ମସ୍କୋ: ଆମେରିକାର ନାଗରିକଙ୍କୁ ଋଷରେ ବନ୍ଦୀ ଜୀବନ କାଟିବାକୁ ପଡ଼ୁଛି । ଅର୍ଥାତ ଋଷିଆ ଆମେରିକୀୟ ନାଗରିକଙ୍କୁ ଜେଲରେ ପୂରାଉଛି । ଗୁପ୍ତଚର ସମେତ ଅନ୍ୟ ଅଭିଯୋଗରେ ସେମାନଙ୍କୁ ଗିରଫ କରାଯାଉଥିବା କୁହାଯାଉଛି । ଫଳରେ ଋଷ ଜେଲରେ ଆମେରିକୀୟ କଏଦୀଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଏହାରି ମଧ୍ୟରେ ଆଉ କିଛି ଆମେରିକୀୟଙ୍କୁ ଋଷିଆ ଜେଲରେ ଭର୍ତ୍ତି କରାଯାଇଛି । ଏମାନଙ୍କ ମଧ୍ୟରେ ଜଣେ ସାମ୍ବାଦିକ, ଜଣେ କର୍ପୋରେଟ୍ ସୁରକ୍ଷା ଅଧିକାରୀ ସାମିଲ ଅଛନ୍ତି ।
ଋଷିଆ ନିଜର ରାଜନୈତିକ ହିତ ସାଧନ ପାଇଁ ଆମେରିକୀୟଙ୍କୁ ଜେଲରେ ବନ୍ଦୀ କରୁଥିବା ନେଇ ଓ୍ବାସିଂଟନ ପକ୍ଷରୁ ଅଭିଯୋଗ ହୋଇଆସିଛି । ହେଲେ ଋଷିଆର କହିବା କଥା ହେଲା ଏମାନେ ସମସ୍ତେ ଦୋଷ କରିଛନ୍ତି । ସେପଟେ ଋଷୀୟ ବନ୍ଦୀଙ୍କୁ ଜେଲରୁ ମୁକୁଳାଇବା ପାଇଁ ସେମାନଙ୍କ ବଦଳରେ ଆମେରିକୀୟଙ୍କୁ ଭର୍ତ୍ତି କରାଯାଉଥିବା ଅଭିଯୋଗ ହୋଇଛି । ହେଲେ ଏନେଇ କୌଣସି ପ୍ରମାଣ ମିଳିପାରି ନାହିଁ।
ସେପଟେ ଋଷିଆର ଜଣେ ପୂର୍ବତନ କୂଟନୈତିଜ୍ଞ ବୋରିସ ବନ୍ଦାରେଭଙ୍କ ମତରେ, ବୋଧହୁଏ ଋଷ ବନ୍ଧକଙ୍କୁ ଉପଯୋଗ କରିବାକୁ ଚେଷ୍ଟା କରୁଛି । ୨୦୨୨ରେ ୟୁକ୍ରେନ ଉପରେ ଋଷିଆ ଆକ୍ରମଣ କରିବା ପରେ ବନ୍ଦାରେଭ ପଦରୁ ଇସ୍ତଫା ଦେଇ ଦେଇଥିଲେ । ତେବେ ଓ୍ବାଲ୍ ଷ୍ଟ୍ରିଟ୍ ଜର୍ଣ୍ଣାଲର ଜଣେ ୩୨ ବର୍ଷୀୟ ସାମ୍ବାଦିକ ଇବାନ୍ ଗେର୍ଶକୋବିଚଙ୍କ ଗିରଫଦାରୀକୁ ଶୁକ୍ରବାର ଏକ ବର୍ଷ ପୂରିଛି । ଗୁପ୍ତଚର ଅଭିଯୋଗରେ ସେ ମସ୍କୋରେ ଥିବା ଲେଫୋରତୋବା ଜେଲରେ ବନ୍ଦୀ ଅଛନ୍ତି ।
ସେହିଭଳି ଆମେରିକାର ଆଉ ଜଣେ ନାଗରିକ ଯିଏ ଜଣେ କର୍ପୋରେଟ ସୁରକ୍ଷା ଅଧିକାରୀ ଥିଲେ ତାଙ୍କୁ ୨୦୧୮ରେ ଗିରଫ କରାଯାଇଛି । ଗୁଇନ୍ଦାଗିରି କରୁଥିବା ଅଭିଯୋଗରେ ପଲ ହ୍ବେଲନ୍ ଦୁଇ ବର୍ଷ ଲାଗି ଜେଲ ଯାଇଥିଲେ । ପରେ ତାଙ୍କୁ ୧୬ ବର୍ଷ ଜେଲ୍ ଦଣ୍ଡାଦେଶ ଦେଇଛନ୍ତି କୋର୍ଟ । ସେ ନିଜ ବନ୍ଧୁଙ୍କ ବିବାହରେ ସାମିଲ ହେବାକୁ ମସ୍କୋ ଯାଇଥିଲେ । ଏହା ଉପରେ ଆମେରିକା ମଧ୍ୟ ପ୍ରତିକ୍ରିୟା ପ୍ରକାଶ କରିଛି ।
ଗେର୍ଶକୋବିଚ୍ ଏବଂ ହ୍ବେଲନଙ୍କୁ ଜାଣିଶୁଣି ଜେଲରେ ଭର୍ତ୍ତି କରାଯାଇଛି ବୋଲି ଆମେରିକା ଅଭିଯୋଗ କରିଛି । ଆମେରିକାର ଜଣେ ସଂଗୀତଜ୍ଞ ଟ୍ରାଭିସ ଲିକଙ୍କୁ ମାଦକ ଦ୍ରବ୍ୟ ସଂପର୍କିତ ଏକ ମାମଲାରେ ୧୪ ବର୍ଷ ଜେଲ ଦଣ୍ଡ ମିଳିଛି । ଦୈତ ନାଗରିକତା ରଖିଥିବା ଏ. କୁରୁମାଶୋବା ଏବଂ ସୋନିଆ ଖବାନାଙ୍କୁ ମଧ୍ୟ ଋଷରେ ଗିରଫ କରାଯାଇଛି ।
