ଚେନ୍ନାଇ: ଆଇପିଏଲ ୨୦୨୪ର ୩୯ ତମ ମ୍ୟାଚ୍ରେ ବଡ଼ ସ୍କୋର କରିଛି ଚେନ୍ନାଇ ସୁପର କିଙ୍ଗ୍ସ (ସିଏସକେ) । ଆଜିର ମ୍ୟାଚ୍ରେ ଅଧିନାୟକ ଋତୁରାଜ ଗାଏକ୍ବାଡ ଅପରାଜିତ ୧୦୮ ରନ୍ କରି ସମସ୍ତଙ୍କୁ ଚକିତ କରିଦେଇଛନ୍ତି । ୬୦ ବଲ୍ରୁ୧୨ ଚୌକା ଏବଂ ୩ଟି ଛକା ସହ ଦମଦାର ଶତକ କରିଛନ୍ତି ଗାଏକ୍ବାଡ ।
ସେହିଭଳି ଶିବମ ଦୁବେ ୬୬ ରନ୍ କରିଛନ୍ତି । ଆଜି ପୁଣି ଥରେ ମହେନ୍ଦ୍ର ସିଂହ ଧୋନି ଖେଳପ୍ରେମୀଙ୍କୁ ଖୁସି କରିଦେଇଛନ୍ତି । ମାତ୍ର ଗୋଟିଏ ବଲ୍ ଖେଳିବାର ସୁଯୋଗ ପାଇଥିବା ଧୋନି ଗୋଟିଏ ବଲ୍ରେ ଚୌକା ମାରିଛନ୍ତି । ତେବେ ନିର୍ଦ୍ଧାରିତ ଓଭରରେ ୪ ଓ୍ବିକେଟ ହରାଇ ସିଏସକେ ୨୧୦ ରନ୍ କରିଛି । ଏହା ସହ ଲକ୍ଷ୍ନୌ ସୁପର ଜ୍ୟାଣ୍ଟସ୍କୁ ୨୧୧ ରନ୍ର ଲକ୍ଷ୍ୟ ଦେଇଛି ସିଏସକେ ।
ଆଜିର ମ୍ୟାଚ୍ରେ ଟସ୍ ହାରି ବ୍ୟାଟିଂ କରିବାକୁ ଆସିଥିବା ଚେନ୍ନାଇ ଟିମ୍ ମାତ୍ର ୪ ରନ୍ରେ ପ୍ରଥମ ଓ୍ବିକେଟ (ଅଜିଙ୍କ୍ୟ ରାହାଣେ) ହରାଇଥିଲା । ଦଳୀୟ ସ୍କୋର ୪୯ ରନ୍ ବେଳକୁ ଦଳକୁ ଦ୍ବିତୀୟ ଝଟକା ଲାଗିଥିଲା ।ଡାରିଲ ମିଚେଲ ୧୧ ରନ୍ କରି ୟଶ ଠାକୁରଙ୍କ ହାତରେ କ୍ୟାଚ୍ ଆଉଟ୍ ହୋଇ ପ୍ୟାଭିଲିୟନ୍ ଫେରିଥିଲେ ।ପରେ ପରେ ରବୀନ୍ଦ୍ର ଜାଡେଜା ୧୬ ରନ୍ କରି ଆଉଟ ହୋଇଥିଲେ ।
ଜାଡେଜାଙ୍କ ପରେ କ୍ରିଜ୍କୁ ଆସିଥିବା ଶିବମ ଦୁବେ ଏବଂ ଋତୁରାଜଙ୍କ ଯୋଡ଼ି ଦଳୀୟ ସ୍କୋରକୁ ଆଗକୁ ନେଇଥିଲେ । ଶିବମ ଦୁବେ ୬୬ ରନ୍ କରି ଆଉଟ୍ ହୋଇଥିଲେ ।ସେପଟେ ଲକ୍ଷ୍ନୌ ଟିମ୍ର ମ୍ୟାଟ ହେନରି, ମୋହସିନ ଖାନ, ୟଶ ଠାକୁର ଗୋଟିଏ ଲେଖାଏଁ ଓ୍ବିକେଟ ନେଇଥିଲେ ।