ଫିରିଙ୍ଗିଆ,୩/୭ : ଗୋଚ୍ଛାପଡା ଥାନା ବାଲନ୍ଦାପଡା ପଞ୍ଚାୟତର ସାର୍ତ୍ତାଗୁଡା ଠାରେ ଏକ ଡକାୟତି ଯୋଜନାକୁ ପଣ୍ଡ କରିଛନ୍ତି ଗ୍ରାମବାସୀ। ଚାରିଟି ମୋଟର ସାଇକେଲ ସହିତ ଦୁଇ ଜଣ ଯୁବକକୁ ଧରି ପୁଲିସ ଜିମା ଦେଇଛନ୍ତି।
ସୂଚନା ଅନୁଯାୟୀ, ବୁଧବାର ରାତି ପ୍ରାୟ ୧୨ଟା ବେଳେ ପାଞ୍ଚ ଜଣ ଯୁବକ ଚାରିଟି ମୋଟର ସାଇକେଲରେ ସାର୍ତ୍ତାଗୁଡା ଗାଁରେ ପଶିଥିଲେ। ସେମାନେ ଡକାୟତି ପାଇଁ ଉଦ୍ୟମ କରୁଥିବା ବେଳେ ଗ୍ରାମବାସୀ ଆସିଯିବାରୁ ସେମାନେ ଧାଇଁ ପଳାଇବା ଉଦ୍ୟମ କରିଥିଲେ। ତେବେ ଗ୍ରାମବାସୀ ସେମାନଙ୍କୁ ପିଛା କରି ଦୁଇ ଜଣଙ୍କୁ ଧରିବାରେ ସକ୍ଷମ ହୋଇଥିଲେ। ଅନ୍ୟମାନେ ବାଇକ ଛାଡି ଦେଇ ଫେରାର ହୋଇ ଯାଇଥିଲେ। ଗାଁ ଲୋକେ ଚାରିଟି ବାଇକ ସହ ଦୁଇ ଜଣଙ୍କୁ ଗୋଚ୍ଛାପଡା ପୁଲିସ ଜିମା ଦେଇଛନ୍ତି। ଏମାନଙ୍କ ମଧ୍ୟରୁ ଜଣେ ସମ୍ବଲପୁର ଅଞ୍ଚଳର ହୋଇଥିବା ବେଳେ ଅନ୍ୟ ଜଣେ ବଲାଙ୍ଗୀର ଅଞ୍ଚଳର ବୋଲି ଜଣାପଡିଛି। ଏ ନେଇ ତଦନ୍ତ ଚାଲିଥିବା କହିଛନ୍ତି ଥାନା ଅଧିକାରୀ ଚିରଞ୍ଜିବୀ ବେହେରା।
