ରାଉରକେଲା, ୨୫/୦୪: ରାଉରକେଲାରେ ଗୁଳି ମାଡ । ଗୁରୁବାର ରାତି ୧୦ ଟା ୧୦ ରେ ଲୁଟ୍ କରିବାକୁ ଆସି ହୋଟେଲ ମାଲିକଙ୍କୁ ଗୁଳି ମାଡ଼ କଲେ ୮ ଦୁର୍ବୃତ୍ତ । ହୋଟେଲ ମାଲିକ ଗଙ୍ଗେ ଓରାମଙ୍କ ଡ଼ାହାଣ ଗୋଡ଼ ଆଣ୍ଠୁ ତଳକୁ ବାଜିଛି ଗୁଳି । ଘଟଣା ଘଟିବାର ୪ ଘଣ୍ଟା ମଧ୍ୟରେ ଡବଲ ଏନକାଉଣ୍ଟର୍ କରିଛି ପୋଲିସ । ଦୁଇ ଜଣ ଦୁର୍ବୃତ୍ତ ହେଲେ ବାନେଶ୍ୱର୍ ସିଂ, ଶିବ ନାଥ ସିଂ । ଉଭୟଙ୍କ ଗୋଡ଼ରେ ଗୁଳି ବାଜିଥିବା ବେଳେ ଜଣକୁ ପୋଲିସ ଅଟକ ରଖିଛି । ହେଲେ ଆଉ ୫ ଜଣ ଫେରାର ହୋଇ ଯାଇଛନ୍ତି ।
ସୂଚନା ମୁତାବକ, ରାଉରକେଲା ବିଶ୍ରା ଥାନା ସାରୁ ବାହାଲ ଗାଁରେ ହୋଟେଲ ମାଲିକ ଗଙ୍ଗେ ଓରାମ୍ ହୋଟେଲରେ ଗ୍ରାହକଙ୍କ ସହ ଥିବା ବେଳେ ହଠାତ ଆଠ ଜଣ ଦୁର୍ବୃତ୍ତ ମୁଣ୍ଡରେ ହଳଦିଆ ରଙ୍ଗର ଗାମୁଛା ଘୋଢ଼ାଇ ହୋଟେଲ ଭିତରକୁ ପଶି ଆସିଥିଲେ । ହୋଟେଲ ଭିତରକୁ ଆସି କ୍ୟାସ କାଉଣ୍ଟରକୁ ଯାଇଥିଲେ । ହୋଟେଲ ମାଲିକ ଗଙ୍ଗେ ଓରୀମଙ୍କୁ ଟଙ୍କା ମାଗିଥିଲେ । ହୋଟେଲ ମାଲିକ ଟଙ୍କା ନାହିଁ ବୋଲି କହିଥିଲେ । ତଥାପି ଦୁର୍ବୃତ୍ତମାନେ ଡ଼୍ର ଖୋଲି ଟଙ୍କା ଲୁଟିନେଇଥିଲେ । ହୋଟେଲ ମାଲିକ ଏବ ତାଙ୍କ ସ୍ତ୍ରୀଙ୍କ ମୋବାଇଲ ସହ ଜଣେ ଗ୍ରାହକଙ୍କ ମୋବାଇଲ ଛଢ଼ାଇ ନେଇ ଧମକ ଚମକ ଦେଇ ଗୁଳି ମାଡ଼କରି ଘଟଣା ସ୍ଥଳରୁ ଫେରାର ହୋଇ ଯାଇଥିଲେ ଦୁର୍ବୃତ୍ତ । ଏହି ଗୁଳିମାଡ଼ରେ ହୋଟେଲ ମାଲିକଙ୍କ ଗୋଡ଼ରେ ଗୁଳି ବାଜିଥିଲା । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପହଞ୍ଚିଥିଲା ବିଶ୍ରା ପୋଲିସ । ଘଟଣା ସ୍ଥଳରେ ପହଞ୍ଚି ତୁରନ୍ତ ହୋଟେଲ ମାଲିକଙ୍କୁ ବିଶ୍ରା ଡ଼ାକ୍ତ୍ରରଖାନାରେ ପ୍ରାଥମିକ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । ପରେ ରାଉରକେଲା ସରକାରୀ ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଥିଲା ।
ଏଠାରେ ପ୍ରଶ୍ନ ଉଠୁଛି ଯେ, ଏହି ଦୁର୍ବୃତ୍ତ ମାନେ କିଏ ? ସମସ୍ତ ଦୁର୍ବୃତ୍ତ ହଳଦିଆ ରଙ୍ଗର ଗାମୁଛା ମୁହଁରେ ଘୋଢ଼ାଇ ହୋଇଥିଲେ କାହିଁକି ? ସ୍ଥାନୀୟ ଦୁର୍ବୃତ୍ତ ନା ସୀମାନ୍ତ ଝାଡ଼ଖଣ୍ଡର । ଯଦି ଝାଡ଼ଖଣ୍ଡର ଦୁର୍ବୃତ୍ତ ତ କାହିଁକି ମୁହଁରେ ଗାମୁଛା ଘୋଡ଼ାଇ ହୋଇଥିଲେ । ଯଦି ସ୍ଥାନୀୟ ଦୁର୍ବୃତ୍ତ ତେବେ କାଳେ କିଏ ଚିହ୍ନି ଦେବ ସେଥିପାଇଁ ମୁହଁରେ ଗାମୁଛା ଘୋଢ଼ାଇ କରିଛନ୍ତି କି ଗୁଳିମାଡ଼ । ଏ ସମସ୍ତ ଦିଗକୁ ନେଇ ପୋଲିସ ତଦନ୍ତ କରୁଥିବା ବେଳେ ହେଟେଲ ମାଲିକଙ୍କ ସ୍ୱାସ୍ଥ୍ୟ ଅବସ୍ଥା ସ୍ଥିର ଥିବା ବେଳେ ଗୋଡ଼ରୁ ଗୁଳି କାଢିବା ପାଇଁ ଏକ ଘରୋଇ ହସ୍ପିଟାଲ୍କୁ ସ୍ଥାନାନ୍ତର କରାଯାଇଛି ।
ତେବେ ଏହି ଘଟଣା ଘଟିବାର ୪ ଘଣ୍ଟା ମଧ୍ୟରେ ପୋଲିସ କରିଛି ଡବଲ ଏନକାଉଣ୍ଟର୍ । ପୋଲିସ ଗୁଳିରେ ଘାଇଲା ହୋଇଛନ୍ତି ଦୁଇ ଦୃର୍ବୁତ୍ତ । ସେମାନେ ହେଲେ ବାନେଶ୍ୱର୍ ସିଂ ଏବଂ ଶିବ ନାଥ ସିଂ । ଏହି ଦୁଇ ଦୁର୍ବୃତ୍ତଙ୍କ ଗୋଡ଼ରେ ବାଜିଛି ଗୁଳି । ଆଉ ଜଣଙ୍କୁ ପୋଲିସ ଅଟକ ରଖିଥିବା ବେଳେ ପାଞ୍ଚ ଜଣ ଫେରାର ହୋଇଯାଇଛନ୍ତି । ଏନକାଉଣ୍ଟର ହୋଇଥିବା ଦୁଇ ଦୁର୍ବୃତ୍ତଙ୍କୁ ରାଉରକେଲା ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଛି ।
