ନୂଆଦିଲ୍ଲୀ: ଛତିଶଗଡର କାଙ୍କେରରୁ ଏକ ବଡ ଖବର ଏବେ ସାମ୍ନାକୁ ଆସିଛି । ଏଠାରେ ସୁରକ୍ଷା ବାହିନୀ ସହ ନକ୍ସଲ ମୁହାଁମୁହିଁ ହୋଇଛନ୍ତି । ଉଭୟଙ୍କ ପକ୍ଷରୁ ଗୁଳିବିନିମୟ ଜାରି ରହିଛି । ଯବାନଙ୍କ ଦୃଢ ଜବାବରେ ୨୯ ଜଣ ନକ୍ସଲଙ୍କ ମୁଣ୍ଡ ଗଡିଛି । ଏଥି ସହ ଏହି ଅଭିଯାନରେ ତିନି ଜଣ ସୈନିକ ଆହତ ହୋଇଛନ୍ତି । ସୂଚନାନୁସାରେ, ହତ୍ୟା କରାଯାଇଥିବା ନକ୍ସଲମାନଙ୍କ ମଧ୍ୟରେ ନକ୍ସଲାଇଟ୍ ଡିଭିସି କମାଣ୍ଡର ଶଙ୍କର ରାଓ, ଡିଭିସି ସଦସ୍ୟ ଲଳିତା ଏବଂ ଡିଭିସି ସଦସ୍ୟ ମାଧବୀଙ୍କୁ ହତ୍ୟା କରାଯାଇଥିବା ସୂଚନା ରହିଛି । ଏମାନଙ୍କ ମୁଣ୍ଡ ପାଇଁ ୨୫ ଲକ୍ଷ ଟଙ୍କା ପୁରସ୍କାର ଘୋଷଣା ହୋଇଥିଲା । କାଙ୍କେରର ଛୋଟେ ବେଥିଆ ପୋଲିସ ଷ୍ଟେସନର କଲପର୍ ଜଙ୍ଗଲରେ ଏନକାଉଣ୍ଟର ଚାଲିଛି ।
ଗଣମାଧ୍ୟମକୁ ମିଳିଥିବା ସୂତ୍ରରୁ ପ୍ରକାଶ ଯେ ଘଟଣା ସ୍ଥଳରୁ ୫ଟି AK 47 ଏବଂ LMG ଅସ୍ତ୍ରଶସ୍ତ୍ର ଉଦ୍ଧାର ବିଷୟରେ ସୂଚନା ମିଳିଛି । ଏହି ଏନକାଉଣ୍ଟରରେ ଜଣେ ଇନ୍ସପେକ୍ଟରଙ୍କ ସମେତ ତିନିଜଣ ସୈନିକ ଆହତ ହୋଇଛନ୍ତି। ଇନ୍ସପେକ୍ଟରଙ୍କ ଗୋଡରେ ଗୁଳି ବାଜିଥିବାବେଳେ କନଷ୍ଟେବଳ ସାମାନ୍ୟ ଆହତ ହୋଇଛନ୍ତି । ଏଡିଜି ନକ୍ସଲ ଅପରେସନ ବିବେକାନନ୍ଦ ସିନ୍ହା କହିଛନ୍ତି ଯେ, ଏନକାଉଣ୍ଟରରେ କିଛି ନକ୍ସଲ ନିହତ ହୋଇଛନ୍ତି । ଆହତ ଯବାନଙ୍କ ସ୍ଥିତିରେ ସୁଧାର ଆସିଛି ଏବଂ ସେମାନେ ବିପଦମୁକ୍ତ ରହିଛନ୍ତି । ଏହି ଅଞ୍ଚଳରେ ଏବେବି ସର୍ଚ୍ଚ ଅପରେସନ ଜାରି ରହିଛି । ଏହି ଘଟଣା ଅପରାହ୍ନ ୨ଟା ସମୟରେ ଘଟିଥିବା କୁହାଯାଉଛି ।
ବର୍ତ୍ତମାନ ସମୟରେ ଛତିଶଗଡରେ ନକ୍ସଲ ମାନଙ୍କ ବିରୋଧରେ ନିରନ୍ତର ଅପରେସନ୍ ଚାଲିଛି । ସମ୍ପ୍ରତି ବସ୍ତର ଅଞ୍ଚଳରେ ଜଣେ ମହିଳା ନକ୍ସଲ ସମେତ ଦୁଇ ନକ୍ସଲ ସୁରକ୍ଷା ବାହିନୀ ନିକଟରେ ଆତ୍ମ ସମର୍ପଣ କରିଥିଲେ ।