ରାଜକନିକା/ନମୌଜା,୨୯/୭ : କେନ୍ଦ୍ରାପଡ଼ା ଜିଲ୍ଲା ଆଳି ଓ ରାଜକନିକା ଥାନା ଅନ୍ତର୍ଗତ ବଡ଼ ଆଙ୍କୋ ଓ ଜୟନଗର ଅଞ୍ଚଳର ୪ ଯୁବକ ସୁଦୂର ଲାଓସକୁ ଦାଦନ ଖଟିବାକୁ ଯାଇ ନିର୍ଯାତନାର ଶିକାର ହୋଇଛନ୍ତି l ଏ ନେଇ ଏକ ଭିଡିଓ ମାଧ୍ୟମରେ ସେମାନେ ଘରକୁ ବାର୍ତ୍ତା ପଠାଇବା ପରେ ପରିବାର ଲୋକେ ଆତଙ୍କିତ ହୋଇ ସେମାନଙ୍କ ମୁକ୍ତି ଲାଗି ସରକାରଙ୍କ ନିକଟରେ ନିବେଦନ କରିଛନ୍ତି l
ପ୍ରକାଶ ଯେ, ଆଳି ଥାନା ବାଳକାଟୀ ପଞ୍ଚାୟତ ବଡ଼ଆଙ୍କୋ ଗ୍ରାମର ମେଘୁ ପ୍ରଧାନଙ୍କ ପୁଅ ଗଦାଧର, ସନାତନ ବାରିକଙ୍କ ପୁଅ ରଞ୍ଜନ ଓ ଗୋବର୍ଦ୍ଧନ ସାମଲଙ୍କ ପୁଅ ସୁମନ, ସେହିପରି ରାଜକନିକା ଥାନା ଜୟନଗର ଗ୍ରାମର ଅନନ୍ତ ଚରଣ ନାୟକଙ୍କ ପୁଅ ଲକ୍ଷ୍ମୀଧର ମୋଟ ୪ ଜଣ ଜଣେ ଠିକାଦାରର ପ୍ରଲୋଭନରେ ପଡ଼ି ସୁଦୂର ଲାଉସ ହଙ୍କ ପ୍ଲାୟା ସ୍ଥାନରେ କାର୍ଯ୍ୟ କରି ଆସୁଥିଲେ l ସେମାନେ ଆଜକୁ ପ୍ରାୟ ୪ମାସ ହେବ ଉକ୍ତ ସ୍ଥାନରେ ଶ୍ରମିକ ଭାବେ କାର୍ଯ୍ୟ କରି ଆସୁଥିଲେ l ହେଲେ ବିଗତ ୩ମାସରୁ ଊର୍ଦ୍ଧ୍ବ ହେବ ଠିକାଦାର ତାଙ୍କୁ ପାରିଶ୍ରମିକ ଦେଉ ନ ଥିବା ସେମାନେ ଗତକାଲି ଏକ ଭିଡ଼ିଓ ବାର୍ତ୍ତା ମାଧ୍ୟମରେ ଜଣାଇଛନ୍ତି l ତତ ସହିତ ସେମାନଙ୍କ ପାସପୋର୍ଟକୁ ଫେରାଉ ନ ଥିବା ମଧ୍ୟ ସେ ଏହି ଭିଡିଓରେ ପ୍ରକାଶ କରିଛନ୍ତି l ଘରର ଆର୍ଥିକ ପରିସ୍ଥିତି ସମସ୍ତଙ୍କୁ ବିଦେଶ ଯିବାକୁ ବାଧ୍ୟ କରିଥିଲା l କିନ୍ତୁ ଦୀର୍ଘ ୩ମାସ ହେବ କାମ କରିବା ପରେ ମଧ୍ୟ ପାରିଶ୍ରମିକ ଦିଆ ନ ଯାଇ ତାଙ୍କୁ ନିର୍ଯାତନା ଦିଆଯାଉଥିବା ନେଇ ସେ ନିଜ ଘର ପରିବାର ଲୋକଙ୍କୁ କାନ୍ଦି କହିବା ସହିତ ଏକ ଭିଡ଼ିଓ ସରକାରଙ୍କ ପାଖକୁ ପଠାଇଛନ୍ତି l ଏହି କଥା ଜାଣିବା ପରେ ଯୁବକମାନଙ୍କ ପରିବାର ଲୋକେ ଦୁଃଖରେ ଭାଙ୍ଗି ପଡ଼ିଛନ୍ତି l ସରକାର ଯୁବକମାନଙ୍କୁ ଲାଉସରୁ ଉଦ୍ଧାର କରିବା ପାଇଁ ତାଙ୍କ ପରିବାର ଲୋକେ ହାତ ଯୋଡ଼ି ନିବେଦନ କରିଛନ୍ତି l
