ନୂଆଦିଲ୍ଲୀ: ଚେନ୍ନାଇର ଏକ ଚେଳ ଷ୍ଟେସନ ନିକଟରେ ଜଣେ ୨୫ ବର୍ଷିୟା ମହିଳା ପୋଲିସ ଅଫିସରଙ୍କୁ ଆକ୍ରମଣ କରିବା ସହ ଲୁଟପାଟ କରିଛନ୍ତି ଜଣେ ଦୁର୍ବୃର୍ତ୍ତ। ଏହି ଦୁର୍ଘଟଣା ଗତ ଶନିବାର ବିଳମ୍ବିତ ରାତିରେ ଘଟିଥିଲା ବୋଲି ଜଣାପଡିଛି। ତେବେ ସେଠାରେ ଉପସ୍ଥିତ ଥିବା ଲୋକମାନେ ଦୁର୍ବୃର୍ତ୍ତ ଜଣକୁ ନିଜ ଆୟତକୁ ଆଣିବା ସହ ପୋଲିସର ଜିମା ଦେଇଛନ୍ତି।
ସୂଚନା ମୁତାବକ, ମହିଳା ପୋଲିସ ଅଫିସର ଜଣଙ୍କ ତାମିଲନାଡୁର ସାଇବର ଇଣ୍ଚେଲିଜେନ୍ସ ଉଇଙ୍ଗରେ କାର୍ଯ୍ୟ କରନ୍ତି। ଶନିବାର ଘରକୁ ଯିବା ପାଇଁ ସେ ରାତି ୧୧ଟା ୩୦ ସୁଦ୍ଧା ଏଗମୋରେ ରେଳ ଷ୍ଟେସନରେ ଏକ ଟ୍ରେନ ଧରିଥିଲେ। ତେବେ ଟ୍ରେନଟି ପାଜାଭନ୍ତାଙ୍ଗଲ ରେଳ ଷ୍ଟେସନରେ ପହଞ୍ଚିବା ପରେ ତାଙ୍କୁ ଦୁର୍ବୃର୍ତ୍ତ ଜଣକ ଟ୍ରେନରୁ ଥଳକୁ ଠେଲି ଦେଇଥିଲେ। ପରେ ଦୁର୍ବୃର୍ତ୍ତ ଜଣକ ତାଙ୍କ ବେକରେ ପଡିଥିବା ସୁନାଚ୍ନକୁ ଝାମ୍ପି ନେବାକୁ ଚେଷ୍ଟା କରିଥିଲେ।
ଲୁଟ କରି ଦୁର୍ବୃର୍ତ୍ତ ଜଣକ ଘଟଣାସ୍ଥରୁ ଚମ୍ପଟ ମାରୁଥିବା ବେଳେ ମହିଳା ପୋଲିସ ଅଧିକାରି ଜଣଙ୍କ ସାହାଯ୍ୟ ପାଇଁ ପାଟିକରିଥିଲେ। ତାଙ୍କ ପାଟି ଶୁଣି ନିକଟରେ ଥିବା ଯାତ୍ରୀମାନେ ଘଟଣାସ୍ଥଳକୁ ଆସି ଦୁର୍ବୃର୍ତ୍ତକୁ କାବୁ କରିଥିଲେ। ଘଟଣାସ୍ଥଳରେ ଉପସ୍ଥିତ ଥିବା ଲୋକମାନେ ତାକୁ ଉତ୍ତମମଧ୍ୟମ ଦେବା ସହ ରେଳ ପୋଲିସର ଜିମା ଦେଇଥିଲେ। ତେବେ ଦୁର୍ବୃର୍ତ୍ତ ଜଣକର ନାମ ସତ୍ୟାନ ହୋଇଥିବା ବେଳେ ତା ଘର ଚିଟ୍ଲାପକ୍କମ ଅଞ୍ଚଳରେ ବୋଲି ସୂଚନା ମିଳିଛି।
ମାବାଲମ ପୋଲିସ ନିଜଆଡୁ ଏକ ମାମଲା ରୁଜୁ କରି ଏହି ଘଟଣାର ଛାନବିନ ଜାରି ରଖିଛି।
ବିଗତ କିଛି ସପ୍ତାହ ମଧ୍ୟରେ ତାମିଲନାଡୁର ବିଭିନ୍ନ ରେଳ ଷ୍ଚେସନ ଅଞ୍ଚଳ ଗୁଡିକରେ ଅପରାଧର ସଂଖ୍ୟା ବଢିଚାଲିଛି। କେବଳ ଗତ ସପ୍ତାହରେ ଜଣେ ୨୬ ବର୍ଷିୟା ମହିଲା ଯାତ୍ରୀ ଚଳନ୍ତା ଟ୍ରେନରେ ଯୌନ ନିର୍ଯାତନାର ଶିକାର ହୋଇଥିଲେ। ଏହି ଘଟଣାରେ ପୋଲିସ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା।
ପୂର୍ବରୁ ଜଣେ ଚାରିମାସର ଗର୍ଭବତୀ ମହିଳାଙ୍କୁ ମଧ୍ୟ ଯୌନ ନିର୍ଯାତନାର ଶିକାର ହେବା ସହ ତାଙ୍କୁ ଜୋଲାରପ୍ରିତ ଅଞ୍ଚଲରେ ଚଳନ୍ତା ଟ୍ରେନରୁ ଠେଲିଦିଆଯାଇଥିଲା। ଏହି ଦୁର୍ଘଟଣାରେ ମହିଳା ଜଣଙ୍କୁ ଗୁରୁତର ଆଘାତ ଲାଗିବା ସହ ତାଙ୍କର ଗର୍ଭପାତ ହୋଇଯାଇଥିଲା।
