ନୂଆଦିଲ୍ଲୀ, ୧୭।୪: ବର୍ତ୍ତମାନ ବିଶ୍ୱବ୍ୟାପୀ ରାଜନୀତିରେ ମହିଳାମାନଙ୍କ ଭାଗିଦାରୀକୁ ନେଇ ଚର୍ଚ୍ଚା ଜୋର ଧରିଛି । ଭାରତରେ ମହିଳା ସଂରକ୍ଷଣ ଆଇନ କାର୍ଯ୍ୟକାରୀ ହେବାକୁ ନେଇ ନୂଆ ଆଶା ସଞ୍ଚାର ହୋଇଥିବାବେଳେ, ପଡ଼ୋଶୀ ପାକିସ୍ତାନ ଏବଂ ଆଫ୍ରିକୀୟ ଦେଶ ରୁୱାଣ୍ଡାର ତଥ୍ୟ ସମସ୍ତଙ୍କୁ ଚକିତ କଲାଭଳି । ସତ୍ତା ଏବଂ ନୀତି ନିର୍ଦ୍ଧାରଣରେ ମହିଳାମାନଙ୍କୁ ସମାନ ଅଧିକାର ଦେବାରେ କେଉଁ ଦେଶର ସ୍ଥିତି କିପରି, ଆସନ୍ତୁ ଜାଣିବା ଏହି ବିସ୍ତୃତ ରିପୋର୍ଟରୁ । ଭାରତ ସରକାର 'ମହିଳା ସଂରକ୍ଷଣ ଅଧିନିୟମ ୨୦୨୩' କୁ ନେଇ ଏକ ଗୁରୁତ୍ୱପୂର୍ଣ୍ଣ ବିଜ୍ଞପ୍ତି ଜାରି କରିଛନ୍ତି । କେନ୍ଦ୍ର ଆଇନ ମନ୍ତ୍ରଣାଳୟ ଅନୁଯାୟୀ, ଲୋକସଭା ଏବଂ ରାଜ୍ୟ ବିଧାନସଭାଗୁଡ଼ିକରେ ମହିଳାଙ୍କ ପାଇଁ ୩୩ ପ୍ରତିଶତ ସଂରକ୍ଷଣ ସୁନିଶ୍ଚିତ କରୁଥିବା ଏହି ଆଇନ ଏପ୍ରିଲ ୧୬ ରୁ କାର୍ଯ୍ୟକାରୀ ହୋଇଛି । ତେବେ ଜନଗଣନା ଏବଂ ସୀମା ନିର୍ଦ୍ଧାରଣ ପ୍ରକ୍ରିୟା ପରେ ଏହା ୨୦୨୯ ନିର୍ବାଚନ ବେଳକୁ ସମ୍ପୂର୍ଣ୍ଣ ଭାବେ ଲାଗୁ ହେବାର ସମ୍ଭାବନା ରହିଛି ।
ପାକିସ୍ତାନ ସଂସଦରେ ମହିଳାଙ୍କ ସ୍ଥିତି:
ଭାରତର ପଡ଼ୋଶୀ ଦେଶ ପାକିସ୍ତାନର ସାମ୍ବିଧାନିକ ଢାଞ୍ଚାରେ ମହିଳାଙ୍କ ପାଇଁ ପୂର୍ବରୁ ସ୍ୱତନ୍ତ୍ର ବ୍ୟବସ୍ଥା ରହିଛି । ନ୍ୟାସନାଲ ଆସେମ୍ବଲିରେ ମୋଟ୍ ଆସନ ମଧ୍ୟରୁ ୬୦ଟି ଆସନ ମହିଳାଙ୍କ ପାଇଁ ସଂରକ୍ଷିତ । ସିନେଟ୍ ରେ ମହିଳାଙ୍କ ପାଇଁ ୧୭ଟି ଆସନ ସଂରକ୍ଷିତ ରହିଛି । ପ୍ରାଦେଶିକ ସ୍ତରରେ ମଧ୍ୟ ପାକିସ୍ତାନରେ ମୋଟ୍ ୧୬୮ଟି ଆସନ ମହିଳାଙ୍କ ପାଇଁ ସୁରକ୍ଷିତ ରଖାଯାଇଛି । ଏଥିମଧ୍ୟରୁ ପଞ୍ଜାବ ପ୍ରଦେଶରେ ସର୍ବାଧିକ ୬୬ଟି ଆସନ ରହିଛି ।
ନିର୍ବାଚନରେ କଡ଼ା ନିୟମ: ୫% ଟିକେଟ୍ ଅନିର୍ବାଯ୍ୟ
