ନୂଆଦିଲ୍ଲୀ : ଡୋନାଲ୍ଡ ଟ୍ରମ୍ପ ଭାରତୀୟ ବଂଶୋଦ୍ଭବ ପୂର୍ବତନ ସାମ୍ୱାଦିକ କୁଶ ଦେଶାଇଙ୍କୁ ନିଜର ଡେପୁଟୀ ପ୍ରେସ୍ ସେକ୍ରେଟାରୀ ନିଯୁକ୍ତ କରିଛନ୍ତି। ଏହା ପୂର୍ବରୁ ଦେଶାଇ ରିପବ୍ଲିକାନ୍ ନ୍ୟାସନାଲ କନଭେସନ ଓ ରିପବ୍ଲିକାନ ପାର୍ଟି ଅଫ୍ ଆୟୋଭାର କମ୍ୟୁନିକେଶନ ଡାଇରେକ୍ଟର ଥିଲେ। ନିର୍ବାଚନ ସମୟରେ ତାଙ୍କୁ ପେନସିଲଭାନିଆରେ କମ୍ୟୁନିକେଶନ ଡାଇରେକ୍ଟରର ଦାୟିତ୍ୱ ଦିଆଯାଇ ଥିଲା। ଏହି ପ୍ରାନ୍ତରେ ସେ ଡୋନାଲ୍ଡ ଟ୍ରମ୍ପଙ୍କ ନିର୍ବାଚନ ପ୍ରଚାରରେ ଖୁବ୍ ସାହାଯ୍ୟ କରିଛନ୍ତି। ସେଥିପାଇଁ ତାଙ୍କୁ ଏହାର ପୁରସ୍କାର ଦିଆ ଯାଇଛି। ଡୋନାଲ୍ଡ ଟ୍ରମ୍ପ ଏହି ପ୍ରାନ୍ତରେ ସମସ୍ତ ୭ଟି କ୍ଷେତ୍ରରେ ବିଜୟ ହାସଲ କରି ଥିଲେ।
ଡୋନାଲ୍ଡ ଟ୍ରମ୍ପ ଆହୁରି ଅନେକ ଭାରତୀୟ ବଂଶୋଦ୍ଭବଙ୍କୁ ମଧ୍ୟ ନିଜ ଟିମ୍ରେ ପ୍ରମୁଖ ଦାୟିତ୍ୱ ସବୁ ଦେଇଛନ୍ତି। ଟ୍ରମ୍ପ ଭାରତୀୟ ଆମେରିକୀୟ ରିକି ଗିଲଙ୍କୁ ରାଷ୍ଟ୍ରୀୟ ସୁରକ୍ଷା ପରିଷଦରେ ବରିଷ୍ଠ ନିର୍ଦ୍ଦେଶକ କରିଛନ୍ତି। ତାଙ୍କୁ ଦକ୍ଷିଣ ଓ ମଧ୍ୟ ଏସିଆ ସହ ଜଡ଼ିତ ଦାୟିତ୍ୱ ଦିଆ ଯାଇଛି। ଏହା ବ୍ୟତୀତ ସୌରଭ ଶର୍ମା କାର୍ମିକ କାର୍ଯ୍ୟାଳୟର ଦାୟିତ୍ୱ ସମ୍ଭାଳିବେ।
ରିକି ଗିଲ୍ ଅନ୍ତରାଷ୍ଟ୍ରୀୟ ସମ୍ୱନ୍ଧ ଗୁଡ଼ିକର ଏକ୍ସପର୍ଟ। ସେ ୟୁରୋପୀୟ ଶକ୍ତି ସୁରକ୍ଷାର ନିର୍ଦ୍ଦେଶକ ଭାବେ ମଧ୍ୟ କାମ କରି ସାରିଛନ୍ତି। ଏହା ବ୍ୟତୀତ ସେ ବିଦେଶ ମନ୍ତ୍ରଣାଳୟର ବ୍ୟୁରୋ ଅଫ୍ ଓଭରସିଜ୍ ବିଲ୍ଡିଂ ଅପରେସନ୍ସରେ ମଧ୍ୟ ସିନିୟର କାଉନ୍ସଲର ରହି ସାରିଛନ୍ତି। ସୌରଭ ଶର୍ମା ବେଙ୍ଗାଲୁରୁରେ ରହୁଛନ୍ତି, ଯିଏ ଆମେରିକାନ ସୋମେଣ୍ଟର ଅଧ୍ୟକ୍ଷ ଭାବେ କାର୍ଯ୍ୟ କରି ସାରିଛନ୍ତି। ସେ ବାୟୋକେମିଷ୍ଟ୍ରୀରେ ଗ୍ରାଜୁଏଟ୍। ତାଙ୍କ ବ୍ୟତୀତ କାଶ ପଟେଲଙ୍କୁ ଆମେରିକାରେ ଏଫବିଆଇ ଚିଫ୍ କରାଯାଇଛି।
ବିବେକ ରାମାସ୍ୱାମୀଙ୍କୁ ଡୋନାଲ୍ଡ ଟ୍ରମ୍ପ ଡିପାର୍ଟମେଣ୍ଟ ଅଫ୍ ଗଭର୍ଣ୍ଣମେଣ୍ଟ ଏଫିସିଏନ୍ସିର ପରାମର୍ଶଦାତା ନିଯୁକ୍ତ କରିଛନ୍ତି। ଜୟ ଭଟ୍ଟାଚାର୍ଯ୍ୟଙ୍କୁ ନ୍ୟାସନାଲ ଇନଷ୍ଟିଟ୍ୟୁଟ୍ ଅଫ୍ ହେଲଥର ନିର୍ଦ୍ଦେଶକ କରାଯାଇଛି। ତୁଳସୀ ଗବାର୍ଡ ନ୍ୟାସନାଲ ଇଣ୍ଟେଲିଜେନ୍ସର ଦାୟିତ୍ୱ ସମ୍ଭାଳିବେ। ନିକଟରେ ସେ ରିପବ୍ଲିକାନ ପାର୍ଟିରେ ସାମିଲ ହୋଇ ଥିଲେ।
କହି ରଖୁଛୁ କି, ଡୋନାଲ୍ଡ ଟ୍ରମ୍ପ ରାଷ୍ଟ୍ରପତି ହେବା ପରେ ଲଗାତାର ବଡ଼ ନିଷ୍ପତ୍ତି ନେଉଛନ୍ତି। ସେ ଆମେରିକାର ୪୭ତମ ରାଷ୍ଟ୍ରପତି ଭାବେ ଶପଥ ନେଇଛନ୍ତି।
