ବେଙ୍ଗାଲୁରୁ: କୋଲକାତା ନାଇଟ ରାଇଡର୍ସ (କେକେଆର) ଏବଂ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ( ଆରସିବି) ମଧ୍ୟରେ ଟକ୍କର ଜାରି ରହିଛି । ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା କେକେଆର । ଏହା ପରେ ବ୍ୟାଟିଂ ପାଇଁ ପଡ଼ିଆକୁ ଆସିଥିବା ଆରସିବି ନିର୍ଦ୍ଧାରିତ ଓଭରରେ ୬ ଓ୍ବିକେଟ ହରାଇ ୧୮୨ ରନ୍ କରିଛି । କେକେଆର ସାମ୍ନାରେ ୧୮୩ ରନ୍ର ବିଶାଳ ଟାର୍ଗେଟ୍ ରଖିଛି ଆରସିବି । ଆଜିର ମ୍ୟାଚ୍ରେ ବିରାଟ କୋହଲି ବିଶାଳ ସ୍କୋର କରିଛନ୍ତି । ୫୯ ବଲ୍ରୁ ଅପରାଜିତ ୮୩ ରନ୍ କରିଛନ୍ତି କିଙ୍ଗ କୋହଲି । ୪ ଛକା ଏବଂ ୪ ଚୌକା ସହ କୋହଲି ଏହି ରନ୍ କରିଛନ୍ତି ।
ବେଙ୍ଗାଲୁରୁର ଏମ. ଚିନ୍ନାସ୍ବାମୀ ଷ୍ଟାଡିୟମରେ ଖେଳାଯାଉଥିବା ହାଇଭୋଲଟେଜ୍ ମ୍ୟାଚ୍ରେ ପ୍ରଥମେ ଆରସିବି ବ୍ୟାଟିଂ ବପିର୍ଯ୍ୟୟର ସାମ୍ନା କରିଥିଲା । ଦଳୀୟ ସ୍କୋର ୧୭ ରନ୍ ଥିବା ବେଳେ ଅଧିନାୟକ ଫାଫ୍ ଡୁପ୍ଲେସିସ୍ ଆଉଟ୍ ହୋଇଥିଲେ । ୬ ବଲରେ ମାତ୍ର ୮ ରନ୍ କରି ପାଭିଲିୟନ୍ ଫେରିଥିଲେ ଡୁପ୍ଲେସିସ୍ । ତାଙ୍କ ପରେ କ୍ୟାମେରନ୍ ଗ୍ରୀନ୍ ୩୩ ରନ୍ କରି ଆଉଟ ହୋଇଥିବା ବେଳେ ଗ୍ଲେନ୍ ମ୍ୟାକ୍ସଓ୍ବେଲ ୨୮ ରନ୍ରେ ଅଟକି ଯାଇଥିଲେ । ତାପରେ ପରେ ରଜତ ପଟିଦାର ଏବଂ ଅନୁଜ ରାଓ୍ବାତ ଆଉଟ ହୋଇଥିଲେ ।
ସେପଟେ ବିରାଟ କୋହଲି କିନ୍ତୁ ନିଜର ଜଲଓ୍ବା ଦେଖାଇଥିଲେ । ଅପରାଜିତ ୮୩ ରନ୍ କରି କୋହଲି ଆରସିବି ଫ୍ୟାନଙ୍କୁ ଖୁସି କରାଇ ଦେଇଛନ୍ତି । ବେଙ୍ଗାଲୁରୁ ଷ୍ଟାଡିୟମରେ ଆଜି ଆରସିବି ଫ୍ୟାନ୍ସଙ୍କ ଉତ୍ସାହକୁ ଆହୁରି ବଢ଼ାଇ ଦେଇଛନ୍ତି ବିରାଟ କୋହଲି । ଅନ୍ୟପଟେ କେକେଆର ଟିମର ବୋଲର ହର୍ଷିତ ରାଣା ଏବଂ ଆଣ୍ଡ୍ରେ ରସେଲ୍ ୨ଟି ଲେଖାଏଁ ଓ୍ବିକେଟ ନେଇଥିଲେ । ସେହିଭଳି ସୁନୀଲ ନାରାୟଣ ୪୦ ରନ୍ ଦେଇ ଗୋଟିଏ ଓ୍ବିକେଟ ଅକ୍ତିଆର କରିଥିଲେ । ଚଳିତ ଆଇପିଏଲର ସବୁଠାରୁ ଦାମୀ ବୋଲର ମିଚେଲ୍ ଷ୍ଟାର୍କ ସର୍ବାଧିକ ୪୭ ରନ୍ ଦେଇଥିବା ବେଳେ ଗୋଟିଏ ବି ଓ୍ବିକେଟ ନେବାରେ ସଫଳ ହୋଇନାହାନ୍ତି ।