ତୁରେକେଲା, ୧୬/୬: ଦିନକୁ ଦିନ ବଲାଙ୍ଗିର ଜିଲ୍ଲା ତୁରେକେଲା ବ୍ଲକ ଅଞ୍ଚଳରେ କ୍ୱାକ୍ଙ୍କ ପ୍ରାଦୁର୍ଭାବ ବଢ଼ି ଚାଲିଛି । ଭୁଲ୍ ଇଞ୍ଜେକ୍ସନ ଯୋଗୁଁ ଅନେକଙ୍କ ଜୀବନ ହାନି ଘଟୁଥିବା ଅଭିଯୋଗ ଆସୁଛି । ଏଭଳି ଏକ ଅଭିଯୋଗ ଆସିଛି ମହୁଲପାଟି ଗାଁରୁ । କ୍ୱାକ୍ର ଭୁଲ୍ ଇଞ୍ଜେକ୍ସନରେ ତୁରେକେଲା ବ୍ଲକ ମହୁଳପାଟି ଗ୍ରାମର ଜଣେ ମହିଳାଙ୍କ ମୃତ୍ୟୁ ହୋଇଥିବା ସୂଚନା ମିଳିଛି ।
ମହୁଲପାଟି ଗାଁର ଡିଙ୍ଗର ପୁଟା ତାଙ୍କ ସ୍ତ୍ରୀ ଭବାନୀ ପୁଟା ଚାଷ କାମ କରି ଘରକୁ ଫେରିଥିଲେ । ଭବାନୀଙ୍କ ହାତ ଗୋଡ଼ ବିନ୍ଧିବାରୁ ଲର୍କି ଗାଁର କ୍ୱାକ୍ ରଞ୍ଜିତ ମେହେର ମହୁଳପାଟି ଆସୁଥିଲେ । ତାଙ୍କଠାରୁ ଇଞ୍ଜେକ୍ସନ ନେଇଥିଲେ । କ୍ୱାକ ଜଣକ ମହିଳାଙ୍କୁ ଏକ ଇଞ୍ଜେକ୍ସନ ଦେବା ପରେ ମହିଳା ଜଣକ ହଠାତ୍ ଅଚେତ୍ ହୋଇପଡ଼ିଥିଲେ । ଅଚେତ୍ ଅବସ୍ଥାରେ ପରିବାର ଲୋକେ ତାଙ୍କୁ ତୁରେକେଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିବା ବେଳେ ସେଠାରେ ଡାକ୍ତର ମୃତ ଘୋଷଣା କରିଛନ୍ତି । ଯାହା ପରେ ପରିବାର ଲୋକେ ସମ୍ପୃକ୍ତ କ୍ୱାକ୍ ନାଁରେ ତୁରେକେଲା ଥାନାରେ ଅଭିଯୋଗ କରିଛନ୍ତି । ପୁଲିସ ଘଚଣାର ତଦନ୍ତ ଆରମ୍ଭ କରିଥିବା ବେଳେ କ୍ୱାକ୍ ଫେରାର ଥିବା ଥାନାରୁ ସୂଚନା ମିଳିଛି ।
