ଭୁବନେଶ୍ୱର,୧୭/୧୧: ଦିନ ଗଡ଼ୁଛି । ହେଉନି ପଦବି ପୂରଣ । ଆଜି କାଲି ହୋଇ ସରକାରକୁ ୫ ମାସ ପୂରିଲାଣି । ନିଗମ ଓ ବୋର୍ଡରେ ଥଇଥାନ ହେବାକୁ ଲବିରେ ଥିବା ବିଜେପି ନେତାମାନେ ଅଥୟ ହେଲେଣି । ହେଲେ ଫଳ ଶୂନ । ଦଳ ପାଇଁ ଖଟିଥିବା ନେତାମାନଙ୍କୁ ପୁରସ୍କାର ଭାବେ ନିଗମରେ ଥଇଥାନ କରିବ ବୋଲି ଆଶା ଦେଲା । ଏଥିପାଇଁ ଗୋଡ଼ ଟେକି ବସିଥିବା ନେତାମାନେ ଏବେ ପୂରା ଛଟପଟ । କାହିଁକି ନିଗମ ଓ ବୋର୍ଡରେ ନିଯୁକ୍ତି ହେଉନି ତା’ର ଜବାବ କାହା ପାଖରେ ନାହିଁ ।
ମନ୍ତ୍ରିମଣ୍ଡଳରେ ୬ଟି ମନ୍ତ୍ରୀ ପଦ ଖାଲି ପଡ଼ିଛି । ଏଥିପାଇଁ ମଧ୍ୟ ଯୋଗ୍ୟ ଚେହେରା ଖୋଜୁଛନ୍ତି ମୁଖ୍ୟମନ୍ତ୍ରୀ । ମନ୍ତ୍ରୀ ଲଡ଼ୁ ଖାଇବାକୁ ବହୁ ବିଧାୟକ ଟାକି ବସିଛନ୍ତି । ପଦ୍ମ କିନ୍ତୁ ଘୁଞ୍ଚି ଘୁଞ୍ଚି ଯାଉଛି । ନିଜ ଦମ୍ରେ ବିଜେପି ୨୪ ବର୍ଷର ବିଜେଡି ସରକାରକୁ ହଟେଇ କ୍ଷମତାକୁ ଆସିଲା । ଦଳ ପାଇଁ ଦୀର୍ଘବର୍ଷ ପରିଶ୍ରମ କରିଥିବା ନେତାମାନଙ୍କୁ ଦଳ ଯେ ନିଶ୍ଚୟ ପୁରସ୍କୃତ କରି ନିଗମରେ ଥଇଥାନ କରିବ ଏମିତି ଆଶା ବାନ୍ଧିଲେ କିଛି ନେତା । ମାତ୍ର ‘ଛାମୁ ଯାହା ଦେଲେ ହରଷେ...ପାଉ ପାଉ ଗଲା ବରଷେ’ ନ୍ୟାୟରେ ଏଯାଏ ନିଗମ ଲଡ଼ୁ ମିଳିନି । ଓଡ଼ିଶା ସରକାରଙ୍କର ନିଗମ ଓ ବୋର୍ଡ ସଂଖ୍ୟା ପ୍ରାୟ ୩୭ । ସରକାର ବଦଳିବା ପରେ ନିଗମ ଓ ବୋର୍ଡ ଅଧ୍ୟକ୍ଷ ସହ ଉପଦେଷ୍ଟାମାନେ ପଦ ଛାଡ଼ିଛନ୍ତି । ତେଣୁ ଏହି ପଦରେ ଦଳୀୟ ନେତାଙ୍କୁ ଥଇଥାନ କରିବାକୁ ବିଜେପି ଓ ସରକାର ମଧ୍ୟ ବିଚାର ବିମର୍ଶ କରିଥିଲେ । ମାତ୍ର ଏଯାଏଁ ଦଳର ହାଇକମାଣ୍ଡ ଏହାକୁ ଏଯାଏ ଅନୁମୋଦନ କରିନାହାନ୍ତି ।
