ନୂଆଦିଲ୍ଲୀ: ମଙ୍ଗଳବାର ଶ୍ରୀନଗରର ଝୋଲମ ନଦୀରେ ଏକ ଡଙ୍ଗା ବୁଡ଼ି ଦୁର୍ଘଟଣା ଘଟିଛି । ଦୁର୍ଘଟଣାରେ ୨ ଶିଶୁଙ୍କ ସମେତ ୬ ଜଣଙ୍କର ମୃତ୍ୟୁ ହୋଇଛି । ୬ ଜଣଙ୍କୁ ଉଦ୍ଧାର କରାଯାଇଥିବା ବେଳେ ୩ ଜଣ ନିଖୋଜ ଅଛନ୍ତି । ଡଙ୍ଗାରେ ସମୁଦାୟ ୧୫ ଜଣ ଲୋକ ଥିଲେ, ଯେଉଁଥିରେ ୭ ଜଣ ସ୍କୁଲ ପିଲା ଏବଂ ୮ ଜଣ ଅନ୍ୟ ଥିଲେ । ଶ୍ରୀନଗରର ଜିଲ୍ଲା କଲେକ୍ଟର ଏହି ସୂଚନା ଦେଇଛନ୍ତି ।
ଜିଲ୍ଲା କଲେକ୍ଟର କହିଛନ୍ତି ଯେ ସକାଳ ୭.୪୫ ରୁ ୮ ଟା ମଧ୍ୟରେ ଏହି ଦୁର୍ଘଟଣା ଘଟିଛି। ବର୍ଷା ଯୋଗୁଁ ନଦୀର ଜଳ ସ୍ତର ବୃଦ୍ଧି ପାଇଥିଲା, ଯେଉଁଥିପାଇଁ ପ୍ରଶାସନ ସତର୍କ ସୂଚନା ଜାରି କରିଥିଲା । ତେବେ ରାତିରେ ବର୍ଷା ବନ୍ଦ ହେବା ପରେ ଜଳ ସ୍ତର ସାମାନ୍ୟ ହ୍ରାସ ପାଇଥିଲା । ସକାଳୁ ଏସଡିଆରଏଫ (SDRF), ପୋଲିସ ଏବଂ ସେନା ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ବର୍ତ୍ତମାନ ନିଖୋଜ ଲୋକଙ୍କୁ ଖୋଜାଖୋଜି କରାଯାଉଛି ।
ଦୁର୍ଘଟଣାକୁ ନେଇ ପ୍ରତ୍ୟକ୍ଷଦର୍ଶୀ କହିଛନ୍ତି ଯେ,"ଡଙ୍ଗା ଅଧା ବାଟକୁ ଆସିବା ପରେ ଦଉଡି ଛିଣ୍ଡି ଯାଇଥିଲା । ଏହା ପରେ ଡଙ୍ଗାଟି ଏକ କୋଣରେ ଧକ୍କା ହୋଇଥିଲା । ଏହା ପରେ ଡଙ୍ଗାରେ ବସିଥିବା ୧୫-୨୦ ଲୋକ ବୁଡ଼ି ଯାଇଥିଲେ । ଆମେ ଗୋଟିଏ ଝିଅ ଏବଂ ଦୁଇ ପୁଅଙ୍କୁ ଉଦ୍ଧାର କରିଥିଲୁ।"