ପାକିସ୍ତାନର 'ନିର୍ବାଚନ ଅଧିନିୟମ ୨୦୧୭' ଅନୁଯାୟୀ, ପ୍ରତ୍ୟେକ ରାଜନୈତିକ ଦଳ ଅନ୍ତତଃ ୫ ପ୍ରତିଶତ ମହିଳା ପ୍ରାର୍ଥୀଙ୍କୁ ଟିକେଟ୍ ଦେବା ବାଧ୍ୟତାମୂଳକ । ଏପରିକି, ଯଦି କୌଣସି ନିର୍ବାଚନ ମଣ୍ଡଳୀରେ ମହିଳା ମତଦାନ ୧୦ ପ୍ରତିଶତରୁ କମ୍ ହୁଏ, ତେବେ ସେଠାକାର ଫଳାଫଳକୁ ରଦ୍ଦ କରାଯାଇପାରିବ । ମହିଳାମାନଙ୍କୁ ଭୋଟ୍ ଦେବାକୁ ଉତ୍ସାହିତ କରିବା ପାଇଁ ଏହି ବ୍ୟବସ୍ଥା କରାଯାଇଛି ।
ଏହା ବି ପଢ଼ନ୍ତୁ... ପାକିସ୍ତାନରେ ଭୟଙ୍କର ଗ୍ୟାସ୍ ପାଇପଲାଇନ୍ ବିସ୍ଫୋରଣ, ଜଳିଗଲେ ଗୋଟିଏ ପରିବାରର ୮ ଜଣ
ବିଶ୍ୱରେ ସବୁଠୁ ଆଗରେ 'ରୁୱାଣ୍ଡା':
ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଯେ, ମହିଳା ପ୍ରତିନିଧିତ୍ୱ ମାମଲାରେ ଆମେରିକା କିମ୍ବା ବ୍ରିଟେନ୍ ନୁହେଁ, ବରଂ ଆଫ୍ରିକୀୟ ଦେଶ ରୁୱାଣ୍ଡା ବିଶ୍ୱରେ ପ୍ରଥମ ସ୍ଥାନରେ ରହିଛି । ରୁୱାଣ୍ଡା ସଂସଦର ନିମ୍ନ ସଦନରେ ମହିଳାଙ୍କ ସଂଖ୍ୟା ୬୧ ପ୍ରତିଶତରୁ ଅଧିକ । ସେଠାକାର ସମ୍ବିଧାନରେ ୨୪ଟି ଆସନ ସଂରକ୍ଷିତ ଥିଲେ ମଧ୍ୟ ମହିଳାମାନେ ସାଧାରଣ ଆସନରେ ମଧ୍ୟ ବହୁ ସଂଖ୍ୟାରେ ବିଜୟୀ ହେଉଛନ୍ତି । ରୁୱାଣ୍ଡା ବ୍ୟତୀତ କ୍ୟୁବା, ନିକାରାଗୁଆ, ମେକ୍ସିକୋ ଏବଂ ୟୁନାଇଟେଡ୍ ଆରବ ଏମିରେଟ୍ସ (UAE) ଭଳି ଦେଶରେ ମହିଳା ସାଂସଦଙ୍କ ସଂଖ୍ୟା ୫୦ ପ୍ରତିଶତରୁ ଅଧିକ । ଏହି ଦେଶଗୁଡ଼ିକ ପ୍ରମାଣ କରିଛନ୍ତି ଯେ ସାମାଜିକ ସମର୍ଥନ ଏବଂ ସଠିକ୍ ସାମ୍ବିଧାନିକ ନୀତି ମାଧ୍ୟମରେ ମହିଳାମାନେ ପୁରୁଷଙ୍କ ସହ କାନ୍ଧକୁ କାନ୍ଧ ମିଶାଇ ଦେଶ ଚଳାଇବାରେ ସକ୍ଷମ । ଭାରତ ମଧ୍ୟ ୨୦୨୩ର ନୂଆ ଆଇନ ବଳରେ ବିଶ୍ୱର ଏହି ଶୀର୍ଷ ତାଲିକାରେ ସ୍ଥାନ ପାଇବାକୁ ଲକ୍ଷ୍ୟ ରଖିଛି ।