ଓଡ଼ିଶା ରାଜ୍ୟ ଗୃହ ନିର୍ମାଣ ନିଗମ, ଆପିକଲ, ଗ୍ରାମ୍ୟ ଗୃହ ଉନ୍ନୟନ ନିଗମ, ପର୍ଯ୍ୟଟନ ନିଗମ, ଚଳଚ୍ଚିତ୍ର ନିଗମ ସହ ନିର୍ମାଣ ଶ୍ରମିକ ଓ ଖଦି ବୋର୍ଡ ଭଳି ପ୍ରାୟ ଦୁଇ ଡଜନରୁ ଅଧିକ ପ୍ରମୁଖ ସଂସ୍ଥାରେ କିଏ ହେବ ମୁଖିଆ? ଏହାକୁ ନେଇ ବିଜେପିର ନେତାମାନଙ୍କ ମଧ୍ୟରେ ଆରମ୍ଭ ହୋଇଛି ଧାଁ ଦୌଡ଼ । ବିଜେପିର ବହୁ ନେତା ବର୍ଷ ବର୍ଷ ଧରି ଦଳ ପାଇଁ କଠିନ ପରିଶ୍ରମ କରିଥିଲେ । ଆଉ କିଛି ନେତା ଟିକଟରୁ ବଞ୍ଚିତ ହୋଇଥିଲେ । ଏବେ ଦଳ ସରକାରକୁ ଆସିବା ପରେ ଏହି ନେତାମାନେ ନିଗମ ଲଡୁ ଖାଇବାକୁ ବ୍ୟାକୁଳ ଥିଲେ ମଧ୍ୟ ଦଳ ଦିନ ଗଡ଼ାଇ ଚାଲିଛି । କାହିଁକି ଚୂଡ଼ାନ୍ତ ନିଷ୍ପତ୍ତି ହୋଇପାରୁନି? ଏହାର ଉତ୍ତର ଦେବାକୁ ଦଳରେ ତଳୁ ଉପର ଯାଏଁ ଥତମତ । ଚର୍ଚ୍ଚା ହେଉଛି, ଏହି ପଦବିରେ କିଏ ବସିବ ସେହି ତାଲିକା ତିଆରି ହେଉଛି। ମାତ୍ର ସହମତର ମୋହର ବସିପାରୁନି । ଯେତିକି ବିଳମ୍ବ ହେଉଛି ଅଙ୍କ ସେତିକି ଗୋଳମାଳିଆ ଧରୁଛି ।
ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ପଦବି ହେଉଛି ଏକ ଗୁରୁତ୍ୱପୂର୍ଣ୍ଣ ପଦବି । ଏହି ପଦରେ ଗତ କିଛିବର୍ଷ ହେବ କାହାକୁ ନିଯୁକ୍ତି ମିଳିନି । ବୋର୍ଡ ଏବେ ଏକରକମ ଅଚଳ । ମହିଳା କମିଶନ ଅଧ୍ୟକ୍ଷା ଓ ଶିଶୁ ଅଧିକାର ସୁରକ୍ଷା ଆୟୋଗ ଅଧ୍ୟକ୍ଷ ପଦରେ ବସିବାକୁ ବହୁ ନେତ୍ରୀ କଳ, ବଳ ଓ କୌଶଳ ଲଗାଇଛନ୍ତି ।
ପଶ୍ଚିମ ଓଡ଼ିଶା ବିକାଶ ପରିଷଦ (ଡବ୍ଲ୍ୟୁଓଡିସି) ହେଉଛି ସରକାରଙ୍କର ଏକ ଗୁରୁତ୍ୱପୂର୍ଣ୍ଣ ସଂସ୍ଥା । ଏ ପରିଷଦରେ ଜଣେ ଅଧ୍ୟକ୍ଷ ଓ ଏକାଧିକ ସଦସ୍ୟ ନିଯୁକ୍ତି ପାଇବେ । ଏହାକୁ ଦୃଷ୍ଟିରେ ରଖି ବିଜେପିର ବହୁ ଓଜନିଆ ନେତା ରେସରେ ଦୌଡ଼ି ଥକିଗଲେଣି । ଫଳ କିନ୍ତୁ ବାହାରୁନି । ବିଜେଡି ସରକାର ଜନଜାତି ଭାଷା, ସଂସ୍କୃତି, ପୂଜାସ୍ଥଳୀର ସଂରକ୍ଷଣ ପାଇଁ ୧୪ ଜିଲ୍ଲାରେ ଗଠନ କରିଥିଲେ ସ୍ୱତନ୍ତ୍ର ଉନ୍ନୟନ ପରିଷଦ । ଏହି ପରିଷଦର ପରାମର୍ଶଦାତା ଭାବେ ବିଜେପି ସରକାର ଦଳର ଆଦିବାସୀ ନେତାମାନଙ୍କୁ ପରାମର୍ଶଦାତା ସହ ସଦସ୍ୟଭାବେ ଥଇଥାନ କରିପାରେ । ବହୁ ଜନଜାତି ନେତା ନିଜ ସମ୍ପର୍କକୁ ଆଧାର କରି ଲବିକୁ ତେଜୀୟାନ୍ କରିଛନ୍ତି । ବିଭିନ୍ନ ଆଞ୍ଚଳିକ ଉନ୍ନୟନ ଟ୍ରଷ୍ଟର ଅଧ୍ୟକ୍ଷ ପଦରେ ମଧ୍ୟ ନୂଆ ନିଯୁକ୍ତି ମିଳିପାରେ । ସରକାର ଗଢ଼ିବା ପରେ ଦଳୀୟ କୋର୍ କମିଟି ବୈଠକରେ ଏ ପ୍ରସଙ୍ଗ ଆଲୋଚନା ହୋଇଥିଲା । ମାତ୍ର ନୂଆଦିଲ୍ଲୀର ସବୁଜ ସଙ୍କେତ କାଳେ ଏଯାଏଁ ମିଳିନି ।
ପ୍ରଧାନମନ୍ତ୍ରୀ ବିଜେପି ମୁଖ୍ୟମନ୍ତ୍ରୀମାନଙ୍କ ବୈଠକରେ ସଂଗଠନ ଓ ସରକାର ତାଳମେଳ ରଖି ବାଟ ଚାଲିବାକୁ ପରାମର୍ଶ ଦେଇଛନ୍ତି । ସଂଗଠନକୁ ଦୃଷ୍ଟିରେ ରଖି ନିଗମ ଓ ବୋର୍ଡଗୁଡ଼ିକର ମୁଖିଆ କିଏ ହେବ ନିଷ୍ପତ୍ତି ହେବ ବୋଲି ଦଳରେ ଟୁପୁରୁଟାପୁରୁ ଚାଲିଛି । ସେହିଭଳି ରାଜ୍ୟ ମନ୍ତ୍ରିମଣ୍ଡଳରେ ୬ ମନ୍ତ୍ରୀ ପଦ ଖାଲି ପଡ଼ିଛି । ଖାଲିଥିବା ସ୍ଥାନରେ ମନ୍ତ୍ରୀ ନିଯୁକ୍ତି ଦେବାରେ ମୁଖ୍ୟମନ୍ତ୍ରୀ ବିଳମ୍ବ କରିବାର କାରଣ କ’ଣ ବୋଲି ଦଳ ଭିତରେ ଚର୍ଚ୍ଚା ହେଉଛି । ଚଳିତ ମାସରେ ଆଇପିଏସ୍ ସମ୍ମିଳନୀ ଓ ଆସନ୍ତା ଜାନୁଆରୀରେ ପ୍ରବାସୀ ଭାରତୀୟ ସମ୍ମିଳନୀରେ ଯୋଗଦେବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡ଼ିଶା ଗସ୍ତରେ ଆସିବେ । ମୋଦିଙ୍କ ଗସ୍ତ ପରେ ନୂଆ ମନ୍ତ୍ରୀଙ୍କୁ ନିଜ କ୍ୟାବିନେଟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନେବାର ସମ୍ଭାବନା ଥିବା ଜଣେ ଦଳୀୟ ନେତା କହିଛନ୍ତି । ଏହାଛଡ଼ା ନିଗମ ଓ ବୋର୍ଡ ଅଧ୍ୟକ୍ଷ ପଦ ନେଇ ନେତାଙ୍କ ମଧ୍ୟରେ ଟଣାଓଟରା ଲାଗି ରହିଥିବାରୁ ନିଯୁକ୍ତି ବିଳମ୍ବ ଧରିଛି ବୋଲି ଦଳ ଭିତରେ ଆଲୋଚନା ଜୋର୍ ଧରିଛି।
