ୱାଶିଂଟନ,୧୬/୧୧: ଆମେରିକାର ନବନର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କ ଟିମ ଗଠନ କରିବାରେ ବ୍ୟସ୍ତ ଅଛନ୍ତି । ଆସନ୍ତା ଜାନୁଆରୀ ୨୦ ତାରିଖରେ ରାଷ୍ଟ୍ରପତି ଭାବେ ଶପଥ ନେବେ ଟ୍ରମ୍ପ । ଏହା ପୂର୍ବରୁ ସେ ତାଙ୍କର ଶକ୍ତିଶାଳୀ ଦଳ ତିଆରିରେ ଲାଗି ପଡିଛନ୍ତି । ଏଲମ ମସ୍କ, ଏମ ରାମାସ୍ବାମୀ ଓ ତୁଲସୀଙ୍କୁ ବଡ ଦାୟିତ୍ବ ଦେବା ପରେ ଏବେ ହ୍ବାଇଟ ହାଉସର ଗଣମାଧ୍ୟମ ସଚିବ ନିୟୁକ୍ତ କରିଛନ୍ତି । ୨୭ ବର୍ଷୀୟ କାରୋଲିନ ଲେଭିଟଙ୍କୁ ଗଣମାଧ୍ୟମ ସଚିବ ଦାୟିତ୍ବ ମିଳିଛି ।

ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟିମରେ କାରୋଲିନ ଲେଭିଟ ସର୍ବ କନିଷ୍ଠ ସଚିବ ହୋଇଛନ୍ତି । ଯାହା ଆମେରିକା ଇତିହାସରେ ପ୍ରଥମ । ଏହା ପୂର୍ବରୁ ଏହି ରେକର୍ଡ ରେନାଲ୍ଡ ଜିଗଲରଙ୍କୁ ମିଳିଥିଲା । ୧୯୬୯ରେ ରିଚର୍ଡ ନିକ୍ଲସନଙ୍କ କାର୍ଯ୍ୟକାଳରେ ସେ ୨୯ ବର୍ଷ ବୟସରେ ହ୍ବାଇଟ ହାଉସ ପ୍ରେସ ସଚିବ ହୋଇଥିଲେ । ୨୦୨୪ ନିର୍ବାଚନ କ୍ୟାମ୍ପେନରେ ସେ ପ୍ରମୁଖ ଭୂମିକା ତୁଲାଇଥିଲେ । କାରୋଲିନ ସଠିକ ତଥ୍ୟ ଦେଇ ଆମେରିକାକୁ ପୁଣି ଶ୍ରେଷ୍ଠ କରିବେ ବୋଲି ଆଶାବାଦୀ ଅଛନ୍ତି ଡୋନାଲ୍ଡ ଟ୍ରମ୍ପ ।

କାରୋଲିନଙ୍କୁ ଦାୟିତ୍ବ ଦେବା ପରେ ଟ୍ରମ୍ପ ଏକ ବିବୃତ୍ତି ଜାରି କରି ତାଙ୍କର ପ୍ରଶଂସା କରିଛନ୍ତି । କାରୋଲିନ ଲେଭିଟ ମୋ ଅଭିଯାନରେ ରାଷ୍ଟ୍ରୀୟ ପ୍ରେସ୍ ସଚିବ ଭାବେ ଗୁରୁତ୍ବପୂର୍ଣ୍ଣ କାମ କରିଛନ୍ତି । ହ୍ବାଇଟ ହାଉସ ସଚିବ ଭାବେ ତାଙ୍କ ନାମ ଘୋଷଣା କରି ମୁଁ ଖୁସି ବ୍ୟକ୍ତ କରୁଛି । ସେ ସ୍ମାର୍ଟ ଏବଂ ଦକ୍ଷ । ଜଣେ ପ୍ରଭାବୀ କମୁନ୍ୟିକେଟର ପ୍ରମାଣିତ ହୋଇଛନ୍ତି । ମୋର ବିଶ୍ବାସ ଅଛି ସେ ପୋଡିୟମରେ ଉତ୍କୃଷ୍ଠତା ଦେଖାଇବେ ଓ ଆମେରିକା ଲୋକଙ୍କ ପାଖରେ ସନ୍ଦେଶ ପହଞ୍ଚାଇବେ । ଆମେରିକାକୁ ପୁଣି ମହାନ କରିବେ ।

କିଛ ଦିନ ତଳେ ଟ୍ରମ୍ପ ତାଙ୍କ ଟିମରେ ଏଲମ ମସ୍କ ଓ ରାମାସ୍ବାମୀଙ୍କୁ ସାମିଲ କରିଥିଲେ । ଉଭୟଙ୍କ ଡିପାର୍ଟମେଣ୍ଟ ଅଫ୍‌ ଗଭର୍ଣ୍ଣମେଣ୍ଟ ଏଫିସିୟନ୍ସି ( DOGE)ର ଦାୟିତ୍ୱ ପ୍ରଦାନ କରିଥିଲେ । ଏହା ପରେ ଭାରତୀୟ ବଂଶୋଦ୍ଭବ ତୁଲସୀ ଗୱାର୍ଡଙ୍କୁ ବଡ ଦାୟିତ୍ବ ଦେଇଥିଲେ । ତୁଲସୀଙ୍କୁ ରାଷ୍ଟ୍ରୀୟ ଗୁଇନ୍ଦା ନିର୍ଦ୍ଦେଶକ ତଥା ଡାଇରେକ୍ଟର ଅଫ୍‌ ନ୍ୟାସନାଲ ଇଣ୍ଟେଲିଜେନ୍ସ ଭାବେରେ ନିଯୁକ୍ତ କରିଥିଲେ ।