ନୂଆଦିଲ୍ଲୀ,୧୪/୧୨: ବ୍ଲୁମ୍ବର୍ଗ ପକ୍ଷରୁ ବିଶ୍ୱର ସବୁଠାରୁ ଧନୀ ପରିବାରଗୁଡ଼ିକର ଏକ ତାଲିକା ପ୍ରକାଶ ପାଇଛି । ଏଥିରେ ଶୀର୍ଷ ସ୍ଥାନରେ ରହିଛି ୱାଲ୍ମାର୍ଟ ୱାଲ୍ଟନ୍ ପରିବାର । ମୋଟ୍ ୪୩୨୪୦ କୋଟି ଡଲାରର ସମ୍ପତ୍ତି ସହିତ ଏହି ପରିବାର ୨୦୨୪ରେ ପୁନଃ ପ୍ରଥମ ସ୍ଥାନ ଅଳଙ୍କୃତ କରିଛି । ବିଶ୍ୱର ସବୁଠାରୁ ଧନୀ ବ୍ୟକ୍ତି ଏଲନ୍ ମସ୍କଙ୍କ ବ୍ୟକ୍ତିଗତ ସମ୍ପତ୍ତିଠାରୁ ୱାଲ୍ଟନ୍ ପରିବାରର ସମ୍ପତ୍ତି ଅଧିକ ରହିଛି । ଭାରତରୁ ଅମ୍ବାନି ପରିବାର ଏ ତାଲିକାରେ ଅଷ୍ଟମ ସ୍ଥାନରେ ରହିଛି । ଅମ୍ବାନି ପରିବାରର ମୋଟ ସମ୍ପତ୍ତି ହେଉଛି ୯୯୬୦ କୋଟି ଡଲାର। ସେହିଭଳି ସାପୁର୍ଜୀ ପାଲୋଞ୍ଜିଙ୍କ ମିସ୍ତ୍ରୀ ପରିବାର ୪୧୪୦ କୋଟି ଡଲାରର ସମ୍ପତ୍ତି ସହ ତାଲିକାରେ ୨୩ ତମ ସ୍ଥାନରେ ରହିଥିବା ଜଣାପଡ଼ିଛି ।
ରିପୋର୍ଟ ଅନୁସାରେ, ୱାଲ୍ମାର୍ଟ ସେୟାର୍ର ଉତ୍ତମ ପ୍ରଦର୍ଶନ ଯୋଗୁ ବିଶ୍ୱ ଧନୀ ପରିବାର ତାଲିକା-୨୦୨୪ରେ ଶୀର୍ଷ ସ୍ଥାନକୁ ଫେରିଛି ୱାଲ୍ଟନ ପରିବାର । ଚଳିତବର୍ଷ ଡିସେମ୍ବର ୧୦ ସୁଦ୍ଧା ୱାଲ୍ମାର୍ଟ ସେୟାର୍ ୮୦% ବୃଦ୍ଧି ପାଇଛି । ଏହି ଅଭିବୃଦ୍ଧି ଯୋଗୁ ୱାଲ୍ଟନ୍ ପରିବାରର ମିଳିତ ସମ୍ପତ୍ତି ୧୭୨୭୦ କୋଟି ଡଲାର ବଢ଼ିଛି । ଉକ୍ତ ହିସାବରେ ଦିନକୁ ହାରାହାରି ୪୭.୩୨ କୋଟି ଡଲାର ଏବଂ ମିନିଟ୍କୁ ୩୨୮,୫୭୭ ଡଲାର ଯୋଡ଼ିଛି ଏହି ପରିବାର । ରାଜସ୍ୱ ହିସାବରେ ୱାଲ୍ମାର୍ଟ ବିଶ୍ୱର ସର୍ବବୃହତ୍ ରିଟେଲର ।
ରିପୋର୍ଟ ମୁତାବକ ବିଶ୍ୱବ୍ୟାପୀ ଅରବପତିମାନେ ଏ ବର୍ଷ ମିଳିତ ଭାବେ ୪୦୬୫୦ କୋଟି ଡଲାରର ସମ୍ପତ୍ତି ଯୋଡ଼ିଛନ୍ତି । ୩୨୩୯୦ କୋଟି ଡଲାର ସମ୍ପତ୍ତି ସହିତ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ର ଅଲ୍ ନେହୟାନ ପରିବାର ତାଲିକାରେ ଦ୍ୱିତୀୟ ସ୍ଥାନରେ ରହିଛି । ସେହିଭଳି କତାର୍ର ଅଲ୍ ଥାନି ପରିବାର ୧୭୨୯୦ କୋଟି ଡଲାରର ସମ୍ପତ୍ତି ସହିତ ତାଲିକାରେ ତୃତୀୟ ସ୍ଥାନରେ ରହିଛନ୍ତି । ଫ୍ରାନ୍ସର ହର୍ମେସ୍ ପରିବାର ୧୭୦୬୦ କୋଟି ଡଲାର ସମ୍ପତ୍ତି ସହ ତାଲିକାରେ ଚତୁର୍ଥ ସ୍ଥାନରେ ଥିବାବେଳେ ଆମେରିକାର କୋଚ୍ ପରିବାର ୧୪୮୫୦ କୋଟି ଡଲାର ନେଟ୍ ସମ୍ପତ୍ତି ସହ ପଞ୍ଚମ ସ୍ଥାନରେ ରହିଛନ୍ତି । ଚଳିତବର୍ଷ ଶ୍ରେଷ୍ଠ ୧୦ରେ ସ୍ଥାନିତ ହୋଇଛି ମୁକେଶ ଅମ୍ବାନିଙ୍କ ନେତୃତ୍ୱାଧୀନ ଭାରତର ଅମ୍ବାନି ପରିବାର।
