ନୂଆଦିଲ୍ଲୀ: ନବରାତ୍ରି ଏବଂ ଦୀପାବଳି ଅବସରରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ରାଜ୍ୟବାସୀଙ୍କୁ ଏକ ବଡ ଉପହାର ଦେଇଛନ୍ତି । ପ୍ରଧାନ ମନ୍ତ୍ରୀ ଉଜ୍ଜଳା ଯୋଜନାର ହିତାଧିକାରୀଙ୍କୁ ମାଗଣା ଏଲପିଜି ସିଲିଣ୍ଡର ଯୋଗାଇବାକୁ ମୁଖ୍ୟମନ୍ତ୍ରୀ ଯୋଗୀ ଘୋଷଣା କରିଛନ୍ତି। ସିଏମ ଯୋଗୀଙ୍କ ଏହି ନିଷ୍ପତ୍ତି ଦ୍ବାରା ରାଜ୍ୟର ଦୁଇ କୋଟି ପରିବାର ଉପକୃତ ହେବେ ଏବଂ ଉତ୍ସବର ଆନନ୍ଦ ଦ୍ୱିଗୁଣିତ ହେବ । ଦୀପାବଳି ଅବସରରେ ମାଗଣା ଏଲପିଜି ସିଲିଣ୍ଡର ପାଇବା ମହିଳା ମାନଙ୍କ ପାଇଁ ଏକ ଉତ୍ତମ ଉପହାର । 

ସିଏମ୍ ଯୋଗୀ ଆଦିତ୍ୟନାଥ ଉତ୍ସବକୁ ଦୃଷ୍ଟିରେ ରଖି ମଙ୍ଗଳବାର ଅଧିକାରୀଙ୍କ ସହ ଏକ ବୈଠକ କରିଥିଲେ ଏବଂ ଏହି ବୈଠକରେ ସେ ସମସ୍ତ ଅଧିକାରୀଙ୍କୁ ଦୀପାବଳି ସମୟରେ ପ୍ରଧାନ ମନ୍ତ୍ରୀ ଉଜ୍ଜଳା ଯୋଜନାର ହିତାଧିକାରୀଙ୍କୁ ମାଗଣା ଏଲପିଜି ସିଲିଣ୍ଡର ଯୋଗାଇବାକୁ ନିର୍ଦ୍ଦେଶ ଦେଇଛନ୍ତି । ମୁଖ୍ୟମନ୍ତ୍ରୀ ଏହା ମଧ୍ୟ କହିଛନ୍ତି ଯେ ସଂପୃକ୍ତ ଅଧିକାରୀମାନେ ଏହି ନିଷ୍ପତ୍ତି ସହ ଜଡିତ ସମସ୍ତ ଔପଚାରିକତାକୁ ଠିକ୍ ସମୟରେ ପୂରଣ କରିବା ଉଚିତ୍ । ସିଏମ ଯୋଗୀ ଟ୍ୱିଟରରେ ଏହି ବିଷୟରେ ସୂଚନା ଦେଇଛନ୍ତି। ସମସ୍ତ ହିତାଧିକାରୀ ଦୀପାବଳି ପୂର୍ବରୁ ଗ୍ୟାସ ସିଲିଣ୍ଡର ପାଇବା ଉଚିତ୍ ବୋଲି ସେ କହିଛନ୍ତି । 

ସୂଚନାଥାଉକି, ଯେ ୟୁପିରେ ଉଜ୍ଜଳା ଯୋଜନାର ଦୁଇ କୋଟି ହିତାଧିକାରୀ ଅଛନ୍ତି ଏବଂ ସିଏମ ଯୋଗୀଙ୍କ ଏହି ନିଷ୍ପତ୍ତି ସେହି ଦୁଇ କୋଟି ଲୋକଙ୍କୁ ଉପକୃତ କରିବ । ତେବେ ଗ୍ୟାସ ସଂଯୋଗ ସହିତ ଆଧାର ସଂଯୁକ୍ତ ନଥିବା ହିତାଧିକାରୀଙ୍କୁ ଯେପରି କୌଣସି ଅସୁବିଧା ନହୁଏ ସେଥିପ୍ରତି ଧ୍ୟାନ ଦେବାକୁ ସେ କହିଛନ୍ତି ।  

ସୂଚନାଥାଉକି, ଉତ୍ତରପ୍ରଦେଶ ବିଧାନସଭା ନିର୍ବାଚନ ସମୟରେ ସିଏମ ଯୋଗୀ ଘୋଷଣା କରିଥିଲେ ଯେ ଯଦି ତାଙ୍କ ସରକାର କ୍ଷମତାକୁ ଆସନ୍ତି ତେବେ ବର୍ଷକୁ ଦୁଇଥର ମାଗଣା ଗ୍ୟାସ ସିଲିଣ୍ଡର ଦିଆଯିବ । ରାଜ୍ୟରେ ପ୍ରଥମ ଥର ପାଇଁ ଦୀପାବଳୀରେ ଏବଂ ଦ୍ୱିତୀୟ ଥର ପାଇଁ ହୋଲିରେ ଦିଆଯିବ ।