋଇଥିଲା । ପୁଲିସର କହିବାନୁସାରେ, ସୁରକ୍ଷା ନିୟମରେ ଅବହେଳା ଓ ବିନା ଅନୁମତିରେ ପାରାଗ୍ଲାଇଡିଂ କରିଥିବାରୁ ଏଭଳି ଅଘଟଣ ଘଟିଛି । ଯାହା ଫଳରେ ଦୁଇଜଣଙ୍କର ମୃତ୍ୟୁ ହୋଇଛି । ପରେ ଘଟଣାରେ ଆକ୍ସନ ନେବା ପରେ ପାରାଗ୍ଲାଇଡିଂ କମ୍ପାନୀର ମାଲିକ ଶେଖର ରାୟଜାଦାଙ୍କୁ ଗିରଫ କରିଛି ଗୋଆ ପୋଲିସ । ବିନା ଅନୁମତି ଓ ସୁରକ୍ଷା ଉପକରଣ ବିନା କମ୍ପାନୀ ପାଇଲଟଙ୍କୁ ବିଦେଶୀ ପର୍ଯ୍ୟଟକଙ୍କ ସହ ପାରାଗ୍ଲାଇଡିଂ ପାଇଁ କିଭଳି ମାଲିକ ଜଣକ ଅନୁମତି ଦେଇଛନ୍ତି ସେନେଇ ପ୍ରଶ୍ନ ଉଠିଛି । ଗୋଆର ପୋଲିସ ମହାନିର୍ଦ୍ଦେଶକ ଆଲୋକ କୁମାର ନିଜ ବୟାନରେ କହିଛନ୍ତି, କମ୍ପାନୀ ଓ ଏହାର ମାଲିକଙ୍କ ବିରୋଧରେ ହତ୍ୟା ମାମଲା ରୁଜୁ ହୋଇଛି । ପୋଲିସର କହିବାନୁସାରେ, କମ୍ପାନୀର ମାଲିକ ଶେଖର ରାୟଜାଦା ଜାଣିଶୁଣି ନିଜ କମ୍ପାନୀର ପାଇଲଟଙ୍କୁ ବିନା ଲାଇସେନ୍ସରେ ପାରାଗ୍ଲାଇଡିଂ କରିବାକୁ ଅନୁମତି ଦେଇଛନ୍ତି । ତେବେ ବର୍ତ୍ତମାନ ଘଟଣାର ଅଧିକ ତଦନ୍ତ ଜାରି ରହିଛି । ମାମଲା ରୁଜୁ ହେବା ପରେ ଅଭିଯୁକ୍ତ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ।
